28. ස. පු: අත්ථී අරහතො අසුචි සුක්කවිසට්ඨී’ති.
ප. වි: සධම්මකුසලස්ස අරහතො අත්ථී අසුචි සුක්කවිසට්ඨි, පරධම්මකුසලස්ස අරහතො නත්ථී අසුචි සුක්කවිසට්ඨී’ති.
ස. පු: සධම්මකුසලස්ස අරහතො අත්ථී අසුචි සුක්කවිසට්ඨීති.
ප. පටිඤ්ඤා: ආමන්තා.
ස. අනු: පරධම්මකුසලස්ස අරහතො අත්ථී අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
29. ස. පු: පරධම්මකුසලස්ස අරහතො නත්ථී අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: සධම්මකුසලස්ස අරහතො නත්ථි අසුචිසුක්කවිසට්ඨී’ති.
ප. පටි: න හෙවං වත්තබ්බෙ -පෙ-
30. ස. පු: සධම්මකුසලස්ස අරහතො රාගො පහීනො, අත්ථී තස්ස අසුචි සුක්කවිට්ඨි’ති.
ප. පටිඤ්ඤා: ආමන්තා.
ස. අනු: පරධම්මකුසලස්ස අරහතො රාගො පහීනො, අත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
31. ස. පු: සධම්මකුසලස්ස අරහතො දොසො පහීනො -පෙ- මොහො පහීනො -පෙ- අනොත්තප්පං පහීනං, අත්ථී තස්ස අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: පරධම්මකුසලස්ස අරහතො අනොත්තප්පං පහීනං, අත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
32. ස. පු: සධම්මකුසලස්ස අරහතො රාගප්පහානාය මග්ගො භාවිතො -පෙ- බොජ්ඣඞ්ගා භාවිතා -පෙ- දොසප්පහානාය -පෙ- මොහප්පහානාය -පෙ- අනොත්තප්පප්පහානාය මග්ගො භාවිතො -පෙ- බොජ්ඣඞ්ගා භාවිතා, අත්ථී තස්ස අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: පරධම්මකුසලස්ස අරහතො අනොත්තප්පප්පහානාය බොජ්ඣඞ්ගා භාවිතා, අත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
33. ස. පු: සධම්මකුසලො අරහා වීතරාගො වීතදොසො වීතමොහො -පෙ- සච්ඡිකාතබ්බං සච්ඡිකතං, අත්ථී තස්ස අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: පරධම්මකුසලො අරහා වීතරාගො වීතදොසො වීතමොහො -පෙ- සච්ඡිකාතබ්බං සච්ඡිකතං, අත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
34. ස. පු: පරධම්මකුසලස්ස අරහතො රාගො පහීනො නත්ථී තස්ස අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: සධම්මකුසලස්ස අරහතො රාගො පහීනො, නත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
35. ස. පු: පරධම්මකුසලස්ස අරහතො දොසො පහීනො -පෙ- මොහො පහීනො -පෙ- අනොත්තප්පං පහීනං, නත්ථී තස්ස අසුචි සුක්කවිට්ඨි’ති.
ප. පටිඤ්ඤා: ආමන්තා.
ස. අනු: සධම්මකුසලස්ස අරහතො අනොත්තප්පං පහීනං, නත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
36. ස. පු: පරධම්මකුසලස්ස අරහතො රාගප්පහානාය මග්ගො භාවිතො -පෙ- බොජ්ඣඞ්ගා භාවිතා -පෙ- දොසප්පහානාය -පෙ- මොහප්පහානාය -පෙ- අනොත්තප්පප්පහානාය මග්ගො භාවිතො -පෙ- බොජ්ඣඞ්ගා භාවිතා, නත්ථී තස්ස අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: සධම්මකුසලස්ස අරහතො අනොත්තප්පප්පහානාය බොජ්ඣඞ්ගා භාවිතා, නත්ථී තස්ස අසුචි සුක්කවිසට්ඨී’ති.
ප. පටි: න හෙවං වත්තබ්බෙ -පෙ-
37. ස. පු: පරධම්මකුසලො අරහා වීතරාගො වීතදොසො වීතමොහො -පෙ- සච්ඡිකාතබ්බං සච්ඡිකතං, නත්ථී තස්ස අසුචි සුක්කවිසට්ඨී’ති.
ප. පටිඤ්ඤා: ආමන්තා.
ස. අනු: සධම්මකුසලො අරහා වීතරාගො වීතදොසො වීතමොහො -පෙ- සච්ඡිකාතාබ්බං සච්ඡිකතං, නත්ථී තස්ස අසුචි සුක්කවිසට්ඨි’ති.
