ස. අනු: අනාගාමී පුග්ගලො තත්ථ භාවිතෙන මග්ගෙන තත්ථ ඵලං සච්ඡිකරොතී’ති.
ප. පටි: න හෙවං වත්තබ්බෙ -පෙ-
ස. පු: සකදාගාමී පුග්ගලො ඉධ පරිනිබ්බායී පුග්ගලො ඉධ භාවිතෙන මග්ගෙන ඉධ ඵලං සච්ඡිකරොතී’ති.
ප. පටිඤ්ඤා: ආමන්තා.
ස. අනු: අනාගාමී පුග්ගලො තත්ථ භාවිතෙන මග්ගෙන තත්ථ ඵලං සච්ඡිකරොතී’ති.
ප. පටි: න හෙවං වත්තබ්බෙ -පෙ-
22. ස. පු: ඉධ විහාය නිට්ඨස්ස පුග්ගලස්ස මග්ගො ච භාවීයති, න ච කිලෙසා පහීයන්තී’ති.
ප. පටිඤ්ඤා: ආමන්තා.
ස. අනු: සොතාපත්තිඵලසච්ඡිකිරියාය පටිපන්නස්ස පුග්ගලස්ස මග්ගො ච භාවීයති, න ච කිලෙසා පහීයන්තී’ති.
ප. පටි: න හෙවං වත්තබ්බෙ -පෙ-
23. ස. පු: ඉධ විහාය නිට්ඨස්ස පුග්ගලස්ස මග්ගො ච භාවීයති, න ච කිලෙසා පහීයන්තී’ති.
ප. පටිඤ්ඤා: ආමන්තා.
ස. අනු: සකදාගාමිඵලසච්ඡිකිරියාය පටින්නස්ස පුග්ගලස්ස -පෙ- අරහත්තසච්ඡිකිරියාය පටිපන්නස්ස පුග්ගලස්ස මග්ගො ච භාවීයති, න ච කිලෙසා පහීයන්තී’ති.
ප. පටි: න හෙවං වත්තබ්බෙ -පෙ-
24. ස. පු: සොතාපත්තිඵලසච්ඡිකිරියාය පටිපන්නස්ස පුග්ගලස්ස අපුබ්බං අචරිමං මග්ගො ච භාවීයති, කිලෙසා ච පහීයන්තී’ති.
ප. පටිඤ්ඤා: ආමන්තා.
ස. අනු: ඉධ විහාය නිට්ඨස්ස පුග්ගලස්ස අපුබ්බං අචරිමං මග්ගො ච භාවීයති, කිලෙසා ච පහීයන්තී’ති.
ප. පටි: න හෙවං වත්තබ්බෙ -පෙ-
25. ස. පු: සකදාගාමිඵලසච්ඡිකිරියාය පටිපන්නස්ස පුග්ගලස්ස -පෙ- අරහත්තසච්ඡිකිරියාය පටිපන්නස්ස පුග්ගලස්ස අපුබ්බං අචරිමං මග්ගො ච භාවීයති, කිලෙසා ච පහීයන්තී’ති.
ප. පටිඤ්ඤා: ආමන්තා.
ස. අනු: ඉධ විහාය නිට්ඨස්ස පුග්ගලස්ස අපුබ්බං අචරිමං මග්ගො ච භාවීයති, කිලෙසා ච පහීයන්තී’ති.
ප. පටි: න හෙවං වත්තබ්බෙ -පෙ-
26. ස. පු: අනාගාමී පුග්ගලො කතකරණීයො භාවිතභාවනො තචත්ථ උපපජ්ජතී’ති.
ප. පටිඤ්ඤා: ආමන්තා.
ස. අනු: අරහා උපපජ්ජතී’ති.
ප. පටි: න හෙවං වත්තබ්බෙ -පෙ-
27. ස. පු: අරහා උපපජ්ජතී’ති.
ප. පටිඤ්ඤා: ආමන්තා.
ස. අනු: අත්ථි අරහතො පුනබ්භවො’ති.
ප. පටි: න හෙවං වත්තබ්බෙ -පෙ-
28. ස. පු: අත්ථි අරහතො පුනබ්භවො’ති.
