ප. පටි: න හෙවං වත්තබ්බෙ -පෙ-
9. ස. පු: කප්පට්ඨො ඉද්ධිමා’ති.
ප. පටිඤ්ඤා: ආමන්තා.
ස. අනු: කප්පට්ඨෙන ඡන්දිද්ධිපාදො භාවිතො විරියිද්ධිපාදො භාවිතො චිත්තිද්ධිපාදො භාවිතො වීමංසිද්ධිපාදො භාවිතො’ති.
ප. පටි: න හෙවං වත්තබ්බෙ -පෙ-
10. ප. පු: න වත්තබ්බං ‘කප්පට්ඨො කප්පං තිට්ඨෙය්යා’ති.
ස. පටිඤ්ඤා: ආමන්තා.
ප. අනු: නනු වුත්තං භගවතා.
“ආපායිකො නෙරයිකො කප්පට්ඨො සඞ්ඝභෙදකො, වග්ගරතො අධම්මට්ඨො යොගක්ඛෙමතො{2} ධංසති. සඞ්ඝං සමග්ගං භෙත්වාන{3} කප්පං නිරයම්හි පච්චතී”ති.{a}
අත්ථෙව සුත්තන්තො’ති.
ප. පටිඤ්ඤා: ආමන්තා.
ප. ආ: තෙන හි “කප්පට්ඨො කප්පං තිට්ඨෙය්යා”ති.
කප්පට්ඨකථා නිට්ඨිතා.
13. 2.
කුසලපටිලාභකථා.
1. ස. පු: කප්පට්ඨො කුසලං චිත්තං න පටිලභෙය්යා’ති.
ප. පටිඤ්ඤා: ආමන්තා.
ස. අනු: කප්පට්ඨො දානං දදෙය්යා’ති.
ප. පටිඤ්ඤා: ආමන්තා.
අනු. ඨ: හඤ්චි කප්පට්ඨො දානං දදෙය්ය,
අනු පා: නො ච වත රෙ වත්තබ්බෙ “කප්පට්ඨො කුසලං චිත්තං න පටිලභෙය්යා”ති.
2. ස. පු: කප්පට්ඨො කුසලං චිත්තං න පටිලභෙය්යා’ති.
ප. පටිඤ්ඤා: ආමන්තා.
ස. අනු: කප්පට්ඨො චීවරං දදෙය්ය -පෙ- පිණ්ඩපාතං දදෙය්ය -පෙ- සෙනාසනං දදෙය්ය -පෙ- ගිලානපච්චයභෙසජ්ජපරික්ඛාරං දදෙය්ය -පෙ- ඛාදනීයං දදෙය්ය -පෙ- භොජනීයං දදෙය්ය -පෙ- පානීයං දදෙය්ය -පෙ- චෙතියං වන්දෙය්ය -පෙ- චෙතියෙ මාලං ආරොපෙය්ය -පෙ- ගන්ධං ආරොපෙය්ය -පෙ- විලෙපනං ආරොපෙය්ය -පෙ- චෙතියං පදක්ඛිණං{1} කරෙය්යා’ති.
ප. පටිඤ්ඤා: ආමන්තා.
අනු. ඨ: හඤ්චි කප්පට්ඨො චෙතියං පදක්ඛිණං{1} කරෙය්ය,
අනු පා: නො ච වත රෙ වත්තබ්බෙ “කප්පට්ඨො කුසලං චිත්තං න පටිලභෙය්යා’ති.
3. ප. පු: කප්පට්ඨො කුසලං චිත්තං පටිලභෙය්යා’ති.
ස. පටිඤ්ඤා: ආමන්තා.
ප. අනු: තතො වුට්ඨානං කුසලං චිත්තං පටිලභෙය්යා’ති.
ස. පටිඤ්ඤා: ආමන්තා.
ප. අනු: රූපාවචරං -පෙ- අරූපාවචරං -පෙ- ලොකුත්තරං කුසලං චිත්තං පටිලභෙය්යා’ති.
ස. පටි: න හෙවං වත්තබ්බෙ -පෙ-
කුසලපටිලාභකථා නිට්ඨිතා.