ප. පටි: න හෙවං වත්තබ්බෙ -පෙ-
38. ස. පු: අත්ථී අරහතො අසුචි සුක්කවිසට්ඨි’ති.
ප. පටිඤ්ඤා: ආමන්තා.
ස. අනු: නනු වුත්තං භගවතා “යෙ කෙචි භික්ඛවෙ භික්ඛූ පුථුජ්ජනා සීලසම්පන්නා සතා සම්පජානා නිද්දං ඔක්කමන්ති, තෙසං අසුචි න මුච්චති. යෙ’පි තෙ භික්ඛවෙ, බාහිරකා ඉසයො කාමෙසු වීතරාගා, තෙසම්පි අසුචි න මුච්චති. අට්ඨානමෙතං භික්ඛවෙ, අනවකාසො යං අරහතො අසුචි මුච්චෙය්යා’ති”{a} අත්ථෙ’ව සුත්තන්තොති.
ප. පටිඤ්ඤා: ආමන්තා.
අනු. පා: තෙන හි න වත්තබ්බං: අත්ථී අරහතො අසුචි සුක්කවිසට්ඨි’ති.
39. ප. පු: න වත්තබ්බං අත්ථී අරහතො පරූපහාරො’ති.
ස. පටිඤ්ඤා: ආමන්තා.
ප. අනු: නනු අරහතො චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරෙ උපසංහරෙය්යුන්ති,
ස. පටිඤ්ඤා: ආමන්තා.
අනු. ඨ: හඤ්චි අරහතො චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරෙ උපසංහරෙය්යුං,
අනු. පා: තෙන වත රෙ වත්තබ්බෙ “අත්ථී අරහතො පරූපහාරො”ති.
40. ස. පු: “අරහතො චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරෙ උපසංහරෙය්යුන්ති” අත්ථී අරහතො පරූපහාරො’ති.
ප. පටිඤ්ඤා: ආමන්තා.
ස. අනු: අරහතො සොතාපත්තිඵලං වා සකදාගාමිඵලං වා අනාගාමිඵලං වා අරහත්තං වා පරෙ උපසංහරෙය්යුන්ති.
ප. පටි: න හෙවං වත්තබ්බෙ -පෙ-
පරූපහාරකථා නිට්ඨිතා.
2. 2.
අඤ්ඤාණකථා.
1. ස. පු: අත්ථී අරහතො අඤ්ඤාණන්ති.
ප. පටිඤ්ඤා: ආමන්තා.
ස. අනු: අත්ථී අරහතො අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසඤ්ඤොජනං අවිජ්ජානීවරණන්ති.
ප. පටි: න හෙවං වත්තබ්බෙ -පෙ-
2. ස. පු: නත්ථී අරහතො අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසඤ්ඤොජනං අවිජ්ජානීවරණන්ති.
ප. පටිඤ්ඤා ආමන්තා.
අනු: ඨ: හඤ්චි නත්ථී අරහතො අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසඤ්ඤොජනං අවිජ්ජානීවරණං.
අනු. පා: නො ච වත රෙ වත්තබ්බෙ “අත්ථී අරහතො අඤ්ඤාණන්ති”.
3. ස. පු: අත්ථී පුථුජ්ජනස්ස අඤ්ඤාණං, අත්ථී තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජා පරියුට්ඨානං අවිජ්ජාසඤ්ඤොජනං අවිජ්ජානීවරණන්ති,
ප. පටිඤ්ඤා: ආමන්තා.
ස. අනු: අත්ථී අරහතො අඤ්ඤාණං, අත්ථී තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසඤ්ඤොජනං අවිජ්ජජානීවරණන්ති.
ප. පටි: න හෙවං වත්තබ්බෙ -පෙ-
4. ස. පු: අත්ථී අරහතො අඤ්ඤාණං, නත්ථි තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසඤ්ඤොජනං අවිජ්ජානීවරණන්ති.
ප. පටිඤ්ඤා: ආමන්තා.
ස. අනු: අත්ථී පුථුජ්ජනස්ස අඤ්ඤාණං, නත්ථී තස්ස අවිජ්ජා අවිජ්ජොඝො අවිජ්ජායොගො අවිජ්ජානුසයො අවිජ්ජාපරියුට්ඨානං අවිජ්ජාසඤ්ඤොජනං අවිජ්ජානීවරණන්ති.
ප. පටි: න හෙවං වත්තබ්බෙ -පෙ-
5. ස. පු: අත්ථී අරහතො අඤ්ඤාණන්ති.
ප. පටිඤ්ඤා: ආමන්තා.
