Tīṇeva ariyasaccānīti?
Na hevaṁ vattabbe …pe…
tīṇeva ariyasaccānīti?
Āmantā.
Nanu cattāri ariyasaccāni vuttāni bhagavatā—
dukkhaṁ, dukkhasamudayo, dukkhanirodho, dukkhanirodhagāminī paṭipadāti?
Āmantā.
Hañci cattāri ariyasaccāni vuttāni bhagavatā—
dukkhaṁ, dukkhasamudayo, dukkhanirodho, dukkhanirodhagāminī paṭipadā;
no ca vata re vattabbe—
“tīṇeva ariyasaccānī”ti.
Dukkhasamudayopi dukkhoti?
Āmantā.
Kenaṭṭhenāti?
Aniccaṭṭhena.
Ariyamaggo aniccoti?
Āmantā.
Ariyamaggo dukkhoti?
Na hevaṁ vattabbe …pe….
Ariyamaggo anicco, so ca na dukkhoti?
Āmantā.
Dukkhasamudayo anicco, so ca na dukkhoti?
Na hevaṁ vattabbe …pe…
dukkhasamudayo anicco, so ca dukkhoti?
Āmantā.
Ariyamaggo anicco, so ca dukkhoti?
Na hevaṁ vattabbe …pe….
Na vattabbaṁ—
“ṭhapetvā ariyamaggaṁ avasesā saṅkhārā dukkhā”ti?
Āmantā.
Nanu sā dukkhanirodhagāminī paṭipadāti?
Āmantā.
Hañci sā dukkhanirodhagāminī paṭipadā, tena vata re vattabbe—
“ṭhapetvā ariyamaggaṁ avasesā saṅkhārā dukkhā”ti.
Ṭhapetvā ariyamaggantikathā niṭṭhitā.
Kathāvatthu
Mahāpaṇṇāsaka
Sattarasamavagga
Navattabbaṁsaṅghodakkhiṇaṁpaṭiggaṇhātikathā
Na vattabbaṁ—
“saṅgho dakkhiṇaṁ paṭiggaṇhātī”ti?
Āmantā.
Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti?
Āmantā.
Hañci saṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa, tena vata re vattabbe—
“saṅgho dakkhiṇaṁ paṭiggaṇhātī”ti.
Na vattabbaṁ—
“saṅgho dakkhiṇaṁ paṭiggaṇhātī”ti?
Āmantā.
Nanu cattāro purisayugā aṭṭha purisapuggalā dakkhiṇeyyā vuttā bhagavatāti?
Āmantā.
Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe—
“saṅgho dakkhiṇaṁ paṭiggaṇhātī”ti.
Na vattabbaṁ—
“saṅgho dakkhiṇaṁ paṭiggaṇhātī”ti?
Āmantā.
Nanu atthi keci saṅghassa dānaṁ dentīti?
Āmantā.
Hañci atthi keci saṅghassa dānaṁ denti, tena vata re vattabbe—
“saṅgho dakkhiṇaṁ paṭiggaṇhātī”ti.
Nanu atthi keci saṅghassa cīvaraṁ denti …pe…
piṇḍapātaṁ denti …
senāsanaṁ denti …
gilānapaccayabhesajjaparikkhāraṁ denti …
khādanīyaṁ denti …
bhojanīyaṁ denti …pe…
pānīyaṁ dentīti?
Āmantā.
Hañci atthi keci saṅghassa pānīyaṁ denti, tena vata re vattabbe—
“saṅgho dakkhiṇaṁ paṭiggaṇhātī”ti.
Na vattabbaṁ—
“saṅgho dakkhiṇaṁ paṭiggaṇhātī”ti?
Āmantā.
Nanu vuttaṁ bhagavatā—
“Āhutiṁ jātavedova,
mahāmeghaṁva medanī;
Saṅgho samādhisampanno,
paṭiggaṇhāti dakkhiṇan”ti.
Attheva suttantoti?
Āmantā.
Tena hi saṅgho dakkhiṇaṁ paṭiggaṇhātīti.
Saṅgho dakkhiṇaṁ paṭiggaṇhātīti?
Āmantā.
Maggo paṭiggaṇhāti, phalaṁ paṭiggaṇhātīti?
Na hevaṁ vattabbe …pe….
Na vattabbaṁ saṅgho dakkhiṇaṁ paṭiggaṇhātītikathā niṭṭhitā.
Kathāvatthu
Mahāpaṇṇāsaka
Sattarasamavagga
Navattabbaṁsaṅghodakkhiṇaṁvisodhetītikathā
Na vattabbaṁ—
“saṅgho dakkhiṇaṁ visodhetī”ti?
Āmantā.
Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti?
Āmantā.
Hañci saṅgho āhuneyyo …pe… anuttaraṁ puññakkhettaṁ lokassa, tena vata re vattabbe—
“saṅgho dakkhiṇaṁ visodhetī”ti.
Na vattabbaṁ—
“saṅgho dakkhiṇaṁ visodhetī”ti?
Āmantā.