ප. පටිඤ්ඤා: රාගපරියුට්ඨිතො පරිහායතී’ති.
ස. අනු: පරියුට්ඨානං කිං පටිච්ච උප්පජ්ජතී’ති.
ප. පටිඤ්ඤා: අනුසයං පටිච්ච උප්පජ්ජතී’ති.
ස. අනු: අත්ථි අරහතො අනුසයා’ති.
ප. පටි: න හෙවං වත්තබ්බෙ -පෙ-
ස. පු: අත්ථි අරහතො අනුසයා’ති.
ප. පටිඤ්ඤා: ආමන්තා.
ස. අනු: අත්ථි අරහතො කාමරාගානුසයො පටිඝානුසයො මානානුසයො දිට්ඨානුසයො විචිකිච්ඡානුසයො භවරාගානුසයො අවිජ්ජානුසයොති.
ප. පටි: න හෙවං වත්තබ්බෙ -පෙ-
ස. අනු: අරහා අරහත්තා පරිහායමානො කිං පරියුට්ඨිතො පරිහායතී’ති.
ප. පටිඤ්ඤා: දොසපරියුට්ඨිතො පරිහායති -පෙ- මොහපරියුට්ඨිතො පරිහායතී’ති.
ස. අනු: පරියුට්ඨානං කිං පටිච්ච උප්පජ්ජතී’ති.
ප. පටිඤ්ඤා: අනුසයං පටිච්ච උප්පජ්ජතී’ති.
ස. අනු: අත්ථි අරහතො අනුසයා’ති.
ප. පටි: න හෙවං වත්තබ්බෙ -පෙ-
ස. අනු: අත්ථි අරහතො අනුසයා’ති.
ප. පටිඤ්ඤා: ආමන්තා.
ස. අනු: අත්ථි අරහතො කාමරාගානුසයො -පෙ- අවිජ්ජානුසයො’ති.
ප. පටි: න හෙවං වත්තබ්බෙ -පෙ-
113. ස. පු: පරිහායති අරහා අරහත්තා’ති.
ප. පටිඤ්ඤා: ආමන්තා.
ස. අනු: අරහතො අරහත්තා පරිහායමානස්ස කිං උපචයං ගච්ඡතී’ති, රාගො උපචයං ගච්ඡතී’ති, සක්කායදිට්ඨි උපචයං ගච්ඡතී’ති, විචිකිච්ඡා උපචයං ගච්ඡතී’ති, සීලබ්බතපරාමාසො උපචයං ගච්ඡතී’ති.
ප. පටි: න හෙවං වත්තබ්බෙ -පෙ-
ස. අනු: දොසො උපචයං ගච්ඡතී’ති -පෙ- මොහො උපචයං ගච්ඡතී’ති, සක්කායදිට්ඨි උපචයං ගච්ඡතී’ති, විචිකිච්ඡා උපචයං ගච්ඡතී, සීලබ්බතපරාමාසො උපචයං ගච්ඡතී’ති.
ප. පටි: න හෙවං වත්තබ්බෙ -පෙ-
114. ස. පු: පරිහායති අරහා අරහත්තා’ති.
ප. පටිඤ්ඤා: ආමන්තා.
ස. අනු: අරහා ආචිනතී’ති.
ප. පටි: න හෙවං වත්තබ්බෙ -පෙ-
ස. අනු: අරහා අපචිනතී’ති
ප. පටි: න හෙවං වත්තබ්බෙ -පෙ-
ස. අනු: අරහා පජහතී’ති.
ප. පටි: න හෙවං වත්තබ්බෙ -පෙ-
ස. අනු: අරහා උපාදියතී’ති.
ප. පටි: න හෙවං වත්තබ්බෙ -පෙ-
ස. අනු: අරහා විසිනෙතී’ති.
ප. පටි: න හෙවං වත්තබ්බෙ -පෙ-
ස. අනු: අරහා උස්සිනෙතී’ති.
ප. පටි: න හෙවං වත්තබ්බෙ -පෙ-
ස. අනු: අරහා විධූපෙතී’ති.
ප. පටි: න හෙවං වත්තබ්බෙ -පෙ-
115. ස. අනු: නනු අරහා නෙවාචිනාති න අපචිනති අපචිනිත්වා ඨිතො’ති.
ප. පටිඤ්ඤා: ආමන්තා.
අනු. ඨ: හඤ්චි අරහා නෙවාචිනාති න අපචිනති අපචිනිත්වා ඨිතො,
අනු. පා: නො ච වත රෙ වත්තබ්බෙ ‘පරිහායති අරහා අරහත්තා’ති.
116. ස. අනු: නනු අරහා නෙව පජහති න උපාදියති පජහිත්වා ඨිතො’ති.
ප. පටිඤ්ඤා: ආමන්තා.
අනු. ඨ: හඤ්චි අරහා නෙව පජහති න උපාදියති පජහිත්වා ඨිතො,
අනු. පා: නො ච වත රෙ වත්තබ්බෙ ‘පරිහායති අරහා අරහත්තා’ති.
