5. ස. පු: නත්ථී චෙතසිකො ධම්මො’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා:
“චිත්තං හිදං චෙතසිකා ච ධම්මා අනත්තතො සංවිදිතස්ස හොන්ති. හීනප්පණීතං තදුභයෙ විදිත්වා සම්මද්දසො වෙදි පලොකධම්මන්ති”
අත්ථෙ’ව සුත්තන්තො’ති.
ප. පටිඤ්ඤා: ආමන්තා.
ස. නිග: තෙන හි අත්ථී ‘චෙතසිකො ධම්මො’ති.
6. ස. පු: නත්ථී චෙතසිකො ධම්මො’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “ඉධ කෙවට්ට භික්ඛු පරසත්තානං පරපුග්ගලානං චිත්තම්පි ආදිසති, චෙතසිකම්පි ආදිසති, විතක්කිතම්පි ආදිසති, විචාරිතම්පි{3} ආදිසති: එවම්පි තෙ මනො. ඉත්ථම්පි තෙ මනො. ඉතිපි තෙ චිත්ත’න්ති”{a} අත්ථෙ’ව සුත්තන්තො’ති.
ප. පටිඤ්ඤා: ආමන්තා.
ස. නිග: තෙන හි ‘අත්ථී චෙතසිකො ධම්මො’ති.
චෙතසිකකථා නිට්ඨිතා.
7. 4.
දානකථා.
1. ස. පු: චෙතසිකො ධම්මො දානන්ති.
ප. පටිඤ්ඤා: ආමන්තා.
ස. අනු: ලබ්භා චෙතසිකො ධම්මො පරෙසං දාතුන්ති.
ප. පටි: න හෙවං වත්තබ්බෙ -පෙ-
ස. පු: ලබ්භා චෙතසිකො ධම්මො පරෙසං දාතුන්ති.
ප. පටිඤ්ඤා: ආමන්තා.
ස. අනු: ලබ්භා ඵස්සො පරෙසං දාතුන්ති.
ප පටි: න හෙවං වත්තබ්බෙ -පෙ-
ස. අනු: ලබ්භා වෙදනා -පෙ- සඤ්ඤා - චෙතනා - සද්ධා - විරියං - සති - සමාධි -පෙ- පඤ්ඤා පරෙසං දාතුන්ති.
ප. පටි: න හෙවං වත්තබ්බෙ -පෙ-
2. ප. පු: න වත්තබ්බං: චෙතසිකො ධම්මො දාන’න්ති.
ස. පටිඤ්ඤා: ආමන්තා.
ප. අනු: දානං අනිට්ඨඵලං අකන්තඵලං අමනුඤ්ඤඵලං සෙචනකඵලං දුක්ඛුද්රයං දුක්ඛවිපාකන්ති.
ස. පටි: න හෙවං වත්තබ්බෙ{2} -පෙ-
ප. අනු: නනු දානං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං{3} සුඛවිපාකන්ති.
ස. පටිඤ්ඤා: ආමන්තා.
අනු. ඨ: හඤ්චි දානං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං{3} සුඛවිපාකං,
අනු. පා: තෙන වත රෙ වත්තබ්බෙ: ‘චෙතසිකො ධම්මො දාන’න්ති.
3. ස. පු: දානං ඉට්ඨඵලං වුත්තං භගවතා. චීවරං දානන්ති.
ස. පටිඤ්ඤා: ආමන්තා.
ප. අනු: චීවරං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං සුඛවිපාකන්ති.
ස. පටි: න හෙවං වත්තබ්බෙ -පෙ-
ප. පු: දානං ඉට්ඨඵලං වුත්තං භගවතා. පිණ්ඩපාතො -පෙ- සෙනාසනං{1} -පෙ- ගිලානපච්චයභෙසජ්ජපරික්ඛාරො දානන්ති.
ප. පටිඤ්ඤා: ආමන්තා.
ප. අනු: ගිලානපච්චයභෙසජ්ජපරික්ඛාරො ඉට්ඨඵලො කන්තඵලො මනුඤ්ඤඵලො අසෙචනකඵලො සුඛුද්රයො{2} සුඛවිපාකො’ති.
ස පටි: න හෙවං වත්තබ්බෙ -පෙ-
4. ප. පු: න වත්තබ්බං ‘චෙතසිකො ධම්මො දාන’න්ති.
ස. පටිඤ්ඤා: ආමන්තා.
ප. අනු: නනු වුත්තං භගවතා:
“සද්ධා හිරියං කුසලං ච දානං ධම්මා එතෙ සප්පුරිසානුයාතා, එතං හි දානං දිබ්බං වදන්ති එතෙන හි ගච්ඡති දෙවලොකන්ති”
අත්ථෙ’ව සුත්තන්තො’ති.
ස. පටිඤ්ඤා: ආමන්තා.
ප. නිග: තෙන හි ‘චෙතසිකො ධම්මො දාන’න්ති.
