10. 4.
පඤ්චවිඤ්ඤාණා කුසලාපි අකුසලාපී’තිකථා.
1. ස. පු: පඤ්චවිඤ්ඤාණා කුසලා’පි අකුසලාපී’ති.
ප. පටිඤ්ඤා: ආමන්තා.
ස. අනු: නනු පඤ්චවිඤ්ඤාණා උප්පන්නවත්ථුකා උප්පන්නාරම්මණා’ති.
ප. පටිඤ්ඤා: ආමන්තා.
අනු. ඨ: හඤ්චි පඤ්චවිඤ්ඤාණා උප්පන්නවත්ථුකා උප්පන්නාරම්මණා,
අනු. පා: නො ච වත රෙ වත්තබ්බෙ: පඤ්චවිඤ්ඤාණා කුසලා’පි. අකුසලාපී’ති.
2. ස. පු: නනු පඤ්චවිඤ්ඤාණා පුරෙජාතවත්ථුකා පුරෙජාතාරම්මණා අජ්ඣත්තිකවත්ථුකා බාහිරාරම්මණා අසම්භින්නවත්ථුකා අසම්භින්නාරම්මණා නානා වත්ථුකා නානාරම්මණා න අඤ්ඤමඤ්ඤස්ස ගොචරවිසයං පච්චනුභොන්ති. න අසමන්නාහාරා උප්පජ්ජන්ති, න අමනසිකාරා උප්පජ්ජන්ති, න අබ්බොකිණ්ණා උප්පජ්ජන්ති, න අපුබ්බං අචරිමං උප්පජ්ජන්ති, න අඤ්ඤමඤ්ඤස්ස සමනන්තරා උප්පජ්ජන්ති -පෙ- නනු පඤ්චවිඤ්ඤාණා අනාභොගා’ති.
ප. පටිඤ්ඤා: ආමන්තා.
අනු. ඨ: හඤ්චි පඤ්චවිඤ්ඤාණා අනාභොගා,
අනු. පා: නො ච වත රෙ වත්තබ්බෙ: පඤ්චවිඤ්ඤාණා කුසලාපි අකුසලා’පීති.
3. ස. පු: චක්ඛුවිඤ්ඤාණං අකුසලන්ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
4. ස. පු: චක්ඛුවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණන්ති.
ප. පටි: න හෙවං වත්තබ්බෙ -පෙ-
5. ස. පු: චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණන්ති.
ප. පටිඤ්ඤා: ආමන්තා.
ස. අනු: “චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණ”න්ති අත්ථෙ’ව සුත්තන්තො’ති.
ප. පටිඤ්ඤා: නත්ථී.
ස. අනු: “චක්ඛුඤ්ච පටිච්ච රූපෙ ච උප්පජ්ජති චක්ඛු විඤ්ඤාණ’න්ති{a} අත්ථෙ’ව සුත්තන්තො’ති.
ප. පටිඤ්ඤා: ආමන්තා.
අනු. ඨ: හඤ්චි ‘චක්ඛුඤ්ච පටිච්ච රූපෙ ච උප්පජ්ජති. චක්ඛුවිඤ්ඤාණ’න්ති අත්ථෙ’ව සුත්තන්තො,
අනු. පා: නො ච වත රෙ වත්තබ්බෙ: චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණ’න්ති.
6. ස. පු: චක්ඛුවිඤ්ඤාණ කුසලම්පි අකුසලම්පී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං අතීතානාගතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
7. ස. පු: චක්ඛුවිඤ්ඤාණං කුසලම්පි අකුසලම්පී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං ඵස්සං ආරබ්භ -පෙ- චිත්තං ආරබ්භ -පෙ- චක්ඛුං ආරබ්භ -පෙ- කායං ආරබ්භ -පෙ- සද්දං ආරබ්භ -පෙ- ඵොට්ඨබ්බං ආරබ්භ උප්පජ්ජතී”ති.
ප. පටි: න හෙවං වත්තබ්බෙ -පෙ-
8. ස. පු: මනොවිඤ්ඤාණං කුසලම්පි අකුසලම්පි. මනොවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං කුසලම්පි අකුසලම්පි. චක්ඛුවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
9. ස. පු: මනොවිඤ්ඤාණං කුසලම්පි අකුසලම්පි. මනොවිඤ්ඤාණං අතීතානාගතං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං කුසලම්පි අකුසලම්පි. චක්ඛුවිඤ්ඤාණං අතීතානාගතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
10. ස. පු: මනොවිඤ්ඤාණං කුසලම්පි අකුසලම්පි. මනොවිඤ්ඤාණං ඵස්සං ආරබ්භ -පෙ- චිත්තං ආරබ්භ -පෙ- කායං ආරබ්භ -පෙ- සද්දං ආරබ්භ -පෙ- ඵොට්ඨබ්බං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං කුසලම්පි අකුසලම්පි. චක්ඛුවිඤ්ඤාණං ඵස්සං ආරබ්භ -පෙ- ඵොට්ඨබ්බං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
11. ප. පු: න වත්තබ්බං: පඤ්චවිඤ්ඤාණං කුසලම්පි අකුසලම්පී’ති.
ස. පටිඤ්ඤා: ආමන්තා.
