5. ස පු: ද්වින්නං චිත්තානං සමොධානං හොතී’ති.
ප. පටිඤ්ඤා: ආමන්තා.
ස. අනු: කුසලාකුසලා සාවජ්ජානවජ්ජා හීනප්පණීතා{1} කණ්හසුක්කසප්පටිභාගා ධම්මා සම්මුඛීභාවං ආගච්ඡන්ති’ති.
ප. පටි: න හෙවං වත්තබ්බෙ -පෙ-
6. ස. පු කුසලාකුසලා සාවජ්ජානවජ්ජා හීනප්පණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “චත්තාරි’මානි භික්ඛවෙ සුවිදූරවිදූරානි. කතමානි චත්තාරි: නභඤ්ච භික්ඛවෙ පඨවී ච, ඉදං පඨමං සුවිදූරදූරං. ඔරිමඤ්ච භික්ඛවෙ තීරං සුමද්දස්ස පාරිමං තීරං, ඉදං දුතියං සුවිදූරවිදූරං. යතො ච භික්ඛවෙ වෙරොචනො අබ්භුදෙති, යත්ථ ච අත්ථමෙති, ඉදං තතියං සුවිදූරවිදූරං. සතඤ්ච භික්ඛවෙ ධම්මො,{2} අසතඤ්ච ධම්මො,2 ඉදං චතුත්ථං සුවිදූරවිදූරානී’ති. ඉමානි ඛො භික්ඛවෙ චත්තාරි සුවිදූරවිදූරානී’ති.
නභඤ්ච දූරෙ පඨවී ච දූරෙ පාරං සමුද්දස්ස තදාහු දූරෙ, යතො ච වෙරොචනො අබ්භුදෙති පභඞ්කරො යත්ථ ච අත්ථමෙති,
තතො හවෙ{1} දූරතරං වදන්ති සතඤ්ච ධම්මං අසතඤ්ච ධම්මං. අබ්යායිකො හොති සතං සමාගමො යාවම්පි තිට්ඨෙය්ය තථෙ’ව හොති, ඛිප්පං හි වෙති{2} අසතං සමාගමො තස්මා සතං ධම්මො අසබ්භි ආරකා’ති.{a}
අත්ථෙව සුත්තන්තොති.
ස. පටිඤ්ඤා: ආමන්තා.
ස. නිග: තෙන හි න වත්තබ්බං: කුසලාකුසලා සාවජ්ජානවජ්ජා හීනප්පණීතා කණ්හසුක්කසප්පටිභාගා ධම්මා සම්මුඛීභාවං ආගච්ඡන්තී’ති.
7. ප. පු: න වත්තබ්බං ‘පරිභොගමයං සුඤ්ඤං වඩ්ඪතී’ති.
ස. පටිඤ්ඤා: ආමන්තා.
ප. අනු: නනු වුත්තං භගවතා.
“ආරාමරොපා{3} වනරොපා යෙ ජනා සෙතුකාරකා, පපඤ්ච උදපානඤ්ච යෙ දදන්ති උපස්සයං,
තෙසං දිවා ච රත්තො ච සදා පුඤ්ඤං පවඩ්ඪති, ධම්මට්ඨා සීලසම්පන්නා තෙ ජනා සග්ගගාමිනො’ති.{b}
අත්ථෙ’ව සුත්තන්තො’ති.
ස. පටිඤ්ඤා: ආමන්තා.
ප. නිග: තෙන හි පරිභොගමයං පුඤ්ඤං වඩ්ඪතී’ති.
8. ප. පු: න වත්තබ්බං ‘පරිභොගමයං පුඤ්ඤං වඩ්ඪතී’ති.
ස. පටිඤ්ඤා: ආමන්තා.
