Antarābhavo catuvokārabhavoti?
Na hevaṁ vattabbe …pe….
Atthi antarābhavoti?
Āmantā.
Sabbesaññeva sattānaṁ atthi antarābhavoti?
Na hevaṁ vattabbe …pe…
sabbesaññeva sattānaṁ natthi antarābhavoti?
Āmantā.
Hañci sabbesaññeva sattānaṁ natthi antarābhavo, no ca vata re vattabbe—
“atthi antarābhavo”ti.
Atthi antarābhavoti?
Āmantā.
Ānantariyassa puggalassa atthi antarābhavoti?
Na hevaṁ vattabbe …pe…
ānantariyassa puggalassa natthi antarābhavoti?
Āmantā.
Hañci ānantariyassa puggalassa natthi antarābhavo, no ca vata re vattabbe—
“atthi antarābhavo”ti.
Na ānantariyassa puggalassa atthi antarābhavoti?
Āmantā.
Ānantariyassa puggalassa atthi antarābhavoti?
Na hevaṁ vattabbe …pe…
ānantariyassa puggalassa natthi antarābhavoti?
Āmantā.
Na ānantariyassa puggalassa natthi antarābhavoti?
Na hevaṁ vattabbe …pe…
nirayūpagassa puggalassa …pe…
asaññasattūpagassa puggalassa …pe…
arūpūpagassa puggalassa atthi antarābhavoti?
Na hevaṁ vattabbe …pe…
arūpūpagassa puggalassa natthi antarābhavoti?
Āmantā.
Hañci arūpūpagassa puggalassa natthi antarābhavo, no ca vata re vattabbe—
“atthi antarābhavo”ti.
Na arūpūpagassa puggalassa atthi antarābhavoti?
Āmantā.
Arūpūpagassa puggalassa atthi antarābhavoti?
Na hevaṁ vattabbe …pe…
arūpūpagassa puggalassa natthi antarābhavoti?
Āmantā.
Na arūpūpagassa puggalassa natthi antarābhavoti?
Na hevaṁ vattabbe …pe….
Na vattabbaṁ atthi antarābhavoti?
Āmantā.
Nanu antarāparinibbāyī puggalo atthīti?
Āmantā.
Hañci antarāparinibbāyī puggalo atthi, tena vata re vattabbe—
“atthi antarābhavo”ti.
Antarāparinibbāyī puggalo atthīti katvā atthi antarābhavoti?
Āmantā.
Upahaccaparinibbāyī puggalo atthīti katvā atthi upahaccabhavoti?
Na hevaṁ vattabbe …pe…
antarāparinibbāyī puggalo atthīti katvā atthi antarābhavoti?
Āmantā.
Asaṅkhāraparinibbāyī puggalo …pe…
sasaṅkhāraparinibbāyī puggalo atthīti katvā atthi sasaṅkhārabhavoti?
Na hevaṁ vattabbe …pe….
Antarābhavakathā niṭṭhitā.
Kathāvatthu
Mahāpaṇṇāsaka
Aṭṭhamavagga
Kāmaguṇakathā
Pañceva kāmaguṇā kāmadhātūti?
Āmantā.
Nanu atthi tappaṭisaññutto chandoti?
Āmantā.
Hañci atthi tappaṭisaññutto chando, no ca vata re vattabbe—
“pañceva kāmaguṇā kāmadhātū”ti.
Nanu atthi tappaṭisaññutto rāgo tappaṭisaññutto chando tappaṭisaññutto chandarāgo tappaṭisaññutto saṅkappo tappaṭisaññutto rāgo tappaṭisaññutto saṅkapparāgo tappaṭisaññuttā pīti tappaṭisaññuttaṁ somanassaṁ tappaṭisaññuttaṁ pītisomanassanti?
Āmantā.
Hañci atthi tappaṭisaññuttaṁ pītisomanassaṁ, no ca vata re vattabbe—
“pañceva kāmaguṇā kāmadhātū”ti.
Pañceva kāmaguṇā kāmadhātūti?
Āmantā.
Manussānaṁ cakkhu na kāmadhātūti?
Na hevaṁ vattabbe …pe…
manussānaṁ sotaṁ …pe…
manussānaṁ ghānaṁ …pe…
manussānaṁ jivhā …pe…
manussānaṁ kāyo …pe…
manussānaṁ mano na kāmadhātūti?
Na hevaṁ vattabbe …pe….
Manussānaṁ mano na kāmadhātūti?
Āmantā.
Nanu vuttaṁ bhagavatā—
“Pañca kāmaguṇā loke,
manocchaṭṭhā paveditā;
Ettha chandaṁ virājetvā,
evaṁ dukkhā pamuccatī”ti.
Attheva suttantoti?
Āmantā.
Tena hi na vattabbaṁ—
“manussānaṁ mano na kāmadhātū”ti.
Pañceva kāmaguṇā kāmadhātūti?
Āmantā.
Kāmaguṇā bhavo gati sattāvāso saṁsāro yoni viññāṇaṭṭhiti attabhāvapaṭilābhoti?
Na hevaṁ vattabbe …pe…
atthi kāmaguṇūpagaṁ kammanti?
Na hevaṁ vattabbe …pe…
atthi kāmaguṇūpagā sattāti?