ප. පටිඤ්ඤා: ආමන්තා.
ස. අනු: අරහා භවෙන භවං ගච්ඡති, ගතියා ගතිං ගච්ඡති, සංසාරෙන සංසාරං ගච්ඡති, උපපත්තියා උපපත්තිං ගච්ඡතී’ති.
ප. පටි: න හෙවං වත්තබ්බෙ -පෙ-
29. ස. පු: අනාගාමී පුග්ගලො කතකරණීයො භාවිතභාවනො අනොහිතභාරො තත්ථ උපපජ්ජතී’ති.
ප. පටිඤ්ඤා: ආමන්තා.
ස. අනු: භාරොහරණාය පුන මග්ගං භාවෙතී’ති.
ප. පටි: න හෙවං වත්තබ්බෙ -පෙ-
30. ස. පු: අනාගාමී පුග්ගලො කතකරණීයො භාවිතභාවනො අපරිඤ්ඤාතදුක්ඛො අප්පහීනකිලෙසො අසච්ඡිකතනිරොධො අප්පටිවිද්ධාකුප්පො තත්ථ උපපජ්ජතී’ති.
ප. පටිඤ්ඤා: ආමන්තා.
ස. අනු: අකුප්පපටිවෙධාය පුන මග්ගං භාවෙතී’ති.
ප. පටි: න හෙවං වත්තබ්බෙ -පෙ-
31. ස. පු: අනාගාමී පුග්ගලො කතකරණීයො භාවිතභාවනො අනොහිතභාරො{1} තත්ථ උපපජ්ජති, න ච භාරොහරණාය පුන මග්ගං භාවෙතී’ති.
ප. පටිඤ්ඤා: ආමන්තා.
ස. අනු: අනොහිතභාරො{1} ච තත්ථ පරිනිබ්බායතී’ති.
ප. පටි: න හෙවං වත්තබ්බෙ -පෙ-
32. ස. පු: අනාගාමී පුග්ගලො කතකරණීයො භාවිතභාවනො අපරිඤ්ඤාතදුක්ඛො අප්පහීනකිලෙසො අසච්ඡිකතනිරොධො අප්පටිවිද්ධාකුප්පො තත්ථ උපපජ්ජති, න ච අකුප්පපටිවෙධාය පුන මග්ගං භාවෙතී’ති.
ප. පටිඤ්ඤා: ආමන්තා.
ස. අනු: අප්පටිවිද්ධාකුප්පො ච තත්ථ පරිනිබ්බායතී’ති.
ප. පටි: න හෙවං වත්තබ්බෙ -පෙ-
ප. උදාහරණං: යථා මිගො සල්ලෙන විද්ධො දූරම්පි ගන්ත්වා කාලං කරොති, එවමෙවං{2} අනාගාමී පුග්ගලො ඉධ භාවිතෙන මග්ගෙන තත්ථ ඵලං සච්ඡිකරොතීති.
ස. උදා: යථා මිගො සල්ලෙන විද්ධො දූරම්පි ගන්ත්වා සසල්ලො’ච කාලං කරොති, එවමෙවං{2} අනාගාමී පුග්ගලො ඉධ භාවිතෙන මග්ගෙන තත්ථ සසල්ලො’ච පරිනිබ්බායතී’ති.
ප. පටි: න හෙවං වත්තබ්බෙ -පෙ-
බ්රහ්මචරියකථා නිට්ඨිතා.
1. 4.
ඔධිසොකථා
1. ස. පු: ඔධිසො’ධිසො කිලෙසෙ ජහතී’ති.
ප. පටිඤ්ඤා: ආමන්තා.
ස. අනු: සොතාපත්තිඵලසච්ඡිකිරියාය පටිපන්නො පුග්ගලො දුක්ඛදස්සනෙන කිං ජහතී’ති.
ප. වි: සක්කායදිට්ඨිං විචිකිච්ඡං සීලබ්බතපරාමාසං තදෙකට්ඨෙ ච කිලෙසෙ එකදෙසෙ ජහතී’ති.