ප. අනු: නනු වුත්තං භගවතා “චත්තාරො මෙ භික්ඛවෙ පුඤ්ඤාභිසන්දා කුසලාභිසන්දා සුඛස්සාහාරා සොවග්ගිකා සුඛවිපාකා සග්ගසංවත්තනිකා ඉට්ඨාය කන්තාය මනාපාය හිතාය සුඛාය සංවත්තන්ති. කතමෙ චත්තාරො:
යස්ස භික්ඛවෙ භික්ඛු චීවරං පරිභුඤ්ජමානො අප්පමාණං චෙතො සමාධිං උපසම්පජ්ජ විහරති, අප්පමාණො තස්ස පුඤ්ඤාභිසන්දො කුසලාභිසන්දො සුඛස්සාහාරො සොවග්ගිකො සුඛවිපාකො සග්ගසංවත්තනිකො ඉට්ඨාය කන්තාය මනාපාය හිතාය සුඛාය සංවත්තති. යස්ස භික්ඛවෙ භික්ඛු පිණ්ඩපාතං පරිභුඤ්ජමානො -පෙ- සෙනාසනං පරිභුඤ්ජමානො -පෙ- ගිලානපච්චයභෙසජ්ජපරික්ඛාරං පරිභුඤ්ජමානො අප්පමාණං චෙතොසමාධිං උපසම්පජ්ජ විහරති, අප්පමාණො තස්ස පුඤ්ඤාභිසන්දො කුසලාභිසන්දො සුඛස්සාහාරො සොවග්ගිකො සුඛවිපාකො සග්ගසංවත්තනිකො ඉට්ඨාය කන්තාය මනාපාය හිතාය සුඛාය සංවත්තති. ඉමෙ ඛො භික්ඛවෙ චත්තාරො පුඤ්ඤාභිසන්දා කුසලාභිසන්දා සුඛස්සාහාරා සොවග්ගිකා සුඛවිපාකා සග්ගසංවත්තනිකා ඉට්ඨාය කන්තාය මනාපාය හිතාය සුඛාය සංවත්තන්තී”ති{a} අත්ථෙ’ව සුත්තන්තො’ති.
ස. පටිඤ්ඤා: ආමන්තා.
ප. නිග: තෙන හි පරිභොගමයං සුඤ්ඤං වඩ්ඪතී’ති.
9. ස. පු: පරිභොගමයං සුඤ්ඤං වඩ්ඪතී’ති.
ප. පටිඤ්ඤා: ආමන්තා.
ස. අනු: දායකො දානං දෙති, පටිග්ගාහකො පටිග්ගහෙත්වා න පරිභුඤ්ජති ඡඩ්ඩෙති විස්සජ්ජෙති. හොති පුඤ්ඤන්ති.
ප. පටිඤ්ඤා: ආමන්තා.
අනු. ඨ: හඤ්චි දායකො දානං දෙති, පටිග්ගාහකො පටිග්ගහෙත්වා න පරිභුඤ්ජති ජඩ්ඪෙති විස්සජ්ජෙති. හොති පුඤ්ඤං,
අනු. පා: නො ච වත රෙ වත්තබ්බෙ ‘පරිභොගමයං පුඤ්ඤං වඩ්ඩතී’ති.
10. ස. පු: පරිභොගමයං පුඤ්ඤං වඩ්ඪතී’ති.
ප. පටිඤ්ඤා: ආමන්තා.
ස. අනු: දායකො දානං දෙති, පටිග්ගාහකෙ පටිග්ගහිතෙ රාජානො වා හරන්ති, චොරා වා හරන්ති, අග්ගි වා දහති, උදකං වා වහති, අප්පියා වා දායාදා හරන්ති. හොති පුඤ්ඤන්ති.
ප. පටිඤ්ඤා: ආමන්තා.
අනු. ඨ: හඤ්චි දායකො දානං දෙති, පටිග්ගාහකෙ පටිග්ගහිතෙ රාජානො වා හරන්ති, චොරා වා හරන්ති, අග්ගි වා දහති, උදකං වා වහති, අප්පියා ව දායාදා හරන්ති, හොති පුඤ්ඤං,
අනු. පා: නො ච වත රෙ වත්තබ්බෙ ‘පරිභොගමයං පුඤ්ඤං වඩ්ඩතී’ති.
පරිභොගමයපුඤ්ඤකථා නිට්ඨිතා.
7. 6.
ඉතොදින්නකථා.
1. ඉතො දින්නෙන තත්ථ යාපෙන්තී’ති.
ප. පටිඤ්ඤා: ආමන්තා.
ස. අනු: ඉතො චීවරං දෙන්ති, තං චීවරං තත්ථ පරිභුඤ්ජන්තී”ති.
ප. පටි: න හෙවං වත්තබ්බෙ -පෙ-
ස. අනු: ඉතො පිණ්ඩපාතං දෙන්ති -පෙ- ඉතො සෙනාසනං දෙන්ති -පෙ- ඉතො ගිලානපච්චයභෙසජ්ජපරික්ඛාරං දෙන්ති -පෙ- ඉතො ඛාදනීයං දෙන්ති -පෙ- ඉතො පානීයං දෙන්ති, තං පානීයං තත්ථ පරිභුඤ්ජන්තී’ති.
ප. පටි: න හෙවං වත්තබ්බෙ -පෙ-
2. ඉතො දින්නෙන තත්ථ යාපෙන්තී’ති.
ප. පටිඤ්ඤා: ආමන්තා.
ස. අනු: අඤ්ඤො අඤ්ඤස්ස කාරකො, පරකතං සුඛදුක්ඛං, අඤ්ඤො කරොති, අඤ්ඤො පටිසංවෙදෙතී’ති.
