ප. පටි: න හෙවං වත්තබ්බෙ -පෙ-
7. ස. පු: කම්මං චිත්තෙන සහජාතං, කම්මං සාරම්මණන්ති.
ප. පටිඤ්ඤා: ආමන්තා.
ස. අනු: කම්මූපචයො චිත්තෙන සහජාතො, කම්මූපචයො සාරම්මණො’ති.
ප. පටි: න හෙවං වත්තබ්බෙ -පෙ-
8. ස. පු: කම්මූපචයො චිත්තෙන සහජාතො, කම්මූපචයො අනාරම්මණො’ති.
ප. පටිඤ්ඤා: ආමන්තා.
ස. අනු: කම්මං චිත්තෙන සහජාතං, කම්මං අනාරම්මණන්ති.
ප. පටි: න හෙවං වත්තබ්බෙ -පෙ-
9. ස. පු: කම්මං චිත්තෙන සහජාතං, චිත්තං භිජ්ජමානං කම්මං භිජ්ජතී’ති.
ප. පටිඤ්ඤා: ආමන්තා.
ස. අනු: කම්මුපචයො චිත්තෙන සහජාතො, චිත්තං භිජ්ජමානං කම්මූපචයො භිජ්ජතීති.
ප. පටි: න හෙවං වත්තබ්බෙ -පෙ-
10. ස. පු: කම්මුපචයො චිත්තෙන සහජාතො, චිත්තං භිජ්ජමානං කම්මූපචයො න භිජ්ජතීති,
ප. පටිඤ්ඤා: ආමන්තා.
ස. අනු: කම්මං චිත්තෙන සහජාතං, චිත්තං භිජ්ජමානං කම්මං න භිජ්ජතී’ති.
ප. පටි: න හෙවං වත්තබ්බෙ -පෙ-
11. ස. පු: කම්මම්හි කම්මූපචයො’ති.
ප. පටි: ආමන්තා,
ස. අනු: තඤ්ඤෙව කම්මං සො කම්මූපචයො’ති.
ප. පටි: න හෙවං වත්තබ්බෙ -පෙ-
12. ස. පු: කම්මම්හි කම්මූපචයො, කම්මූපචයතො විපාකො නිබ්බත්තතී’ති.
ප. පටිඤ්ඤා: ආමන්තා.
ස. අනු: තඤ්ඤෙව කම්මං, සො කම්මූපචයො, සො කම්මවිපාකො’ති.
ප. පටි: න හෙවං වත්තබ්බෙ -පෙ-
13. ස. පු: කම්මම්හි කම්මූපචයො, කම්මූපචයතො විපාකො නිබ්බත්තති, විපාකො සාරම්මණො’ති.
ප. පටිඤ්ඤා: ආමන්තා.
ස. අනු: කම්මූපචයො සාරම්මණො’ති.
ප. පටි: න හෙවං වත්තබ්බෙ -පෙ-
14. ස. පු: කම්මූපචයො අනාරම්මණො’ති.
ප. පටිඤ්ඤා: ආමන්තා.
ස. අනු: විපාකො අනාරම්මණො’ති.
ප. පටි: න හෙවං වත්තබ්බෙ -පෙ-
15. ස. පු: අඤ්ඤං කම්මං, අඤ්ඤො කම්මූපචයො’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “ඉධ පුණ්ණ, එකච්චො සබ්යාපජ්ඣම්පි අබ්යාපජ්ඣම්පි කායසඞ්ඛාරං අභිසඞ්ඛරොති, සබ්යාපජ්ඣම්පි අබ්යාපජ්ඣම්පි වචීසඞ්ඛාරං -පෙ- මනොසඞ්ඛාරං අභිසඞ්ඛරොති. සො සබ්යාපජ්ඣම්පි අබ්යාපජ්ඣම්පි කායසඞ්ඛාරං අභිසඞ්ඛරිත්වා සබ්යාපජ්ඣම්පි අබ්යාපජ්ඣම්පි වචීසඞ්ඛාරං -පෙ- මනොසඞ්ඛාරං අභිසඞ්ඛරිත්වා සබ්යාපපජ්ඣම්පි අබ්යාපජ්ඣම්පි ලොකං උපපජ්ජති. තමෙනං සබ්යාපජ්ඣම්පි අබ්යාපජ්ඣම්පි ලොකං උපපන්නං සමානං සබ්යාපජ්ඣම්පි අබ්යාපජ්ඣම්පි ඵස්සා ඵුසන්ති. සො සබ්යාපජ්ඣෙහිපි අබ්යාපජ්ඣෙහිපි ඵස්සෙහි ඵුට්ඨො සමානො සබ්යාපජ්ඣම්පි අබ්යාපජ්ඣම්පි වෙදනං වෙදෙති වොකිණ්ණසුඛදුක්ඛං, සෙය්යථාපි මනුස්සා එකච්චෙ ච දෙවා එච්චෙ ච විනිපාතිකා. ඉති ඛො පුණ්ණ, භූතා භූතස්ස උපපත්ති{1} හොති. යං කරොති තෙන උපපජ්ජති. උපපන්නමෙතං ඵස්සා ඵුසන්ති. එවම්පහං පුණ්ණ, කම්මදායාදා සත්තා’ති වදාමි”ති,{a} අත්ථෙව සුත්තන්තො.
ප. පටිඤ්ඤා: ආමන්තා.
ස. පා: තෙන හි න වත්තබ්බං “අඤ්ඤං කම්මං අඤ්ඤො කම්මූපචයො”ති,
කම්මූපචයකථා නිට්ඨිතා.