117. ස. අනු: නනු අරහා නෙව විසිනෙති න උස්සිනෙති විසිනිත්වා ඨිතො’ති.
ප. පටිඤ්ඤා: ආමන්තා.
අනු. ඨ: හඤ්චි අරහා නෙව විසිනෙති, න උස්සිනෙති, විසිනිත්වා ඨිතො,
අනු. පා: නො ච වත රෙ වත්තබ්බෙ ‘පරිහායති අරහා අරහත්තා’ති.
118. ස. අනු: නනු අරහා නෙව විධූපෙති, න සන්ධූපෙති, විධූපෙත්වා ඨිතො’ති.
ස. පටිඤ්ඤා: ආමන්තා.
අනු. ඨ: හඤ්චි අරහා නෙව විධූපෙති න සන්ධූපෙති විධූපෙත්වා ඨිතො,
අනු. පා: නො ච වත රෙ වත්තබ්බෙ ‘පරිහායති අරහා අරහත්තා’ති.
පරිහානිකථා නිට්ඨිතා.
1. 3.
බ්රහ්මචරියකථා
1. ස. පු: නත්ථි දෙවෙසු බ්රහ්මචරියවාසො’ති.
ප. පටිඤ්ඤා: ආමන්තා.
ස. අනු: සබ්බෙ දෙවා ජළා එලමූගා අවිඤ්ඤූ හත්ථසංවාචිකා න පටිබලා සුභාසිතදුබ්භාසිතානං අත්ථමඤ්ඤාතුං, සබ්බෙ දෙවා න බුද්ධෙ පසන්නා න ධම්මෙ පසන්නා න සඞ්ඝෙ පසන්නා, න බුද්ධං භගවන්තං පයිරුපාසන්ති, න බුද්ධං භගවන්තං පඤ්හං පුච්ඡන්ති, න බුද්ධෙන භගවතා පඤ්හෙ විස්සජ්ජිතෙ අත්තමනා, සබ්බෙ දෙවා කම්මාවරණෙන සමන්නාගතා කිලෙසාවරණෙන සමන්නාගතා විපාකාවරණෙන සමන්නාගතා අස්සද්ධා අච්ඡන්දිකා දුප්පඤ්ඤා අභබ්බා නියාමං ඔක්කමිතුං කුසලෙසු ධම්මෙසු සම්මත්තං, සබ්බෙ දෙවා මාතුඝාතකා පිතුඝාතකා අරහන්තඝාතකා රුහිරුප්පාදකා සඞ්ඝභෙදකා, සබ්බෙ දෙවා පාණාතිපාතිනො අදින්නාදායිනො කාමෙසු මිච්ඡාචාරිනො මුසාවාදිනො පිසුනාවාචා ඵරුසාවාචා සම්ඵප්පලාපිනො අභිජ්ඣාලුනො බ්යාපන්නචිත්තා මිච්ඡාදිට්ඨිකා’ති.
ප. පටි: න හෙවං වත්තබ්බෙ -පෙ-
ස. අනු: නනු අත්ථි දෙවා අජළා අනෙලමූගා විඤ්ඤූ න හත්ථසංවාචිකා පටිබලා සුභාසිතදුබ්භාසිතානං අත්ථමඤ්ඤාතුං, අත්ථි දෙවා බුද්ධෙ පසන්නා ධම්මෙ පසන්නා සඞ්ඝෙ පසන්නා, බුද්ධං භගවන්තං පයිරුපාසන්ති, බුද්ධං භගවන්තං පඤ්හං පුච්ඡන්ති, බුද්ධෙන භගවතා පඤ්හෙ විස්සජ්ජිතෙ අත්තමනා හොන්ති, අත්ථි දෙවා න කම්මාවරණෙන සමන්නාගතා, න කිලෙසාවරණෙන සමන්නාගතා, න විපාකාවරණෙන සමන්නාගතා, සද්ධාඡන්දිකා පඤ්ඤාවන්තො භබ්බා නියාමං ධම්මං ඔක්කමිතුං කුසලෙසු ධම්මෙසු සම්මත්තං, අත්ථි දෙවා න මාතුඝාතකා න පිතුඝාතකා න අරහන්තඝාතකා න රුහිරුප්පාදකා න සඞ්ඝභෙදකා. අත්ථි දෙවා න පාණාතිපාතිනො න අදින්නාදායිනො න කාමෙසු මිච්ඡාචාරිනො න මුසාවාදිනො න පිසුනාවාචා න ඵරුසාවාචා න සම්ඵප්පලාපිනො න අභිජ්ඣාලුනො න අව්යාපන්නචිත්තා සම්මාදිට්ඨිකා’ති.
ප. පටිඤ්ඤා: ආමන්තා.
අනු. ඨ: හඤ්චි අත්ථි දෙවා අජළා අනෙලමූගා විඤ්ඤූ න හත්ථසංවාචිකා පටිබලා සුභාසිතදුබ්භාසිතානං අත්ථමඤ්ඤාතුං -පෙ- අත්ථි දෙවා බුද්ධෙ පසන්නා -පෙ- සම්මාදිට්ඨිකා,
අනු. පා: නො ච වත රෙ වත්තබ්බෙ “නත්ථි දෙවෙසු බ්රහ්මචරියවාසො”ති.
