Amataṁ ārabbha rāgo uppajjati, amataṁ na rāgaṭṭhāniyaṁ na rajaniyaṁ na kamaniyaṁ na madaniyaṁ na bandhaniyaṁ na mucchaniyanti?
Āmantā.
Rūpaṁ ārabbha rāgo uppajjati, rūpaṁ na rāgaṭṭhāniyaṁ …pe…
na mucchaniyanti?
Na hevaṁ vattabbe …pe….
Amataṁ ārabbha doso uppajjati, amataṁ na dosaṭṭhāniyaṁ na kopaṭṭhāniyaṁ na paṭighaṭṭhāniyanti?
Āmantā.
Rūpaṁ ārabbha doso uppajjati, rūpaṁ na dosaṭṭhāniyaṁ na kopaṭṭhāniyaṁ na paṭighaṭṭhāniyanti?
Na hevaṁ vattabbe …pe….
Amataṁ ārabbha moho uppajjati, amataṁ na mohaṭṭhāniyaṁ na aññāṇakaraṇaṁ …pe… nibbānasaṁvattaniyanti?
Āmantā.
Rūpaṁ ārabbha moho uppajjati, rūpaṁ na mohaṭṭhāniyaṁ na aññāṇakaraṇaṁ …pe… nibbānasaṁvattaniyanti?
Na hevaṁ vattabbe …pe….
Na vattabbaṁ—
“amatārammaṇaṁ saṁyojanan”ti?
Āmantā.
Nanu vuttaṁ bhagavatā—
“nibbānaṁ nibbānato sañjānāti, nibbānaṁ nibbānato sañjānitvā nibbānaṁ maññati, nibbānasmiṁ maññati, nibbānato maññati, nibbānaṁ meti maññati, nibbānaṁ abhinandatī”ti.
Attheva suttantoti?
Āmantā.
Tena hi amatārammaṇaṁ saṁyojananti.
Amatārammaṇakathā niṭṭhitā.
Kathāvatthu
Mahāpaṇṇāsaka
Navamavagga
Rūpaṁsārammaṇantikathā
Rūpaṁ sārammaṇanti?
Āmantā.
Atthi tassa āvaṭṭanā ābhogo samannāhāro manasikāro cetanā patthanā paṇidhīti?
Na hevaṁ vattabbe …pe…
nanu natthi tassa āvaṭṭanā ābhogo …pe… paṇidhīti?
Āmantā.
Hañci natthi tassa āvaṭṭanā ābhogo …pe… paṇidhi, no ca vata re vattabbe—
“rūpaṁ sārammaṇan”ti.
Phasso sārammaṇo, atthi tassa āvaṭṭanā ābhogo …pe… paṇidhīti?
Āmantā.
Rūpaṁ sārammaṇaṁ, atthi tassa āvaṭṭanā ābhogo …pe… paṇidhīti?
Na hevaṁ vattabbe …pe….
Vedanā …pe…
saññā cetanā cittaṁ saddhā vīriyaṁ sati samādhi paññā rāgo doso moho māno diṭṭhi vicikicchā thinaṁ uddhaccaṁ ahirikaṁ …pe…
anottappaṁ sārammaṇaṁ, atthi tassa āvaṭṭanā ābhogo …pe… paṇidhīti?
Āmantā.
Rūpaṁ sārammaṇaṁ, atthi tassa āvaṭṭanā ābhogo …pe… paṇidhīti?
Na hevaṁ vattabbe …pe….
Rūpaṁ sārammaṇaṁ, natthi tassa āvaṭṭanā ābhogo …pe… paṇidhīti?
Āmantā.
Phasso sārammaṇo, natthi tassa āvaṭṭanā ābhogo …pe… paṇidhīti?
Na hevaṁ vattabbe …pe….
Rūpaṁ sārammaṇaṁ, natthi tassa āvaṭṭanā ābhogo …pe… paṇidhīti?
Āmantā.
Vedanā …pe…
anottappaṁ sārammaṇaṁ, natthi tassa āvaṭṭanā ābhogo …pe… paṇidhīti?
Na hevaṁ vattabbe …pe….
Na vattabbaṁ—
“rūpaṁ sārammaṇan”ti?
Āmantā.
Nanu rūpaṁ sappaccayanti?
Āmantā.
Hañci rūpaṁ sappaccayaṁ, tena vata re vattabbe—
“rūpaṁ sārammaṇan”ti.
Rūpaṁ sārammaṇantikathā niṭṭhitā.
Kathāvatthu
Mahāpaṇṇāsaka
Navamavagga
Anusayāanārammaṇātikathā
Anusayā anārammaṇāti?
Āmantā.
Rūpaṁ nibbānaṁ cakkhāyatanaṁ …pe…
phoṭṭhabbāyatananti?
Na hevaṁ vattabbe …pe….
Kāmarāgānusayo anārammaṇoti?
Āmantā.
Kāmarāgo kāmarāgapariyuṭṭhānaṁ kāmarāgasaṁyojanaṁ kāmogho kāmayogo kāmacchandanīvaraṇaṁ anārammaṇanti?
Na hevaṁ vattabbe …pe…
kāmarāgo kāmarāgapariyuṭṭhānaṁ kāmarāgasaṁyojanaṁ kāmogho kāmayogo kāmacchandanīvaraṇaṁ sārammaṇanti?
Āmantā.
Kāmarāgānusayo sārammaṇoti?
Na hevaṁ vattabbe …pe….
Kāmarāgānusayo anārammaṇoti?
Āmantā.
Katamakkhandhapariyāpannoti?
Saṅkhārakkhandhapariyāpannoti.
Saṅkhārakkhandho anārammaṇoti?
Na hevaṁ vattabbe …pe…
saṅkhārakkhandho anārammaṇoti?
Āmantā.
Vedanākkhandho saññākkhandho viññāṇakkhandho anārammaṇoti?
Na hevaṁ vattabbe …pe….
Kāmarāgānusayo saṅkhārakkhandhapariyāpanno anārammaṇoti?
Āmantā.
Kāmarāgo saṅkhārakkhandhapariyāpanno anārammaṇoti?
Na hevaṁ vattabbe …pe…
kāmarāgo saṅkhārakkhandhapariyāpanno sārammaṇoti?
Āmantā.
Kāmarāgānusayo saṅkhārakkhandhapariyāpanno sārammaṇoti?
Na hevaṁ vattabbe …pe….
Kāmarāgānusayo saṅkhārakkhandhapariyāpanno anārammaṇo, kāmarāgo saṅkhārakkhandhapariyāpanno sārammaṇoti?
Āmantā.
Saṅkhārakkhandho ekadeso sārammaṇo ekadeso anārammaṇoti?
Na hevaṁ vattabbe …pe…