13. 3.
අනන්තරාපයුත්තකථා.
1. ප. පු: අනන්තරාපයුත්තො පුග්ගලො සම්මත්තනියාමං ඔක්කමෙය්යා’ති.
ස. පටිඤ්ඤා: ආමන්තා.
ප. අනු: මිච්ඡත්තනියාමඤ්ච සම්මත්තනියාමඤ්ච උභො ඔක්කමෙය්යා’ති.
ස. පටි: න හෙවං වත්තබ්බෙ -පෙ-
2. ප. පු: අනන්තරාපයුත්තො පුග්ගලො සම්මත්තනියාමං ඔක්කමෙය්යා’ති.
ස. පටිඤ්ඤා: ආමන්තා.
ප. අනු: නනු තං කම්මං පයුත්තං කුක්කුච්චං උප්පාදිතං විප්පටිසාරියං ජනිතන්ති.
ස. පටිඤ්ඤා: ආමන්තා.
අනු. ඨ: හඤ්චි තං කම්මං පයුත්තං කුක්කුච්චං උප්පාදිතං විප්පටිසාරියං ජනිතං,
අනු. පා: නො ච වත රෙ වත්තබ්බෙ “අනන්තරාපයුත්තො පුග්ගලො සම්මත්තනියාමං ඔක්කමෙය්යා”ති.
3. ස. පු: අනන්තරාපයුත්තො පුග්ගලො අභබ්බො සම්මත්තනියාමං ඔක්කමිතුන්ති.
ප. පටිඤ්ඤා: ආමන්තා.
ස. අනු: මාතා ජීවිතා වොරොපිතා, පිතා ජීවිතා වොරොපිතො, අරහා ජීවිතා වොරොපිතො, දුට්ඨෙන චිත්තෙන තථාගතස්ස ලොහිතං උප්පාදිතං සඞ්ඝො භින්නො’ති.
ප. පටි: න හෙවං වත්තබ්බෙ -පෙ-
4. ස. පු: අනන්තරාපයුත්තො පුග්ගලො තං කම්මං පටිසංහරිත්වා කුක්කුච්චං පටිවිනොදෙත්වා විප්පටිසාරියං පටිවිනෙත්වා{1} අභබ්බො සම්මත්තනියාමං ඔක්කමිතුන්ති.
ප. පටිඤ්ඤා: ආමන්තා.
ස. අනු: මාතා ජීවිතා වොරොපිතා පිතා ජීවිතා වොරොපිතො -පෙ- සඞ්ඝො භින්නො’ති.
ප. පටි: න හෙවං වත්තබ්බෙ -පෙ-
5. ස. පු: අන්තරාපයුත්තො පුග්ගලො තං කම්මං පටිසංහරිත්වා කුක්කුච්චං පටිවිනොදෙත්වා විප්පටිසාරියං පටිවිනෙත්වා1 අභබ්බො සම්මත්තනියාමං ඔක්කමිතුන්ති.
ස. පටිඤ්ඤා: ආමන්තා.
ස. අනු: නනු තං කම්මං පටිසංහතං{2} කුක්කුච්චං පටිවිනොදිතං විප්පටිසාරියං පටිවිනීතන්ති.
ප. පටිඤ්ඤා: ආමන්තා.
අනු. ඨ: හඤ්චි තං කම්මං පටිසංහතං{2} කුක්කුච්චං පටිවිනොදිතං විප්පටිසාරියං පටිවිනීතං,
අනු. පා: නො ච වත රෙ වත්තබ්බෙ “අන්තරාපයුත්තො පුග්ගලො තං කම්මං පටිසංහරිත්වා කුක්කුච්චං පටිවිනොදෙත්වා විප්පටිසාරියං පටිවිනෙත්වා අභබ්බො සම්මත්තනියාමං ඔක්කමිතු”න්ති.
6. ප. පු: අනන්තරාපයුත්තො පුග්ගලො සමත්තනියාමං ඔක්කමෙය්යා’ති.