ප. අනු: නනු වුත්තං භගවතා “ඉධ භික්ඛවෙ භික්ඛු චක්ඛුනා රූපං දිස්වා නිමිත්තග්ගාහී හොති -පෙ- න නිමිත්තග්ගාහී හොති -පෙ- සොතෙන සද්දං සුත්වා -පෙ- කායෙන ඵොට්ඨබ්බං ඵුසිත්වා නිමිත්තග්ගාහී හොති -පෙ- න නිමිත්තග්ගාහී හොතී’ති{a} අත්ථෙ’ව සුත්තන්තො’ති.
ස. පටිඤ්ඤා: ආමන්තා.
ප. ආ: තෙන හි “පඤ්චවිඤ්ඤාණා කුසලා’පි අකුසලාපී’ති
පඤ්චවිඤ්ඤාණා කුසලාපි අකුසලාපී’ති කථා නිට්ඨිතා.
10. 5.
පඤ්චවිඤ්ඤාණා සාභොගාති කථා.
1. ස. පු: පඤ්චවිඤ්ඤාණා සාභොගා’ති.
ප. පටිඤ්ඤා: ආමන්තා.
ස. අනු: නනු පඤ්චවිඤ්ඤාණා උප්පන්නවත්ථුකා උප්පන්නාරම්මණා’ති.
ප. පටිඤ්ඤා: ආමන්තා.
අනු. ඨ: හඤ්චි පඤ්චවිඤ්ඤාණා උප්පන්නාවත්ථුකා උප්පන්නාරම්මණා,
අනු. පා: නො ච වත රෙ වත්තබ්බෙ: පඤ්චවිඤ්ඤාණා සාභොගා”ති.
2. ස. පු: නනු පඤ්චවිඤ්ඤාණා පුරෙජාතවත්ථුකා පුරෙජාතාරම්මණා අජ්ඣත්තිකවත්ථුකා බාහිරාරම්මණා අසම්භින්නවත්ථුකා අසම්භින්නාරම්මණා නානා වත්ථුකා නානාරම්මණා, න අඤ්ඤමඤ්ඤස්ස ගොචරවිසයං පච්චනුභොන්ති. න අසමන්නාහාරා උප්පජ්ජන්ති, න අමනසිකාරා උප්පජ්ජන්ති, න අබ්බොකිණ්ණා{1} උප්පජ්ජන්ති, න අපුබ්බං අචරිමං උප්පජ්ජන්ති, නනු පඤ්චවිඤ්ඤාණා න අඤ්ඤමඤ්ඤස්ස සමනන්තරා උප්පජ්ජන්තී’ති.
ප. පටිඤ්ඤා: ආමන්තා.
අනු. ඨ: හඤ්චි පඤ්චවිඤ්ඤාණා න අඤ්ඤමස්ස සමනන්තරා උප්පජ්ජන්ති,
අනු. පා: නො ච වත රෙ වත්තබ්බෙ “පඤ්චවිඤ්ඤාණා සාභොගා”ති.
3. ස. පු: චක්ඛුවිඤ්ඤාණං සාභොගන්ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
4. ස. පු: චක්ඛුවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණන්ති.
ප. පටි: න හෙවං වත්තබ්බෙ -පෙ-
5. ස. පු: චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණන්ති.
ප. පටිඤ්ඤා: ආමන්තා.
ස. අනු: “චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණ”න්ති අත්ථෙ’ව සුත්තන්තො’ති.
ප. පටිඤ්ඤා: නත්ථී.
ස. අනු: “චක්ඛුඤ්ච පටිච්ච රූපෙ ච උප්පජ්ජති චක්ඛු විඤ්ඤාණ’න්ති අත්ථෙ’ව සුත්තන්තො’ති.
ප. පටිඤ්ඤා: ආමන්තා.
අනු. ඨ: හඤ්චි “චක්ඛුඤ්ච පටිච්ච රූපෙ ච උප්පජ්ජති චක්ඛුවිඤ්ඤාණ’න්ති අත්ථෙ’ව සුත්තන්තො,
අනු. පා: නො ච වත රෙ වත්තබ්බෙ: චක්ඛුඤ්ච පටිච්ච සුඤ්ඤතඤ්ච උප්පජ්ජති චක්ඛුවිඤ්ඤාණ’න්ති.
6. ස. පු: චක්ඛුවිඤ්ඤාණං සාභොගන්ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං අතීතානාගතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
7. ස. පු: චක්ඛුවිඤ්ඤාණං සාභොගන්ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං ඵස්සං ආරබ්භ -පෙ- ඵොට්ඨබ්බං ආරබ්භ උප්පජ්ජතී”ති.
ප. පටි: න හෙවං වත්තබ්බෙ -පෙ-
8. ස. පු: මනොවිඤ්ඤාණං සාභොගං, මනොවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං සාභොගං, චක්ඛුවිඤ්ඤාණං සුඤ්ඤතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
9. ස. පු: මනොවිඤ්ඤාණං සාභොගං මනොවිඤ්ඤාණං අතීතානාගතං ආරබ්භ උප්පජ්ජතී’ති.
ප. පටිඤ්ඤා: ආමන්තා.
ස. අනු: චක්ඛුවිඤ්ඤාණං සාභොගං, චක්ඛුවිඤ්ඤාණං අතීතානාගතං ආරබ්භ උප්පජ්ජතී’ති.
ප. පටි: න හෙවං වත්තබ්බෙ -පෙ-
10. ස. පු: මනොවිඤ්ඤාණං සාභොගං, මනොවිඤ්ඤාණං ඵස්සං ආරබ්භ -පෙ- ඵොට්ඨබ්බං ආරබ්භ උප්පජ්ජතී’ති.
ප. පටිඤ්ඤා: ආමන්තා.