2. ප. පු: අත්ථි දෙවෙසු බ්රහ්මචරියවාසො’ති.
ස. පටිඤ්ඤා: ආමන්තා.
ප. අනු: අත්ථි තත්ථ පබ්බජ්ජා මුණ්ඩියං කාසාවධාරණා පත්තධාරණා. දෙවෙසු සම්මාසම්බුද්ධා උප්පජ්ජන්ති, පච්චෙකසම්බුද්ධා උප්පජ්ජන්ති, සාවකයුගං උප්පජ්ජතී’ති.
ස. පටි: න හෙවං වත්තබ්බෙ -පෙ-
3. ස. පු: දෙවෙසු පබ්බජ්ජා නත්ථි’ති නත්ථි දෙවෙසු බ්රහ්මචරියවාසො’ති.
ප. පටිඤ්ඤා: ආමන්තා.
ස. අනු: යත්ථ අත්ථි පබ්බජ්ජා තත්ථෙව බ්රහ්මචරියවාසො, යත්ථ නත්ථි පබ්බජ්ජා නත්ථි තත්ථ බ්රහ්මචරියවාසො’ති.
ප. පටි: න හෙවං වත්තබ්බෙ -පෙ-
ස. අනු: යත්ථ අත්ථි පබ්බජ්ජා තත්ථෙව බ්රහ්මචරියවාසො, යත්ථ නත්ථි පබ්බජ්ජා නත්ථි තත්ථ බ්රහ්මචරියවාසො’ති.
ප. පටිඤ්ඤා: ආමන්තා.
ස. අනු: යො පබ්බජති{1} තස්සෙව බ්රහ්මචරියවාසො, යො න පබ්බජති නත්ථි තස්ස බ්රහ්මචරියවාසො’ති.
ප. පටි: න හෙවං වත්තබ්බෙ -පෙ-
4. ස. පු: ‘දෙවෙසු මුණ්ඩියං නත්ථි’ති නත්ථි දෙවෙසු බ්රහ්මචරියවාසො’ති.
ප. පටිඤ්ඤා: ආමන්තා.
ස. අනු: යත්ථ අත්ථි මුණ්ඩියං තත්ථෙ’ව බ්රහ්මචරියවාසො, යත්ථ නත්ථි මුණ්ඩියං නත්ථි තත්ථ බ්රහ්මචරියවාසො’ති.
ප. පටි: න හෙවං වත්තබ්බෙ -පෙ-
ස. අනු: යත්ථ අත්ථි මුණ්ඩියං තත්ථෙ’ව බ්රහ්මචරියවාසො, යත්ථ නත්ථි මුණ්ඩියං නත්ථි තත්ථ බ්රහ්මචරියවාසො’ති.
ප. පටිඤ්ඤා: ආමන්තා.
ස. අනු: යො මුණ්ඩො හොති තස්සෙ’ව බ්රහ්මචරියවාසො, යො මුණ්ඩො න හොති නත්ථි තස්ස බ්රහ්මචරියවාසො’ති.
ප. පටි: න හෙවං වත්තබ්බෙ -පෙ-
5. ස. පු: “දෙවෙසු කාසාවධාරණා නත්ථි’ති” නත්ථි දෙවෙසු බ්රහ්මචරියවාසො’ති.
ප. පටිඤ්ඤා: ආමන්තා.
ස. අනු: යත්ථ අත්ථි කාසාවධාරණා තත්ථෙව බ්රහ්මචරියවාසො, යත්ථ නත්ථි කාසාවධාරණා නත්ථි තත්ථ බ්රහ්මචරියවාසො’ති.
ප. පටි: න හෙවං වත්තබ්බෙ -පෙ-
ස. අනු: යත්ථ අත්ථි කාසාවධාරණා තත්ථෙ’ව බ්රහ්මචරියවාසො, යත්ථ නත්ථි කාසාවධාරණා නත්ථි තත්ථ බ්රහ්මචරිය වාසො’ති.
ප. පටිඤ්ඤා: ආමන්තා.
ස. අනු: යො කාසාවං ධාරෙති තස්සෙව බ්රහ්මචරියවාසො, යො කාසාවං න ධාරෙති නත්ථි තස්ස බ්රහ්මචරියවාසො’ති.
ප. පටි: න හෙවං වත්තබ්බෙ -පෙ-
6. ස. පු: ‘දෙවෙසු පත්තධාරණා නත්ථි’ති නත්ථි දෙවෙසු බ්රහ්මචරියවාසො’ති
ප. පටිඤ්ඤා: ආමන්තා.
ස. අනු: යත්ථ අත්ථි පත්තධාරණා තත්ථෙ’ව බ්රහ්මචරියවාසො, යත්ථ නත්ථී පත්තධාරණා නත්ථි තත්ථ බ්රහ්මචරියවාසො’ති.
ප. පටිඤ්ඤා: ආමන්තා.