ස. අනු: එකදෙසං සොතාපන්නො එකදෙසං න සොතාපන්නො එකදෙසං සොතාපත්තිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති. [එකදෙසං] කායෙන ඵුසිත්වා විහරති, එකදෙසං න කායෙන ඵුසිත්වා විහරති. එකදෙසං සත්තක්ඛත්තුපරමො, කොලංකොලො, එකබීජී. [එකදෙසං] බුද්ධෙ අවෙච්චප්පසාදෙන සමන්නාගතො, ධම්මෙ -පෙ- සඞ්ඝෙ -පෙ- අරියකන්තෙහි සීලෙහි සමන්නාගතො, එකදෙසං අරියකන්තෙහි සීලෙහි න සමන්නාගතො’ති.
ප. පටි: න හෙවං වත්තබ්බෙ -පෙ-
2. ස. පු: සමුදයදස්සනෙන කිං ජහතී’ති.
ප. වි: සක්කායදිට්ඨිං ජහති, විචිකිච්ඡං සීලබබතපරමාසං තදෙකට්ඨෙ ව කිලෙසෙ එකදෙසෙ ජහතී’ති.
ස. අනු: එකදෙසං සොතාපන්නො, එකදෙසං න සොතාපන්නො -පෙ- එකදෙසං අරියකන්තෙහි සීලෙහි සමන්නාගතො, එකදෙසං අරියකන්තෙහි සීලෙහි න සමන්නාගතො’ති.
ප. පටි: න හෙවං වත්තබ්බෙ -පෙ-
3. ස. පු: නිරොධදස්සනෙන කිං ජහතී’ති.
ප. වි: විචිකිච්ඡං සීලබ්බතපරාමාසං තදෙකට්ඨෙ ච කිලෙස එකදෙසෙ ජහතී’ති.
ස. අනු: එකදෙසං සොතාපන්නො, එකදෙසං න සොතාපන්නො -පෙ- එකදෙසං අරියකන්තෙහි සීලෙහි සමන්නාගතො, එකදෙසං අරියකන්තෙහි සීලෙහි න සමන්නාගතො’ති.
ප. පටි: න හෙවං වත්තබ්බෙ -පෙ-
4. ස. පු: මග්ගදස්සනෙන කිං ජහතී’ති?
ප. වි: සීලබ්බතපරාමාසං තදෙකට්ඨෙ ච කිලෙස ජහතී’ති.
ස. අනු: එකදෙසං සොතාපන්නො, එකදෙසං න සොතාපන්නො, එකදෙසං සොතාපත්තිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති, කායෙන ඵුසිත්වා විහරති, එකදෙසං න කායෙන ඵුසිත්වා විහරති, එකදෙසංසත්තක්ඛත්තුපරමො, කොලංකොලො, එකබීජී, [එකදෙසං] බුද්ධෙ අවෙච්චප්පසාදෙන සමන්නාගතො, ධම්මෙ -පෙ- සඞ්ඝෙ -පෙ- [එකදෙසං] අරියකන්තෙහි සීලෙහි සමන්නාගතො, එකදෙසං අරියකන්තෙහි සීලෙහි සමන්නාගතො’ති?
ප. පටි: න හෙවං වත්තබ්බෙ -පෙ-
5. ස. පු: සකදාගාමීඵලසච්ඡිකිරියාය පටිපන්නො පුග්ගලො දුක්ඛදස්සනෙන කිං ජහතී’ති.
ප. වි: ඔළාරිකං කාමරාගං ජහති, ඔළාරිකං බ්යාපාදං තදෙකට්ඨෙ ච කිලෙස ජහතී’ති.
ස. අනු: එකදෙසං සකදාගාමී, එකදෙසං න සකදාගාමී, එකදෙසං සකදාගාමී ඵලප්පත්තො පටිවිද්ධො පටිලද්ධො අධිගතො සච්ඡිකතො උපසම්පජ්ජවිහරති, එකදෙසං කායෙන ඵුසිත්වා විහරති, එකදෙසං න කායෙන ඵුසිත්වා විහරතී’ති.
ප. පටි: න හෙවං වත්තබ්බෙ -පෙ-
6. ස. පු: සමුදයදස්සනෙන කිං ජහතීති?