පණ්ණරසමො වග්ගො.
තස්සුද්දානං:
“පච්චයතා වවත්ථිතා පටිච්චසමුප්පාදො අද්ධා ච ඛණො ලයො මුහුත්තං චත්තාරො ආසවා අනාසවා ලොකුත්තරානං ධම්මානං ජරාමරණං, ලොකුත්තරා සඤ්ඤාවෙදයිතනිරොධසමාපත්ති, ලොකියා සඤ්ඤාවෙදයිතනිරොධසමාපත්ති, සඤ්ඤාවෙදයිතනිරොධං සමාපන්නො කාලං කරෙය්ය, ස්වෙව මග්ගො අසඤ්ඤසත්තූපපත්තියා, අඤ්ඤං කම්මං අඤ්ඤො කම්මූපචයො”ති.
තතියො පණ්ණාසකො.
සොළසමො වග්ගො.
16. 1.
නිග්ගහකථා.
1. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස චිත්තං මා රජ්ජි, මා දුස්සි, මා මුය්හි මා කිලිස්සී’ති නිග්ගණ්හාතී’ති.
ප. පටි: න හෙවං වත්තබ්බෙ -පෙ-
2. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස උප්පන්නො ඵස්සො මා නිරුජ්ඣී’ති නිග්ගණ්හාතී’ති.
ප. පටි: න හෙවං වත්තබ්බෙ -පෙ-
ස. අනු: පරො පරස්ස උප්පන්නා වෙදනා -පෙ- උප්පන්නා සඤ්ඤා -පෙ- උප්පන්නා චෙතනා -පෙ- උප්පන්නං චිත්තං -පෙ- උප්පන්නා සද්ධා -පෙ- උප්පන්නං විරියං -පෙ- උප්පන්නා සති -පෙ- උප්පන්නො සමාධි -පෙ- උප්පන්නා පඤ්ඤා මා නිරුජ්ඣි’ති නිග්ගණ්හාතී’ති.
ප. පටි: න හෙවං වත්තබ්බෙ -පෙ-
3. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස අත්ථාය රාගං පජහතී’ති -පෙ- දොසං පජහති -පෙ- අනොත්තප්පං පජහතී’ති.
ප. පටි: න හෙවං වත්තබ්බෙ -පෙ-
4. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස අත්ථාය මග්ගං භාවෙති -පෙ- සතිපට්ඨානං භාවෙති -පෙ- බොජ්ඣඞ්ගං භාවෙතී’ති.
ප. පටි: න හෙවං වත්තබ්බෙ -පෙ-
5. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස අත්ථාය දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතී’ති.
ප. පටි: න හෙවං වත්තබ්බෙ -පෙ-
6. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: අඤ්ඤො අඤ්ඤස්ස කාරකො, පරං කතං සුඛං දුක්ඛං, අඤ්ඤො කරොති, අඤ්ඤො පටිසංවෙදෙතී’ති.
ප. පටි: න හෙවං වත්තබ්බෙ -පෙ-
7. ස. පු: පරො පරස්ස චිත්තං නිග්ගණ්හාතී’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා:
“අත්තනා’ව කතං පාපං අත්තනා සඞ්කිලිස්සති. අත්තනා අකතං පාපං අත්තනා: ව විසුජ්ඣති. සුද්ධි අසුද්ධි පච්චත්තං නාඤ්ඤො අඤ්ඤං විසොධයෙ”ති{a}
අත්ථෙව සුත්තන්තො’ති.
ප. පටිඤ්ඤා: ආමන්තා.
ස. පා: තෙන හි න වත්තබ්බං: “පරො පරස්ස චිත්තං නිග්ගණ්හාතී’ති.
8. ප. පු: න වත්තබ්බං පරො පරස්ස චිත්තං නිග්ගණ්හාතී’ති.
ස. පටිඤ්ඤා: ආමන්තා.
ප. අනු: නනු අත්ථි බලප්පත්තා, අත්ථි වසීභූතා’ති.
ස. පටිඤ්ඤා: ආමන්තා.
ප. ඨ: හඤ්චි අත්ථි බලප්පත්තා, අත්ථි වසීභූතා.
ප. පා: තෙන වත රෙ වත්තබ්බෙ “පරො පරස්ස චිත්තං නිග්ගණ්හාතී”ති.
නිග්ගහකථා නිට්ඨිතා.
16. 2.
පග්ගහ කථා.
1. ස. පු: පරො පරස්ස චිත්තං පග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස චිත්තං මා රජ්ජි, මා දුස්සි, මා මුය්හි, මා කිලිස්සී’ති පග්ගණ්හාතී’ති.
ප. පටි: න හෙවං වත්තබ්බෙ -පෙ-
2. ස. පු: පරො පරස්ස චිත්තං පග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස අලොභං කුසලමූලං ජනෙති, අදොසං කුසලමූලං ජනෙති, අමොහං කුසලමූලං ජනෙති, සද්ධං ජනෙති, විරියං ජනෙති, සතිං ජනෙති, සමාධිං ජනෙති, පඤ්ඤං ජනෙතී’ති.
ප. පටි: න හෙවං වත්තබ්බෙ -පෙ-
3. ස. පු: පරෙ පරස්ස චිත්තං පග්ගණ්හාතී’ති.
ප. පටිඤ්ඤා: ආමන්තා.
ස. අනු: පරො පරස්ස උප්පන්නො ඵස්සො මා නිරුජ්ඣි’ති පග්ගණ්හාතී’ති.
ප. පටි: න හෙවං වත්තබ්බෙ -පෙ-