ස. පටිඤ්ඤා: ආමන්තා.
ප. අනු: නනු තං කම්මං පයුත්තො ආසී’ති.
ස. පටිඤ්ඤා: ආමන්තා.
අනු. ඨ: හඤ්චි තං කම්මං පයුත්තො ආසී,{2}
අනු. පා: නො ච වත රෙ වත්තබ්බෙ “අන්තරාපයුත්තො පුග්ගලො සම්මත්තනියාමං ඔක්කමෙය්යා’ති.
අනන්තරාපයුත්තකථා නිට්ඨිතා.
13. 4.
නියතස්ස නියාමකථා.
1. ස. පු: නියතො නියාමං ඔක්කමතී’ති.
ප. පටිඤ්ඤා: ආමන්තා.
ස. අනු: මිච්ඡත්තනියතො සම්මත්තනියාමං ඔක්කමති, සම්මත්තනියතො මිච්ඡත්තනියාමං ඔක්කමතී’ති.
ප. පටි: න හෙවං වත්තබ්බෙ -පෙ-
2. ස. පු. නියතො නියාමං ඔක්කමතී’ති.
ප. පටිඤ්ඤා: ආමන්තා.
ස. අනු: පුබ්බෙ මග්ගං භාවෙත්වා පච්ඡා නියාමං ඔක්කමතී’ති.
ප. පටි: න හෙවං වත්තබ්බෙ -පෙ-
ස. අනු: පුබ්බෙ සොතාපත්තිමග්ගං භාවෙත්වා පච්ඡා සොතාපත්තිනියාමං ඔක්කමතී’ති.
ප. පටි: න හෙවං වත්තබ්බෙ -පෙ-
ස. අනු: පුබ්බෙ සකදාගාමිමග්ගං -පෙ- අනාගාමිමග්ගං -පෙ- අරහත්තමග්ගං භාවෙත්වා පච්ඡා අරහත්තනියාමං ඔක්කමතී’ති.
ප. පටි: න හෙවං වත්තබ්බෙ -පෙ-
ස. අනු: පුබ්බෙ සතිපට්ඨානං -පෙ- සම්මප්පධානං -පෙ- ඉද්ධිපාදං -පෙ- ඉන්ද්රියං -පෙ- බලං -පෙ- බොජ්ඣඞ්ගං භාවෙත්වා පච්ඡා නියාමං ඔක්කමතී’ති.
ප. පටි: න හෙවං වත්තබ්බෙ -පෙ-
3. ප. පු: න වත්තබ්බං නියතො නියාමං ඔක්කමතී’ති.
ස. පටිඤ්ඤා: ආමන්තා.
ප. අනු. භබ්බො බොධිසත්තො තාය ජාතියා ධම්මං නාභිසමෙතුන්ති.
ස. පටි: න හෙවං වත්තබ්බෙ -පෙ-
ප. ආ: තෙන හි “නියතො නියාමං ඔක්කමතී”ති.
නියතස්ස නියාමකථා නිට්ඨිතා.
13. 5.
නිවුතකථා.
1. ස. පු. නිවුතො නීවරණං ජහතී’ති.
ප. පටිඤ්ඤා: ආමන්තා.
ස. අනු: රත්තො රාගං ජහති. දුට්ඨො දොසං ජහති. මූළ්හො මොහං ජහති. කිලිට්ඨො කිලෙසෙ ජහතී’ති.
ප. පටි: න හෙවං වත්තබ්බෙ -පෙ-
ස. අනු: රාගෙන රාගං ජහති, දොසෙන දොසං ජහති, මොහෙන මොහං ජහති, කිලෙසෙහි කිලෙසෙ ජහතී’ති.
ප. පටි: න හෙවං වත්තබ්බෙ -පෙ-
2. ස. පු: රාගො චිත්තසම්පයුත්තො, මග්ගො චිත්තසම්පයුත්තො’ති.
ප. පටිඤ්ඤා: ආමන්තා.
ස. අනු: ද්වින්නං ඵස්සානං -පෙ- ද්වින්නං චිත්තානං සමොධානං හොතී’ති.