ප. පටි: න හෙවං වත්තබ්බෙ -පෙ-
3. ප. පු: න වත්තබ්බං ඉතො දින්නෙන තත්ථ යාපෙන්ති’ති.
ස. පටිඤ්ඤා: ආමන්තා.
ප. අනු: නනු පෙතා අත්තනො අත්ථාය දානං දෙන්තං අනුමොදෙන්ති, චිත්තං පසාදෙන්ති, පීතිං උප්පාදෙන්ති, සොමනස්සං පටිලභන්තී’ති.
ස. පටිඤ්ඤා: ආමන්තා.
අනු. ඨ: හඤ්චි පෙතා අත්තනො අත්ථාය දානං දෙන්තං අනුමොදෙන්ති, චිත්තං පසාදෙන්ති, පීතිං උප්පාදෙන්ති, සොමනස්සං පටිලභන්ති,
අනු. පා: තෙන වත රෙ වත්තබ්බෙ ‘ඉතො දින්නෙන තත්ථ යාපෙන්ති’ති.
4. ප. පු: න වත්තබ්බං ‘ඉතො දින්නෙන තත්ථ යාපෙන්තී’ති.
ස. පටිඤ්ඤා: ආමන්තා.
ප. අනු: නනු වුත්තං භගවතා:
“උන්නමෙ උදකං වුට්ඨං යථා නින්නං පවත්තති එවමෙව ඉතො දින්නං පෙතානං උපකප්පති.
යථා වාරිවහා පූරා පරිපූරෙන්ති සාගරං එවමෙව ඉතො දින්නං පෙතානං උපකප්පති.
න හි තත්ථ කසී අත්ථී ගොරක්ඛෙත්ථ න විජ්ජති වණිජ්ජා තාදිසී නත්ථී හිරඤ්ඤෙන කයාකයං{1} ඉතො දින්නෙන යාපෙන්ති පෙතා කාලකතා{2}තහි”න්ති.{a}
අත්ථෙ’ව සුත්තන්තො’ති.
ස. පටිඤ්ඤා: ආමන්තා.
ප. නිග: තෙන හි ‘ඉතො දින්නෙන තත්ථ යාපෙන්තී’ති.
5. ප. පු: න වත්තබ්බං ‘ඉතො දින්නෙන තත්ථ යාපෙන්තී’ති.
ස. පටිඤ්ඤා: ආමන්තා.
ප. අනු: නනු වුත්තං භගවතා “පඤ්චිමානි භික්ඛවෙ ඨානානි සම්පස්සන්තා මාතාපිතරො පුත්තං ඉච්ඡන්ති කුලෙ ජායමානං. කතමානි පඤ්ච: භතො වා නො භරිස්සති, කිච්චං වා නො කරිස්සති, කුලවංසො චිරං ඨස්සති, දායජ්ජං{3} පටිපජ්ජිස්සති,{4} අථවා පන පෙතානං කාලකතානං දක්ඛිණං අනුප්පදස්සති. ඉමානි ඛො භික්ඛවෙ පඤ්චඨානානි සම්පස්සන්තා මාතාපිතරො පුත්තං ඉච්ඡන්ති කුලෙ ජායමානන්ති.
පඤ්චඨානානිසම්පස්සං පුත්තං ඉච්ඡන්ති පණ්ඩිතා භතො වා නො භරිස්සති කිච්චං වා නො කරිස්සති.
කුලවංසො චිරං තිට්ඨෙ දායජ්ජං පටිපජ්ජිස්සති අථවා පන පෙතානං දක්ඛිණානුප්පදස්සති{1}
ඨානානෙතානි සම්පස්සං පුත්තං ඉච්ඡන්ති පණ්ඩිතා තස්මා සන්තො සප්පුරිසා කතඤ්ඤූ කතවෙදිනො
භරන්ති මාතාපිතරො පුබ්බෙකතතමනුස්සරං{2} කරොන්ති තෙසං කිච්චානි යථා තං පුබ්බකාරිනං
ඔවාදකාරී භතපොසී කුලවංසං අහාපයං සද්ධො සීලෙන සම්පන්නො පුත්තො හොති පසංසියො’ති.{a}
අත්ථෙ’ව සුත්තන්තොති.
ස. පටිඤ්ඤා: ආමන්තා.
ප. නිග: තෙන හි ‘ඉතො දින්නෙන තත්ථ යාපෙන්තී’ති.
ඉතො දින්නකථා නිට්ඨිතා.
7. 7.
පඨවී කම්මවිපාකොතිකථා.
1. ස. පු: පඨවී කම්මවිපාකො’ති.
ප. පටිඤ්ඤා: ආමන්තා.
