āpodhātu …
tejodhātu …pe…
vāyodhātu asuci assu lohitaṁ sedo anārammaṇo phassavippayutto akusaloti?
Na hevaṁ vattabbe …pe….
Akusalena cittena samuṭṭhitaṁ rūpāyatanaṁ anārammaṇaṁ phassavippayuttaṁ abyākatanti?
Āmantā.
Akusalena cittena samuṭṭhitaṁ vacīkammaṁ rūpaṁ anārammaṇaṁ phassavippayuttaṁ abyākatanti?
Na hevaṁ vattabbe …pe…
akusalena cittena samuṭṭhitaṁ saddāyatanaṁ …pe…
gandhāyatanaṁ …
rasāyatanaṁ …
phoṭṭhabbāyatanaṁ …
pathavīdhātu …
āpodhātu …
tejodhātu …pe…
vāyodhātu asuci assu lohitaṁ sedo anārammaṇo phassavippayutto abyākatoti?
Āmantā.
Akusalena cittena samuṭṭhitaṁ vacīkammaṁ rūpaṁ anārammaṇaṁ phassavippayuttaṁ abyākatanti?
Na hevaṁ vattabbe …pe….
Na vattabbaṁ—
“rūpaṁ kusalampi akusalampī”ti?
Āmantā.
Nanu kāyakammaṁ vacīkammaṁ kusalampi akusalampīti?
Āmantā.
Hañci kāyakammaṁ vacīkammaṁ kusalampi akusalampi, tena vata re vattabbe—
“rūpaṁ kusalampi akusalampī”ti.
Rūpaṁ kusalampi akusalampīti?
Āmantā.
Cakkhāyatanaṁ kusalampi akusalampīti?
Na hevaṁ vattabbe …pe…
rūpaṁ kusalampi akusalampīti?
Āmantā.
Sotāyatanaṁ …pe…
ghānāyatanaṁ …
jivhāyatanaṁ …
kāyāyatanaṁ …
rūpāyatanaṁ …
saddāyatanaṁ …
gandhāyatanaṁ …
rasāyatanaṁ …
phoṭṭhabbāyatanaṁ …
pathavīdhātu …
āpodhātu …
tejodhātu …pe…
vāyodhātu asuci assu lohitaṁ sedo kusalopi akusalopīti?
Na hevaṁ vattabbe …pe….
Kāyo rūpaṁ, kāyakammaṁ rūpanti?
Āmantā.
Mano rūpaṁ, manokammaṁ rūpanti?
Na hevaṁ vattabbe …pe…
mano arūpaṁ, manokammaṁ arūpanti?
Āmantā.
Kāyo arūpaṁ, kāyakammaṁ arūpanti?
Na hevaṁ vattabbe …pe….
Kāyo rūpanti, kāyakammaṁ rūpanti?
Āmantā.
Cakkhāyatanaṁ rūpanti, cakkhuviññāṇaṁ rūpanti?
Na hevaṁ vattabbe …pe…
kāyo rūpanti, kāyakammaṁ rūpanti?
Āmantā.
Sotāyatanaṁ rūpanti, sotaviññāṇaṁ rūpanti?
Na hevaṁ vattabbe …pe…
kāyo rūpanti, kāyakammaṁ rūpanti?
Āmantā.
Ghānāyatanaṁ rūpanti, ghānaviññāṇaṁ rūpanti?
Na hevaṁ vattabbe …pe…
kāyo rūpanti, kāyakammaṁ rūpanti?
Āmantā.
Jivhāyatanaṁ rūpanti, jivhāviññāṇaṁ rūpanti?
Na hevaṁ vattabbe …pe…
kāyo rūpanti, kāyakammaṁ rūpanti?
Āmantā.
Kāyāyatanaṁ rūpanti, kāyaviññāṇaṁ rūpanti?
Na hevaṁ vattabbe …pe….
Rūpaṁ kammanti?
Āmantā.
Nanu vuttaṁ bhagavatā—
“cetanāhaṁ, bhikkhave, kammaṁ vadāmi;
cetayitvā kammaṁ karoti kāyena vācāya manasā”ti.
Attheva suttantoti?
Āmantā.
Tena hi na vattabbaṁ—
“rūpaṁ kamman”ti.
Rūpaṁ kammanti?
Āmantā.
Nanu vuttaṁ bhagavatā—
“kāye vā, ānanda, sati kāyasañcetanāhetu uppajjati ajjhattaṁ sukhadukkhaṁ;
vācāya vā, ānanda, sati vacīsañcetanāhetu uppajjati ajjhattaṁ sukhadukkhaṁ;
mane vā, ānanda, sati manosañcetanāhetu uppajjati ajjhattaṁ sukhadukkhan”ti.
Attheva suttantoti?
Āmantā.
Tena hi na vattabbaṁ—
“rūpaṁ kamman”ti.
Rūpaṁ kammanti?
Āmantā.
Nanu vuttaṁ bhagavatā—
“tividhā, bhikkhave, kāyasañcetanā akusalaṁ kāyakammaṁ dukkhudrayaṁ dukkhavipākaṁ;
catubbidhā, bhikkhave, vacīsañcetanā akusalaṁ vacīkammaṁ dukkhudrayaṁ dukkhavipākaṁ;
tividhā, bhikkhave, manosañcetanā akusalaṁ manokammaṁ dukkhudrayaṁ dukkhavipākaṁ;
tividhā, bhikkhave, kāyasañcetanā kusalaṁ kāyakammaṁ sukhudrayaṁ sukhavipākaṁ;