Etañhi maggaṁ diviyaṁ vadanti,
Etena hi gacchati devalokan”ti.
Attheva suttantoti?
Āmantā.
Tena hi cetasiko dhammo dānanti.
Na vattabbaṁ—
“cetasiko dhammo dānan”ti?
Āmantā.
Nanu vuttaṁ bhagavatā—
“pañcimāni, bhikkhave, dānāni mahādānāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhi.
Katamāni pañca?
Idha, bhikkhave, ariyasāvako pāṇātipātaṁ pahāya pāṇātipātā paṭivirato hoti.
Pāṇātipātā paṭivirato, bhikkhave, ariyasāvako aparimāṇānaṁ sattānaṁ abhayaṁ deti averaṁ deti abyābajjhaṁ deti.
Aparimāṇānaṁ sattānaṁ abhayaṁ datvā averaṁ datvā abyābajjhaṁ datvā aparimāṇassa abhayassa averassa abyābajjhassa bhāgī hoti.
Idaṁ, bhikkhave, paṭhamaṁ dānaṁ mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkiyati na saṅkiyissati, appaṭikuṭṭhaṁ samaṇehi brāhmaṇehi viññūhi.
Puna caparaṁ, bhikkhave, ariyasāvako adinnādānaṁ pahāya …pe…
kāmesumicchācāraṁ pahāya …pe…
musāvādaṁ pahāya …pe…
surāmerayamajjapamādaṭṭhānaṁ pahāya surāmerayamajjapamādaṭṭhānā paṭivirato hoti.
Surāmerayamajjapamādaṭṭhānā paṭivirato, bhikkhave, ariyasāvako aparimāṇānaṁ sattānaṁ abhayaṁ deti averaṁ deti abyābajjhaṁ deti.
Aparimāṇānaṁ sattānaṁ abhayaṁ datvā averaṁ datvā abyābajjhaṁ datvā aparimāṇassa abhayassa averassa abyābajjhassa bhāgī hoti.
Idaṁ, bhikkhave, pañcamaṁ dānaṁ mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkiyati na saṅkiyissati, appaṭikuṭṭhaṁ samaṇehi brāhmaṇehi viññūhi.
Imāni kho, bhikkhave, pañca dānāni mahādānāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhī”ti.
Attheva suttantoti?
Āmantā.
Tena hi cetasiko dhammo dānanti.
Na vattabbaṁ—
“deyyadhammo dānan”ti?
Āmantā.
Nanu vuttaṁ bhagavatā—
“idhekacco annaṁ deti, pānaṁ deti, vatthaṁ deti, yānaṁ deti, mālaṁ deti, gandhaṁ deti, vilepanaṁ deti, seyyaṁ deti, āvasathaṁ deti, padīpeyyaṁ detī”ti.
Attheva suttantoti?
Āmantā.
Tena hi deyyadhammo dānanti.
Deyyadhammo dānanti?
Āmantā.
Deyyadhammo iṭṭhaphalo kantaphalo manuññaphalo asecanakaphalo sukhudrayo sukhavipākoti?
Na hevaṁ vattabbe …pe…
dānaṁ iṭṭhaphalaṁ vuttaṁ bhagavatā, cīvaraṁ dānanti?
Āmantā.
Cīvaraṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?
Na hevaṁ vattabbe …pe…
dānaṁ iṭṭhaphalaṁ vuttaṁ bhagavatā, piṇḍapāto dānaṁ …
senāsanaṁ dānaṁ …
gilānapaccayabhesajjaparikkhāro dānanti?
Āmantā.
Gilānapaccayabhesajjaparikkhāro iṭṭhaphalo kantaphalo manuññaphalo asecanakaphalo sukhudrayo sukhavipākoti?
Na hevaṁ vattabbe …pe…
tena hi na vattabbaṁ—
“deyyadhammo dānan”ti.
Dānakathā niṭṭhitā.
Kathāvatthu
Mahāpaṇṇāsaka
Sattamavagga
Paribhogamayapuññakathā
Paribhogamayaṁ puññaṁ vaḍḍhatīti?
Āmantā.
Paribhogamayo phasso vaḍḍhati, vedanā vaḍḍhati, saññā vaḍḍhati, cetanā vaḍḍhati, cittaṁ vaḍḍhati, saddhā vaḍḍhati, vīriyaṁ vaḍḍhati, sati vaḍḍhati, samādhi vaḍḍhati, paññā vaḍḍhatīti?
Na hevaṁ vattabbe …pe….
Paribhogamayaṁ puññaṁ vaḍḍhatīti?
Āmantā.
Latā viya vaḍḍhati, māluvā viya vaḍḍhati, rukkho viya vaḍḍhati, tiṇaṁ viya vaḍḍhati, muñjapuñjo viya vaḍḍhatīti?
Na hevaṁ vattabbe …pe….
Paribhogamayaṁ puññaṁ vaḍḍhatīti?
Āmantā.
Dāyako dānaṁ datvā na samannāharati, hoti puññanti?
Āmantā.
Anāvaṭṭentassa hoti …
anābhogassa hoti …
asamannāharantassa hoti …
amanasikarontassa hoti …
acetayantassa hoti …
apatthayantassa hoti … appaṇidahantassa hotīti?
Na hevaṁ vattabbe …pe…
nanu āvaṭṭentassa hoti …
ābhogassa hoti …
samannāharantassa hoti …
manasikarontassa hoti …
cetayantassa hoti …
patthayantassa hoti … paṇidahantassa hotīti?
Āmantā.
Hañci āvaṭṭentassa hoti …
ābhogassa hoti …
samannāharantassa hoti …
manasikarontassa hoti …
cetayantassa hoti …
patthayantassa hoti … paṇidahantassa hoti, no ca vata re vattabbe—
“paribhogamayaṁ puññaṁ vaḍḍhatī”ti.
Paribhogamayaṁ puññaṁ vaḍḍhatīti?
Āmantā.
Dāyako dānaṁ datvā kāmavitakkaṁ vitakketi, byāpādavitakkaṁ vitakketi, vihiṁsāvitakkaṁ vitakketi, hoti puññanti?
Āmantā.
Dvinnaṁ phassānaṁ …pe…
dvinnaṁ cittānaṁ samodhānaṁ hotīti?
Na hevaṁ vattabbe …pe…
dvinnaṁ phassānaṁ …pe…
dvinnaṁ cittānaṁ samodhānaṁ hotīti?
Āmantā.
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti?
Na hevaṁ vattabbe …pe…