Hañci kāyaviññāṇaṁ āvaṭṭentassa uppajjati …pe… paṇidahantassa uppajjati, no ca vata re vattabbe—
“jivhāviññāṇassa anantarā kāyaviññāṇaṁ uppajjatī”ti.
Jivhāviññāṇassa anantarā kāyaviññāṇaṁ uppajjatīti?
Āmantā.
Jivhāviññāṇaṁ rasanimittaṁ manasikaroto uppajjatīti?
Āmantā.
Kāyaviññāṇaṁ rasanimittaṁ manasikaroto uppajjatīti?
Na hevaṁ vattabbe …pe….
Jivhāviññāṇaṁ rasārammaṇaññeva na aññārammaṇanti?
Āmantā.
Kāyaviññāṇaṁ rasārammaṇaññeva na aññārammaṇanti?
Na hevaṁ vattabbe …pe….
Jivhañca paṭicca rase ca uppajjati jivhāviññāṇanti?
Āmantā.
Jivhañca paṭicca rase ca uppajjati kāyaviññāṇanti?
Na hevaṁ vattabbe …pe….
Jivhañca paṭicca rase ca uppajjati kāyaviññāṇanti?
Āmantā.
“Jivhañca paṭicca rase ca uppajjati kāyaviññāṇan”ti—
attheva suttantoti?
Natthi.
“Jivhañca paṭicca rase ca uppajjati jivhāviññāṇan”ti—
attheva suttantoti?
Āmantā.
Hañci “jivhañca paṭicca rase ca uppajjati jivhāviññāṇan”ti—
attheva suttantoti, no ca vata re vattabbe—
“jivhañca paṭicca rase ca uppajjati kāyaviññāṇan”ti.
Jivhāviññāṇassa anantarā kāyaviññāṇaṁ uppajjatīti?
Āmantā.
Taññeva jivhāviññāṇaṁ taṁ kāyaviññāṇanti?
Na hevaṁ vattabbe …pe….
Na vattabbaṁ—
“pañcaviññāṇā aññamaññassa samanantarā uppajjantī”ti?
Āmantā.
Nanu atthi koci naccati gāyati vādeti, rūpañca passati, saddañca suṇāti, gandhañca ghāyati, rasañca sāyati, phoṭṭhabbañca phusatīti?
Āmantā.
Hañci atthi koci naccati gāyati vādeti, rūpañca passati, saddañca suṇāti, gandhañca ghāyati, rasañca sāyati, phoṭṭhabbañca phusati, tena vata re vattabbe—
“pañcaviññāṇā aññamaññassa samanantarā uppajjantī”ti.
Anantarapaccayakathā niṭṭhitā.
Kathāvatthu
Mahāpaṇṇāsaka
Cuddasamavagga
Ariyarūpakathā
Ariyarūpaṁ mahābhūtānaṁ upādāyāti?
Āmantā.
Ariyarūpaṁ kusalanti?
Āmantā.
Mahābhūtā kusalāti?
Na hevaṁ vattabbe …pe…
mahābhūtā abyākatāti?
Āmantā.
Ariyarūpaṁ abyākatanti?
Na hevaṁ vattabbe …pe…
ariyarūpaṁ mahābhūtānaṁ upādāyāti?
Āmantā.
Ariyarūpaṁ anāsavaṁ asaṁyojaniyaṁ aganthaniyaṁ anoghaniyaṁ ayoganiyaṁ anīvaraṇiyaṁ aparāmaṭṭhaṁ anupādāniyaṁ asaṅkilesiyanti?
Āmantā.
Mahābhūtā anāsavā …pe… asaṅkilesiyāti?
Na hevaṁ vattabbe …pe…
mahābhūtā sāsavā saṁyojaniyā …pe… saṅkilesiyāti?
Āmantā.
Ariyarūpaṁ sāsavaṁ saṁyojaniyaṁ …pe… saṅkilesiyanti?
Na hevaṁ vattabbe …pe….
Na vattabbaṁ—
“ariyarūpaṁ mahābhūtānaṁ upādāyā”ti?
Āmantā.
Nanu vuttaṁ bhagavatā—
“yaṁ kiñci, bhikkhave, rūpaṁ cattāri mahābhūtāni catunnañca mahābhūtānaṁ upādāyarūpan”ti.
Attheva suttantoti?
Āmantā.
Tena hi ariyarūpaṁ mahābhūtānaṁ upādāyāti.
Ariyarūpakathā niṭṭhitā.
Kathāvatthu
Mahāpaṇṇāsaka
Cuddasamavagga
Aññoanusayotikathā
Añño kāmarāgānusayo aññaṁ kāmarāgapariyuṭṭhānanti?
Āmantā.
Añño kāmarāgo aññaṁ kāmarāgapariyuṭṭhānanti?
Na hevaṁ vattabbe …pe…
sveva kāmarāgo taṁ kāmarāgapariyuṭṭhānanti?
Āmantā.
Sveva kāmarāgānusayo taṁ kāmarāgapariyuṭṭhānanti?
Na hevaṁ vattabbe …pe….
Añño paṭighānusayo aññaṁ paṭighapariyuṭṭhānanti?
Āmantā.
Aññaṁ paṭighaṁ aññaṁ paṭighapariyuṭṭhānanti?
Na hevaṁ vattabbe …pe…
taññeva paṭighaṁ taṁ paṭighapariyuṭṭhānanti?
Āmantā.
Sveva paṭighānusayo taṁ paṭighapariyuṭṭhānanti?
Na hevaṁ vattabbe …pe….
Añño mānānusayo aññaṁ mānapariyuṭṭhānanti?
Āmantā.
Añño māno aññaṁ mānapariyuṭṭhānanti?
Na hevaṁ vattabbe …pe…
sveva māno taṁ mānapariyuṭṭhānanti?
Āmantā.
Sveva mānānusayo taṁ mānapariyuṭṭhānanti?
Na hevaṁ vattabbe …pe….