5. ප. පු: න වත්තබ්බං: චෙතසිකො ධම්මො දාන’න්ති.
ස. පටිඤ්ඤා: ආමන්තා.
ප. අනු: නනු වුත්තං භගවතා: “පඤ්චිමානි භික්ඛවෙ දානානි මහාදානානි අග්ගඤ්ඤානි රත්තඤ්ඤානි වංසඤ්ඤානි පොරාණානි අසංකිණ්ණානි අසංකිණ්ණපුබ්බානි න සඞ්කීයන්ති න සඞ්කීයිස්සන්ති අප්පතිකුට්ඨානි{3} සමණෙහි බ්රාහ්මණෙහි විඤ්ඤූහි. කතමානි පඤ්ච:
ඉධ භික්ඛවෙ අරියසාවකො පාණාතිපාතං පහාය පාණාතිපාතා පටිවිරතො හොති. පාණාතිපාතා පටිවිරතො භික්ඛවෙ අරියසාවකො අපරිමාණානං සත්තානං අභයං දෙති, අවෙරං දෙති, අබ්යාපජ්ඣං දෙති. අපරිමාණානං සත්තානං අභයං දත්වා අවෙරං දත්වා අබ්යාපජ්ඣං දත්වා අපරිමාණස්ස අභයස්ස අවෙරස්ස අබ්යාපජ්ඣස්ස භාගී හොති. ඉදං භික්ඛවෙ පඨමං දානං මහාදානං අග්ගඤ්ඤං රත්තඤ්ඤං වංසඤ්ඤං පොරාණං අසංකිණ්ණං අසංකිණ්ණපුබ්බං න සඞ්කීයති න සඞ්කීයිස්සති, අප්පතිකුට්ඨං සමණෙහි බ්රාහ්මණෙහි විඤ්ඤූහි.
පුන චපරං භික්ඛවෙ අරියසාවකො අදින්නාදානං පහාය -පෙ- කාමෙසු මිච්ඡාචාරං පහාය -පෙ- මුසාවාදං පහාය -පෙ- සුරාමෙරයමජ්ජපමාදට්ඨානං පහාය සුරාමෙරයමජ්ජපමාදට්ඨානා පටිවිරතො හොති. සුරාමෙරයමජ්ජපමාදට්ඨානා පටිවිරතො භික්ඛවෙ අරියසාවකො අපරිමාණානං සත්තානං අභයං දෙති, අවෙරං දෙති, අබ්යාපජ්ඣං දෙති. අපරිමාණානං සත්තානා අභයං දත්වා අවෙරං දත්වා අබ්යාපජ්ඣං දත්වා අපරිමාණස්ස අභයස්ස අවෙරස්ස අබ්යාපජ්ඣස්ස භාගී හොති. ඉදං භික්ඛවෙ පඤ්චමං දානං මහාදානං අග්ගඤ්ඤං රත්තඤ්ඤං වංසඤ්ඤං පොරාණං අසංකිණ්ණං අසංකිණ්ණපුබ්බං න සංකීයති සංකීයිස්සති, අප්පතිකුට්ඨං{1} සමණෙහි බ්රාහ්මණෙහි විඤ්ඤූහි ඉමානි ඛො භික්ඛවෙ පඤ්ච දානානි මහාදානානි අග්ගඤ්ඤානි රත්තඤ්ඤානි වංසඤ්ඤානි පොරාණානි අසංකිණ්ණානි අසංකිණ්ණපුබ්බානි න සඞ්කීයන්ති න සඞ්කීයිස්සන්ති, අප්පතිකුට්ඨානි සමණෙහි බ්රාහ්මණෙහි විඤ්ඤූහී”ති.{a} අත්ථෙ’ව සුත්තන්තො’ති.
ස. පටිඤ්ඤා: ආමන්තා.
ප. නිග: තෙන හි ‘චෙතසිකො ධම්මො දාන’න්ති.
6. ස. පු: න වත්තබ්බං: දෙය්යධම්මො දාන’න්ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “ඉධෙකච්චො අන්නං දෙති, පානං දෙති, වත්ථං දෙති, යානං දෙති, මාලං දෙති, ගන්ධං දෙති, විලෙපනං දෙති, සෙය්යං දෙති, ආවසථං දෙති, පදීපෙය්යං දෙතී”ති. අත්ථෙ’ව සුත්තන්තො’ති.
ප. පටිඤ්ඤා: ආමන්තා.
ස. නිග: තෙන හි ‘දෙය්යධම්මො දාන’න්ති.
7. ප. පු: දෙය්යධම්මො දාන’න්ති.
ස. පටිඤ්ඤා: ආමන්තා.
ප. අනු: දෙය්යධම්මො ඉට්ඨඵලො කන්තඵලො මනුඤ්ඤඵලො අසෙචනකඵලො සුඛුද්රයො සුඛවිපාකො’ති.