ස. අනු: අරහා “අඤ්ඤාණාපකතො පාණං හනෙය්ය, අදින්නං ආදියෙය්ය, මුසා භණෙය්ය, පිසුණං භණෙය්ය, ඵරුසං භණෙය්ය, සම්ඵං පලපෙය්ය{1} සන්ධිං ඡින්දෙය්ය, නිල්ලොපං හරෙය්ය, එකාගාරිකං කරෙය්ය, පරිපන්ථෙ තිට්ඨෙය්ය, පරදාරං ගච්ඡෙය්ය, ගාමඝාතං කරෙය්ය, නිගමඝාතං කරෙය්යා” ති.
ප. පටි: න හෙවං වත්තබ්බෙ -පෙ-
6. ස. පු: අත්ථී පුථුජ්ජනස්ස අඤ්ඤාණං, පුථුජ්ජනො අඤ්ඤාණාපකතො පාණං, හනෙය්ය අදින්නං ආදියෙය්ය, මුසා භණෙය්ය -පෙ- ගාමඝාතං කරෙය්ය, නිගමඝාතං කාරෙය්යා’ති.
ප. පටිඤ්ඤා: ආමන්තා.
ස. අනු: අත්ථී අරහතො අඤ්ඤාණං, අරහා අඤ්ඤාණාපකතො පාණං හනෙය්ය, අදින්නං ආදියෙය්ය -පෙ- ගාමඝාතං කරෙය්ය, නිගමඝාතං කරෙය්යා’ති.
ප. පටි: න හෙවං වත්තබ්බෙ -පෙ-
7. ස. පු: අත්ථී අරහතො අඤ්ඤාණං, න ච අරහා අඤ්ඤාණාපකතො පාණං හනෙය්ය, අදින්නං ආදියෙය්ය -පෙ- ගාමඝාතං කරෙය්ය, නිගමඝාතං කරෙය්යා’ති.
ප. පටිඤ්ඤා: ආමන්තා.
ස. අනු: අත්ථී පුථුජ්ජනස්ස අඤ්ඤාණං, න ච පුථුජ්ජනො අඤ්ඤාණාපකතො පාණං හනෙය්ය, අදින්නං ආදියෙය්ය -පෙ- ගාමඝාතං කරෙය්ය, නිගමඝාතං කරෙය්යා’ති.
ප. පටි: න හෙවං වත්තබ්බෙ -පෙ-
8. ස. පු: අත්ථී අරහතො අඤ්ඤාණන්ති.
ප. පටිඤ්ඤා: ආමන්තා.
ස. අනු: අත්ථී අරහතො සත්ථරි අඤ්ඤාණං ධම්මෙ අඤ්ඤාණං සඞ්ඝෙ අඤ්ඤාණං සික්ඛාය අඤ්ඤාණං පුබ්බන්තෙ අඤ්ඤාණං අපරන්තෙ අඤ්ඤාණං පුබ්බන්තාපරන්තෙ අඤ්ඤාණං ඉදපච්චයතා පටිච්චසමුප්පන්නෙසු ධම්මෙසු අඤ්ඤාණන්ති.
ප. පටි: න හෙවං වත්තබ්බෙ -පෙ-
9. ස. පු: නත්ථී අරහතො සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං, සික්ඛාය අඤ්ඤාණං, පුබ්බන්තෙ අඤ්ඤාණං, අපරන්තෙ අඤ්ඤාණං, පුබ්බන්තාපරන්තෙ අඤ්ඤාණං, ඉදප්පච්චයතා පටිච්චසමුප්පන්නෙසු ධම්මෙසු අඤ්ඤාණන්ති.
ප. පටිඤ්ඤා: ආමන්තා.
අනු. ඨ: හඤ්චි නත්ථී අරහතො සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං -පෙ- ඉදප්පච්චයතා පටිච්චසමුප්පන්නෙසු ධම්මෙසු අඤ්ඤාණං,
අනු. පා: නො ච වත රෙ වත්තබ්බෙ: අත්ථී අරහතො අඤ්ඤාණන්ති.
10. ස. පු: අත්ථී පුථුජ්ජනස්ස අඤ්ඤාණං. අත්ථී තස්ස සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං, -පෙ- ඉදප්පච්චයතා පටිච්චසමුප්පන්නෙසු ධම්මෙසු අඤ්ඤාණන්ති.
ප. පටිඤ්ඤා: ආමන්තා.
ස. අනු: අත්ථී අරහතො අඤ්ඤාණං, අත්ථී තස්ස සත්ථරි අඤ්ඤාණං, ධම්මෙ අඤ්ඤාණං, සඞ්ඝෙ අඤ්ඤාණං, -පෙ- ඉදප්පච්චයතා පටිච්චසමුප්පන්නෙසු ධම්මෙසු අඤ්ඤාණන්ති.
ප. පටි: න හෙවං වත්තබ්බෙ -පෙ-