catubbidhā, bhikkhave, vacīsañcetanā kusalaṁ vacīkammaṁ sukhudrayaṁ sukhavipākaṁ;
tividhā, bhikkhave, manosañcetanā kusalaṁ manokammaṁ sukhudrayaṁ sukhavipākan”ti.
Attheva suttantoti?
Āmantā.
Tena hi na vattabbaṁ—
“rūpaṁ kamman”ti.
Rūpaṁ kammanti?
Āmantā.
Nanu vuttaṁ bhagavatā—
“sacāyaṁ, ānanda, samiddhi moghapuriso pāṭaliputtassa paribbājakassa evaṁ puṭṭho evaṁ byākareyya—
‘sañcetaniyaṁ, āvuso pāṭaliputta, kammaṁ katvā kāyena vācāya manasā sukhavedaniyaṁ sukhaṁ so vedayati;
sañcetaniyaṁ, āvuso pāṭaliputta, kammaṁ katvā kāyena vācāya manasā dukkhavedaniyaṁ dukkhaṁ so vedayati;
sañcetaniyaṁ, āvuso pāṭaliputta, kammaṁ katvā kāyena vācāya manasā adukkhamasukhavedaniyaṁ adukkhamasukhaṁ so vedayatī’ti, evaṁ byākaramāno kho, ānanda, samiddhi moghapuriso pāṭaliputtassa paribbājakassa sammā byākaramāno byākareyyā”ti.
Attheva suttantoti?
Āmantā.
Tena hi na vattabbaṁ—
“rūpaṁ kamman”ti.
Rūpaṁ kammantikathā niṭṭhitā.
Kathāvatthu
Mahāpaṇṇāsaka
Aṭṭhamavagga
Jīvitindriyakathā
Natthi rūpajīvitindriyanti?
Āmantā.
Natthi rūpīnaṁ dhammānaṁ āyu ṭhiti yapanā yāpanā iriyanā vattanā pālanāti?
Na hevaṁ vattabbe …pe…
atthi rūpīnaṁ dhammānaṁ āyu ṭhiti yapanā yāpanā iriyanā vattanā pālanāti?
Āmantā.
Hañci atthi rūpīnaṁ dhammānaṁ āyu ṭhiti yapanā yāpanā iriyanā vattanā pālanā, no ca vata re vattabbe—
“natthi rūpajīvitindriyan”ti.
Atthi arūpīnaṁ dhammānaṁ āyu ṭhiti yapanā yāpanā iriyanā vattanā pālanā, atthi arūpajīvitindriyanti?
Āmantā.
Atthi rūpīnaṁ dhammānaṁ āyu ṭhiti yapanā yāpanā iriyanā vattanā pālanā, atthi rūpajīvitindriyanti?
Na hevaṁ vattabbe …pe…
atthi rūpīnaṁ dhammānaṁ āyu ṭhiti yapanā yāpanā iriyanā vattanā pālanā, natthi rūpajīvitindriyanti?
Āmantā.
Atthi arūpīnaṁ dhammānaṁ āyu ṭhiti yapanā yāpanā iriyanā vattanā pālanā, natthi arūpajīvitindriyanti?
Na hevaṁ vattabbe …pe….
Arūpīnaṁ dhammānaṁ āyu arūpajīvitindriyanti?
Āmantā.
Rūpīnaṁ dhammānaṁ āyu rūpajīvitindriyanti?
Na hevaṁ vattabbe …pe…
rūpīnaṁ dhammānaṁ āyu na vattabbaṁ—
“rūpajīvitindriyan”ti?
Āmantā.
Arūpīnaṁ dhammānaṁ āyu na vattabbaṁ—
“arūpajīvitindriyan”ti?
Na hevaṁ vattabbe …pe….
Rūpīnaṁ dhammānaṁ āyu arūpajīvitindriyanti?
Āmantā.
Arūpīnaṁ dhammānaṁ āyu rūpajīvitindriyanti?
Na hevaṁ vattabbe …pe….
Arūpīnaṁ dhammānaṁ āyu na vattabbaṁ—
“rūpajīvitindriyan”ti?
Āmantā.
Rūpīnaṁ dhammānaṁ āyu na vattabbaṁ—
“arūpajīvitindriyan”ti?
Na hevaṁ vattabbe …pe….
Rūpīnañca arūpīnañca dhammānaṁ āyu arūpajīvitindriyanti?
Āmantā.
Rūpīnañca arūpīnañca dhammānaṁ āyu rūpajīvitindriyanti?
Na hevaṁ vattabbe …pe….
Rūpīnañca arūpīnañca dhammānaṁ āyu na vattabbaṁ—
“rūpajīvitindriyan”ti?
Āmantā.
Rūpīnañca arūpīnañca dhammānaṁ āyu na vattabbaṁ—
“arūpajīvitindriyan”ti?
Na hevaṁ vattabbe …pe…
natthi rūpajīvitindriyanti?
Āmantā.
Nirodhaṁ samāpannassa natthi jīvitindriyanti?
Na hevaṁ vattabbe …pe….
Nirodhaṁ samāpannassa atthi jīvitindriyanti?
Āmantā.
Hañci nirodhaṁ samāpannassa atthi jīvitindriyaṁ, no ca vata re vattabbe—
“natthi rūpajīvitindriyan”ti.
Nirodhaṁ samāpannassa atthi jīvitindriyanti?
Āmantā.
Katamakkhandhapariyāpannanti?
Saṅkhārakkhandhapariyāpannanti.
Nirodhaṁ samāpannassa atthi saṅkhārakkhandhoti?
Na hevaṁ vattabbe …pe….
Nirodhaṁ samāpannassa atthi saṅkhārakkhandhoti?
Āmantā.
Nirodhaṁ samāpannassa atthi vedanākkhandho …pe…
saññākkhandho …pe…
viññāṇakkhandhoti?
Na hevaṁ vattabbe …pe….
Nirodhaṁ samāpannassa atthi vedanākkhandho …pe…
saññākkhandho …pe…
viññāṇakkhandhoti?
Āmantā.
Na nirodhaṁ samāpannoti?
Na hevaṁ vattabbe …pe….
Natthi rūpajīvitindriyanti?
Āmantā.
Asaññasattānaṁ natthi jīvitindriyanti?
Na hevaṁ vattabbe …pe….
Asaññasattānaṁ atthi jīvitindriyanti?
Āmantā.