ස. පටි: න හෙවං වත්තබ්බෙ -පෙ-
8. ස. පු: දානං ඉට්ඨඵලං වුත්තං භගවතා: චීවරං දානන්ති.
ස. පටිඤ්ඤා: ආමන්තා.
ප. අනු: චීවරං ඉට්ඨඵලං කන්තඵලං මනුඤ්ඤඵලං අසෙචනකඵලං සුඛුද්රයං{1} සුඛවිපාකන්ති.
ස. පටි: න හෙවං වත්තබ්බෙ -පෙ-
9. ස. පු: දානං ඉට්ඨඵලං වුත්තං භගවතා: පිණ්ඩපාතො දානං -පෙ- සෙනාසනං දානං -පෙ- ගිලානපච්චය භෙසජ්ජපරික්ඛාරො දානන්ති.
ස. පටිඤ්ඤා: ආමන්තා.
ප. අනු: ගිලානපච්චයභෙසජ්ජපරික්ඛාරො ඉට්ඨඵලො කන්තඵලො මනුඤ්ඤඵලො අසෙචනකඵලො සුඛුද්රයො{1} සුඛවිපාකො’ති.
ස. පටි: න හෙවං වත්තබ්බෙ -පෙ-
ප. නිග: තෙන හි න වත්තබ්බං: දෙය්යධම්මො දානන්ති.
දානකථා නිට්ඨිතා.
7. 5.
පරිභොගමයපුඤ්ඤකථා.
1. ස. පු: පරිභොගමයං පුඤ්ඤං වඩ්ඪතී’ති.
ප. පටිඤ්ඤා: ආමන්තා.
ස. අනු: පරිභොගමයො ඵස්සො වඩ්ඪති, වෙදනා වඩ්ඪති, සඤ්ඤා වඩ්ඪති, චෙතනා වඩ්ඪති, චිත්තං වඩ්ඪති, සද්ධා වඩ්ඪති, විරියං වඩ්ඪති, සති වඩ්ඪති, සමාධි වඩ්ඪති, පඤ්ඤා වඩ්ඪතී’ති.
ප. පටි: න හෙවං වත්තබ්බෙ -පෙ-
2. ස පු: පරිභොගමයං පුඤ්ඤං වඩ්ඪතී’ති.
ප. පටිඤ්ඤා: ආමන්තා.
ස. අනු: ලතා විය වඩ්ඪති, මාලුවා විය වඩ්ඪති, රුක්ඛො විය වඩ්ඪති, තිණං විය වඩ්ඪති, මුඤ්ජපුඤ්ජො{1} විය වඩ්ඪතී’ති.
ප. පටි: න හෙවං වත්තබ්බෙ -පෙ-
3. ස පු: පරිභොගමයං පුඤ්ඤං වඩ්ඪතී’ති.
ප. පටිඤ්ඤා: ආමන්තා.
ස. අනු: දායකො දාං දත්වා න සමන්නාහරති හොති පුඤ්ඤන්ති.
ප. පටිඤ්ඤා: ආමන්තා.
ස. අනු: අනාවට්ටන්තස්ස{2} හොති, අනාභොගස්ස හොති, අසමන්නාහරන්තස්ස හොති, අමනසිකරොන්තස්ස හොති, අචෙතයන්තස්ස හොති, අපත්ථයන්තස්ස හොති, අපණිදහන්තස්ස හොතීති.
ප. පටි: න හෙවං වත්තබ්බෙ -පෙ-
ස. අනු: නනු ආවට්ටන්තස්ස හොති, ආභොගස්ස හොති සමන්නාහරන්තස්ස හොති, මනසිකරොන්තස්ස හොති, චෙතයන්තස්ස හොති, පත්ථයන්තස්ස හොති, පණිදහන්තස්ස හොතී’ති.
ප. පටිඤ්ඤා: ආමන්තා.
අනු. ඨ: හඤ්චි ආවට්ටන්තස්ස හොති, ආභොගස්ස හොති, සමන්නාහරන්තස්ස හොති, මනසිකරොන්තස්ස හොති, චෙතයන්තස්ස හොති, පත්ථයන්තස්ස හොති, පණිදහන්තස්ස හොති,
අනු පා: නො ච වත රෙ වත්තබ්බෙ ‘පරිභොගමයං වඩ්ඪතී’ති.
4. ස පු: පරිභොගමයං පුඤ්ඤං වඩ්ඪතී’ති.
ප. පටිඤ්ඤා: ආමන්තා.
ස. අනු: දායකො දානං දත්වා කාමවිතක්කං විතක්කෙති, ව්යාපාද විතක්කං විතක්කෙති, විහිංසාවිතක්කං විතක්කෙති. හොති පුඤ්ඤන්ති.
ප. පටිඤ්ඤා: ආමන්තා.
ස. අනු: ද්වින්නං ඵස්සානං -පෙ- ද්වින්නං චිත්තානං සමොධානං හොතී’ති.
ප. පටි: න හෙවං වත්තබ්බෙ -පෙ-