Āmantā.
Atthi tassa ñāṇassa ārammaṇanti?
Na hevaṁ vattabbe …pe…
tena hi ñāṇaṁ anārammaṇanti.
Arahā cakkhuviññāṇasamaṅgī paññavāti vattabboti?
Āmantā.
Atthi tāya paññāya ārammaṇanti?
Na hevaṁ vattabbe …pe….
Tena hi paññā anārammaṇāti.
Ñāṇaṁ anārammaṇantikathā niṭṭhitā.
Kathāvatthu
Mahāpaṇṇāsaka
Navamavagga
Atītānāgatārammaṇakathā
Atītārammaṇaṁ cittaṁ anārammaṇanti?
Āmantā.
Nanu atītārammaṇanti?
Āmantā.
Hañci atītārammaṇaṁ, no ca vata re vattabbe—
“atītārammaṇaṁ cittaṁ anārammaṇan”ti.
Atītārammaṇaṁ cittaṁ anārammaṇanti micchā.
Hañci vā pana anārammaṇaṁ, no ca vata re vattabbe—
“atītārammaṇan”ti.
Anārammaṇaṁ atītārammaṇanti micchā.
Atītārammaṇaṁ cittaṁ anārammaṇanti?
Āmantā.
Nanu atītaṁ ārabbha atthi āvaṭṭanā …pe… paṇidhīti?
Āmantā.
Hañci atītaṁ ārabbha atthi āvaṭṭanā …pe… paṇidhi, no ca vata re vattabbe—
“atītārammaṇaṁ cittaṁ anārammaṇan”ti.
Anāgatārammaṇaṁ cittaṁ anārammaṇanti?
Āmantā.
Nanu anāgatārammaṇanti?
Āmantā.
Hañci anāgatārammaṇaṁ, no ca vata re vattabbe—
“anāgatārammaṇaṁ cittaṁ anārammaṇan”ti.
Anāgatārammaṇaṁ cittaṁ anārammaṇanti micchā.
Hañci vā pana anārammaṇaṁ, no ca vata re vattabbe—
“anāgatārammaṇan”ti.
Anārammaṇaṁ anāgatārammaṇanti micchā.
Anāgatārammaṇaṁ cittaṁ anārammaṇanti?
Āmantā.
Nanu anāgataṁ ārabbha atthi āvaṭṭanā …pe… paṇidhīti?
Āmantā.
Hañci anāgataṁ ārabbha atthi āvaṭṭanā …pe… paṇidhi, no ca vata re vattabbe—
“anāgatārammaṇaṁ cittaṁ anārammaṇan”ti.
Paccuppannaṁ ārabbha atthi āvaṭṭanā …pe… paṇidhi, paccuppannārammaṇaṁ cittaṁ sārammaṇanti?
Āmantā.
Atītaṁ ārabbha atthi āvaṭṭanā …pe… paṇidhi, atītārammaṇaṁ cittaṁ sārammaṇanti?
Na hevaṁ vattabbe …pe…
paccuppannaṁ ārabbha atthi āvaṭṭanā …pe… paṇidhi, paccuppannārammaṇaṁ cittaṁ sārammaṇanti?
Āmantā.
Anāgataṁ ārabbha atthi āvaṭṭanā …pe… paṇidhi, anāgatārammaṇaṁ cittaṁ sārammaṇanti?
Na hevaṁ vattabbe …pe….
Atītaṁ ārabbha atthi āvaṭṭanā …pe… paṇidhi, atītārammaṇaṁ cittaṁ anārammaṇanti?
Āmantā.
Paccuppannaṁ ārabbha atthi āvaṭṭanā …pe… paṇidhi, paccuppannārammaṇaṁ cittaṁ anārammaṇanti?
Na hevaṁ vattabbe …pe….
Anāgataṁ ārabbha atthi āvaṭṭanā …pe… paṇidhi, anāgatārammaṇaṁ cittaṁ anārammaṇanti?
Āmantā.
Paccuppannaṁ ārabbha atthi āvaṭṭanā …pe… paṇidhi, paccuppannārammaṇaṁ cittaṁ anārammaṇanti?
Na hevaṁ vattabbe …pe….
Na vattabbaṁ—
“atītānāgatārammaṇaṁ cittaṁ anārammaṇan”ti?
Āmantā.
Nanu atītānāgataṁ natthīti?
Āmantā.
Hañci atītānāgataṁ natthi, tena vata re vattabbe—
“atītānāgatārammaṇaṁ cittaṁ anārammaṇan”ti …pe….
Atītānāgatārammaṇakathā niṭṭhitā.
Kathāvatthu
Mahāpaṇṇāsaka
Navamavagga
Vitakkānupatitakathā
Sabbaṁ cittaṁ vitakkānupatitanti?
Āmantā.
Sabbaṁ cittaṁ vicārānupatitaṁ pītānupatitaṁ sukhānupatitaṁ dukkhānupatitaṁ somanassānupatitaṁ domanassānupatitaṁ upekkhānupatitaṁ saddhānupatitaṁ vīriyānupatitaṁ satānupatitaṁ samādhānupatitaṁ paññānupatitaṁ rāgānupatitaṁ dosānupatitaṁ …pe…
anottappānupatitanti?
Na hevaṁ vattabbe …pe….
Sabbaṁ cittaṁ vitakkānupatitanti?
Āmantā.
Nanu atthi avitakko vicāramatto samādhīti?
Āmantā.
Hañci atthi avitakko vicāramatto samādhi, no ca vata re vattabbe—
“sabbaṁ cittaṁ vitakkānupatitan”ti.
Sabbaṁ cittaṁ vitakkānupatitanti?
Āmantā.
Nanu atthi avitakko avicāro samādhīti?
Āmantā.
Hañci atthi avitakko avicāro samādhi, no ca vata re vattabbe—
“sabbaṁ cittaṁ vitakkānupatitan”ti.
Sabbaṁ cittaṁ vitakkānupatitanti?
Āmantā.
Nanu tayo samādhī vuttā bhagavatā—
“savitakko savicāro samādhi, avitakko vicāramatto samādhi, avitakko avicāro samādhī”ti?
Āmantā.
Hañci tayo samādhī vuttā bhagavatā—
savitakko savicāro samādhi, avitakko vicāramatto samādhi, avitakko avicāro samādhi, no ca vata re vattabbe—
“sabbaṁ cittaṁ vitakkānupatitan”ti.
Vitakkānupatitakathā niṭṭhitā.