ස. අනු: සුඛවෙදනියා, දුක්ඛවෙදනියා, අදුක්ඛමසුඛවෙදනියා, සුඛාය වෙදනාය සම්පයුත්තා, දුක්ඛාය වෙදනාය සම්පයුත්තා, අදුක්ඛමසුඛාය වෙදනාය සම්පයුත්තා, ඵස්සෙන සම්පයුත්තා, වෙදනාය සම්පයුත්තා, සඤ්ඤාය සම්පයුත්තා, චෙතනාය සම්පයුත්තා, චිත්තෙන සම්පයුත්තා, සාරම්මණා, අත්ථී තාය ආවට්ටනා ආභොගො සමන්නාහාරො මනසිකාරො චෙතනා පත්ථනා පණිධී’ති.
ප. පටි: න හෙවං වත්තබ්බෙ -පෙ-
ස. අනු: නනු න සුඛවෙදනියා, න දුක්ඛවෙදනියා, න අදුක්ඛමසුඛවෙදනියා, න සුඛාය වෙදනාය සම්පයුත්තා, න දුක්ඛාය වෙදනාය සම්පයුත්තා, න අදුක්ඛමසුඛාය වෙදනාය සම්පයුත්තා, න ඵස්සෙන සම්පයුත්තා, න වෙදනාය සම්පයුත්තා, න සඤ්ඤාය සම්පයුත්තා, න චෙතනාය සම්පයුත්තා, න චිත්තෙන සම්පයුත්තා, අනාරම්මණා, නත්ථී තාය අවට්ටනා ආභොගො සමන්නාහාරො මනසිකාරො චෙතනා පත්ථනා පණිධී’ති.
ප. පටිඤ්ඤා: ආමන්තා.
අනු. ඨ: හඤ්චි න සුඛවෙදනියා න දුක්ඛවෙදනියා -පෙ- අනාරම්මණා, නත්ථී තාය ආවට්ටනා -පෙ- පණිධී,
අනු. පා: නො ච වත රෙ වත්තබ්බෙ: ‘පඨවී කම්මවිපාකොති.’
2. ස. පු: ඵස්සො කම්මවිපාකො. ඵස්සො සුඛවෙදනියො දුක්ඛවෙදනියො අදුක්ඛමසුඛවෙදනියො, සුඛාය වෙදනාය සම්පයුත්තො, දුක්ඛාය -පෙ- අදුක්ඛමසුඛාය වෙදනාය සම්පයුත්තො, ඵස්සෙන සම්පයුත්තො, වෙදනාය සම්පයුත්තො, සඤ්ඤාය සම්පයුත්තො, චෙතනාය සම්පයුත්තො, චිත්තෙන සම්පයුත්තො සාරම්මණො{1}, අත්ථී තස්ස ආවට්ටනා -පෙ- පණිධී’ති.
ප. පටිඤ්ඤා: ආමන්තා.
ස. අනු: පඨවී කම්මවිපාකො. පඨවී සුඛවෙදනියා දුක්ඛවෙදනියා අදුක්ඛමසුඛවෙදනියා, සුඛාය වෙදනාය සම්පයුත්තා, දුක්ඛාය වෙදනාය සම්පයුත්තා, අදුක්ඛමසුඛාය වෙදනාය සම්පයුත්තා, ඵස්සෙන සම්පයුත්තා, වෙදනාය සම්පයුත්තා, සඤ්ඤාය සම්පයුත්තා, චෙතනාය සම්පයුත්තා, චිත්තෙන සම්පයුත්තා, සාරම්මණා. අත්ථී තාය ආවට්ටනා ආභොගො සමන්නාහාරො මනසිකාරො චෙතනා පත්ථනා පණිධී’ති.
ප. පටි: න හෙවං වත්තබ්බෙ -පෙ-
3. ස. පු: පඨවී කම්මවිපාකො, පඨවී න සුඛවෙදනියා, න දුක්ඛවෙදනියා -පෙ- අනාරම්මණා, නත්ථී තාය ආවට්ටනා -පෙ- පණිධී’ති.
ස. පටිඤ්ඤා: ආමන්තා.
ස. අනු: ඵස්සො කම්මවිපාකො, ඵස්සො න සුඛවෙදනියො, න දුක්ඛවෙදනියො -පෙ- අනාරම්මණො, නත්ථී තස්ස ආවට්ටනා -පෙ- පණිධී’ති.
ප. පටි: න හෙවං වත්තබ්බෙ -පෙ-
4. ස. පු: පඨවී කම්මවිපාකො’ති.
ප. පටිඤ්ඤා: ආමන්තා.
ස. අනු: පඨවී පග්ගහනිග්ගහූපගා ඡෙදනභෙදනූපගා’ති.
ප. පටිඤ්ඤා: ආමන්තා.