ප. වි: ඔළාරිකං කාමරාගං ජහති, ඔළාරිකං බ්යාපාදං තදෙකට්ඨෙ ච කිලෙසෙ එකදෙසෙ ජහතී’ති.
ස. අනු: එකදෙසං සකදාගාමී, එකදෙසං න සකදාගාමී, එකදෙසං සකදාගාමීඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති. [එකදෙසං] කායෙන ඵුසිත්වා විහරති, එකදෙසං න කායෙන ඵුසිත්වා විහරතී’ති.
ප. පටි: න හෙවං වත්තබ්බෙ -පෙ-
7. ස. පු: නිරොධදස්සනෙන කිං ජහතී’ති.
ප. වි: ඔළාරිකං බ්යාපාදං ජහති, තදෙකට්ඨෙ ච කිලෙසෙ එකදෙසෙ ජහතී’ති.
ස. අනු: එකදෙසං සකදාගාමී, එකදෙසං න සකදාගාමී, එකදෙසං සකදාගාමීඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති. [එකදෙසං] කායෙන ඵුසිත්වා විහරති, එකදෙසං න කායෙන ඵුසිත්වා විහරතී’ති.
ප. පටි: න හෙවං වත්තබ්බෙ -පෙ-
8. ස. පු: මග්ගදස්සනෙන කිං ජහතී’ති.
ප. වි: ඔළාරිකං බ්යාපාදං ජහති, තදෙකට්ඨෙ ච කිලෙසෙ ජහතී’ති.
ප. අනු: එකදෙසං සකදාගාමී, එකදෙසං න සකදාගාමී, එකදෙසං සකදාගාමීඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති, [එකදෙසං] කායෙන ඵුසිත්වා විහරති, එකදෙසං න කායෙන ඵුසිත්වා විහරතී’ති.
ප. පටි: න හෙවං වත්තබ්බෙ -පෙ-
9. ස. පු: අනාගාමිඵලසච්ඡිකිරියාය පටිපන්නො පුග්ගලො දුක්ඛදස්සනෙන කිං ජහතී’ති.
ප. වි: අණුසහගතං කාමරාගං ජහති, අණුසහගතං බ්යාපාදං තදෙකට්ඨෙ ච කිලෙස එකදෙසෙ ජහතී’ති.
ස. අනු: එකදෙසං අනාගාමී, එකදෙසං න අනාගාමී, එකදෙසං අනාගාමිඵලප්පත්තො පටිලද්ධො අධිගතො සච්ඡිකතො උපසම්පජ්ජ විහරති. [එකදෙසං] කායෙන ඵුසිත්වා විහරති, එකදෙසං න කායෙන ඵුසිත්වා විහරති, එකදෙසං අන්තරාපරිනිබ්බායී -පෙ- උපහච්චපරිනිබ්බායී -පෙ- අසඞ්ඛාරපරිනිබ්බායී -පෙ- සසඞ්ඛාරපරිනිබ්බායී -පෙ- උද්ධංසොතො අකනිට්ඨගාමී, එකදෙසං න උද්ධං සොතොඅකනිට්ඨගාමී’ති.
ප. පටි: න හෙවං වත්තබ්බෙ -පෙ-
10. ස. පු: සමුදයදස්සනෙන කිං ජහතී’ති.
ප. වි: අණුසහගතං කාමරාගං ජහති, අණුසහගතං බ්යාපාදං, තදෙකට්ඨෙ ච කිලෙසෙ එකදෙසෙ ජහතී’ති.
ස. අනු: එකදෙසං අනාගාමී, එකදෙසං න අනාගාමී -පෙ- එකදෙසං උද්ධංසොතොඅකනිට්ඨගාමී, එකදෙසං න උද්ධංසොතොඅකනිට්ඨගාමී’ති.
ප. පටි: න හෙවං වත්තබ්බෙ -පෙ-
11. ස. පු: නිරොධදස්සනෙන කිං ජහතී’ති.
ප. වි: අණුසහගතං බ්යාපාදං ජහති, තදෙකට්ඨෙ ච කිලෙසෙ එකදෙසෙ ජහතී’ති.