paccuppannaṁ “paccuppannan”ti manasikaronto, atītaṁ “atītan”ti manasi karotīti?
Āmantā.
Dvinnaṁ phassānaṁ …pe…
dvinnaṁ cittānaṁ samodhānaṁ hotīti?
Na hevaṁ vattabbe …pe….
Paccuppannaṁ “paccuppannan”ti manasikaronto, anāgataṁ “anāgatan”ti manasi karotīti?
Na hevaṁ vattabbe …pe…
paccuppannaṁ “paccuppannan”ti manasikaronto, anāgataṁ “anāgatan”ti manasi karotīti?
Āmantā.
Dvinnaṁ phassānaṁ …pe…
dvinnaṁ cittānaṁ samodhānaṁ hotīti?
Na hevaṁ vattabbe …pe….
Paccuppannaṁ “paccuppannan”ti manasikaronto, atītaṁ “atītan”ti manasi karoti, anāgataṁ “anāgatan”ti manasi karotīti?
Na hevaṁ vattabbe …pe…
paccuppannaṁ “paccuppannan”ti manasikaronto, atītaṁ “atītan”ti manasi karoti, anāgataṁ “anāgatan”ti manasi karotīti?
Āmantā.
Tiṇṇaṁ phassānaṁ …pe…
tiṇṇaṁ cittānaṁ samodhānaṁ hotīti?
Na hevaṁ vattabbe …pe….
Na vattabbaṁ—
“adhigayha manasi karotī”ti?
Āmantā.
Nanu vuttaṁ bhagavatā—
“Sabbe saṅkhārā aniccāti,
yadā paññāya passati;
Atha nibbindati dukkhe,
esa maggo visuddhiyā.
Sabbe saṅkhārā dukkhāti,
yadā paññāya passati;
Atha nibbindati dukkhe,
esa maggo visuddhiyā.
Sabbe dhammā anattāti,
yadā paññāya passati;
Atha nibbindati dukkhe,
esa maggo visuddhiyā”ti.
Attheva suttantoti?
Āmantā.
Tena hi adhigayha manasi karotīti.
Adhigayhamanasikārakathā niṭṭhitā.
Kathāvatthu
Mahāpaṇṇāsaka
Soḷasamavagga
Rūpaṁhetūtikathā
Rūpaṁ hetūti?
Āmantā.
Alobho hetūti?
Na hevaṁ vattabbe …pe…
adoso hetu …pe…
amoho hetu …
lobho hetu …
doso hetu …
moho hetūti?
Na hevaṁ vattabbe …pe….
Rūpaṁ hetūti?
Āmantā.
Sārammaṇaṁ, atthi tassa āvaṭṭanā …pe… paṇidhīti?
Na hevaṁ vattabbe …pe…
nanu anārammaṇaṁ, natthi tassa āvaṭṭanā …pe… paṇidhīti?
Āmantā.
Hañci anārammaṇaṁ, natthi tassa āvaṭṭanā …pe… paṇidhi, no ca vata re vattabbe—
“rūpaṁ hetū”ti.
Alobho hetu sārammaṇo, atthi tassa āvaṭṭanā …pe… paṇidhīti?
Āmantā.
Rūpaṁ hetu sārammaṇaṁ, atthi tassa āvaṭṭanā …pe… paṇidhīti?
Na hevaṁ vattabbe …pe…
adoso hetu …
amoho hetu …
lobho hetu …
doso hetu …
moho hetu sārammaṇo, atthi tassa āvaṭṭanā …pe… paṇidhīti?
Āmantā.
Rūpaṁ hetu sārammaṇaṁ, atthi tassa āvaṭṭanā …pe… paṇidhīti?
Na hevaṁ vattabbe …pe….
Rūpaṁ hetu anārammaṇaṁ, natthi tassa āvaṭṭanā …pe… paṇidhīti?
Āmantā.
Alobho hetu anārammaṇo, natthi tassa āvaṭṭanā …pe… paṇidhīti?
Na hevaṁ vattabbe …pe…
rūpaṁ hetu anārammaṇaṁ, natthi tassa āvaṭṭanā …pe… paṇidhīti?
Āmantā.
Adoso hetu …
amoho hetu …
lobho hetu …
doso hetu …
moho hetu anārammaṇo, natthi tassa āvaṭṭanā …pe… paṇidhīti?
Na hevaṁ vattabbe …pe….
Na vattabbaṁ—
“rūpaṁ hetū”ti?
Āmantā.
Nanu mahābhūtā upādāyarūpānaṁ upādāyahetūti?
Āmantā.
Hañci mahābhūtā upādāyarūpānaṁ upādāyahetu, tena vata re vattabbe—
“rūpaṁ hetū”ti.
Rūpaṁ hetūtikathā niṭṭhitā.
Kathāvatthu
Mahāpaṇṇāsaka
Soḷasamavagga
Rūpaṁsahetukantikathā
Rūpaṁ sahetukanti?
Āmantā.
Alobhahetunāti?