ස. අනු: තිණ්ණං ඵස්සානං තිස්සන්නං{1} වෙදනානං තිස්සන්නං{1} සඤ්ඤානං තිස්සන්නං{1} චෙතනානං තිණ්ණං චිත්තානං තිස්සන්නං{1} සද්ධානං තිණ්ණං විරියානං තිස්සන්නං සතීනං තිණ්ණං සමාධීනං තිස්සන්නං{1} පඤ්ඤානං සමොධානං හොතී’ති.
ප. පටි: න හෙවං වත්තබ්බෙ -පෙ-
14. ස. පු: පුථුජ්ජනො කාමෙසු වීතරාගො සහ ධම්මාභිසමයා අනාගාමිඵලෙ සණ්ඨාතී’ති.
ප. පටිඤ්ඤා: ආමන්තා.
ස. අනු: සොතාපත්තිමග්ගෙනා’ති.
ප. පටි: න හෙවං වත්තබ්බෙ -පෙ-
ස. අනු: සකදාගාමිමග්ගෙනා’ති.
ප. පටි: න හෙවං වත්තබ්බෙ -පෙ-
15. ස. පු: කතමෙන මග්ගෙනා’ති.
ප. වි: අනාගාමිමග්ගොනා’ති.
ස. අනු: අනාගාමිමග්ගෙන සක්කායදිට්ඨිං විචිකිච්ඡං සීලබ්බතපරාමාසං ජහතී’ති.
ප. පටි: න හෙවං වත්තබ්බෙ -පෙ-
16. ස. පු: අනාගාමිමග්ගෙන සක්කායදිට්ඨිං විචිකිච්ඡං සීලබ්බතපරාමාසං ජහතී’ති.
ප. පටිඤ්ඤා: ආමන්තා.
ස. අනු: නනු තිණ්ණං සඤ්ඤොජනානං පහානා සොතාපත්තිඵලං වුත්තං භගවතා’ති.
ප. පටිඤ්ඤා: ආමන්තා.
අනු. ඨ: හඤ්චි තිණ්ණං සඤ්ඤොජනානං පහානා සොතාපත්තිඵලං වුත්තං භගවතා,
අනු. පා: නො ච වත රෙ වත්තබ්බෙ අනාගාමිමග්ගෙන සක්කායදිට්ඨිං විචිකිච්ඡං සීලබ්බතපරාමාසං ජහතී’ති.
17. ස. පු: අනාගාමිමග්ගෙන ඔළාරිකං කාමරාගං ඔළාරිකං බ්යාපාදං ජහතී’ති.
ප. පටි: න හෙවං වත්තබ්බෙ -පෙ-
ස. අනු: අනාගාමිමග්ගෙන ඔළාරිකං කාමරාගං ඔළාරිකං බ්යාපාදං ජහතී’ති.
ප. පටිඤ්ඤා: ආමන්තා.
ස. අනු: නනු කාමරාගබ්යාපාදානං තනුභාවා සකදාගාමිඵලං වුත්තං භගවතා’ති.
ප. පටිඤ්ඤා: ආමන්තා.
අනු. ඨ: හඤ්චි කාමරාගබ්යාපාදානං තනුභාවා සකදාගාමිඵලං වුත්තං භගවතා,
අනු. පා: නො ච වත රෙ වත්තබ්බෙ “අනාගාමිමග්ගෙන ඔළාරිකං කාමරාගං ඔළාරිකං බ්යාපාදං ජහතී”ති.
18. ස. පු: පුථුජ්ජනො කාමෙසු වීතරාගො සහ ධම්මාභිසමයා අනාගාමිඵලෙ සණ්ඨාතී’ති.
ප. පටිඤ්ඤා: ආමන්තා.
ස. අනු: යෙ කෙචි ධම්මං අභිසමෙන්ති සබ්බෙ තෙ සහ ධම්මාභිසමයා අනාගාමිඵලෙ සණ්ඨහන්තී’ති.
ප. පටි: න හෙවං වත්තබ්බෙ -පෙ-
19. ප. පු: න වත්තබ්බං ‘ජහති පුථුජ්ජනො කාමරාගව්යාපාදන්ති’.
ස. පටිඤ්ඤා: ආමන්තා.
ප. අනුයොගො: නනු වුත්තං භගවතා:
“අහිංසෙ තෙ{1} අතීතංසෙ ඡ සත්ථාරො යසස්සිනො, නිරාමගන්ධා කරුණෙ විමුත්තා{2} කාමසඤ්ඤොජනාතිගා.{3}
කාමරාගං විරාජෙත්වා බ්රහ්මලොකූපගා අහු, අහෙසුං සාවකා තෙසං සාවකානි සතානි’පි.
නිරාමගන්ධා කරුණෙ විමුත්තා{2} කාමසඤ්ඤොජනාතිගා{3} කාමරාගං විරාජෙත්වා බ්රහ්මලොකූපගා අහූ’ති.”{a}
අත්ථෙව සුත්තන්තො’ති.
ස. පටිඤ්ඤා: ආමන්තා.
ප. නිග: තෙන හි ‘ජහති පුථුජ්ජනො කාමරාගබ්යාපාදන්ති”.
20. ස. පු: ජහති පුථුජ්ජනො කාමරාගබ්යාපාදන්ති.
ප. පටිඤ්ඤා: ආමන්තා.
ස. අනු: නනු වුත්තං භගවතා:
“සො හි නාම භික්ඛවෙ සුනෙත්තො සත්ථා එවං දීඝායුකො සමානො එවං චිරට්ඨිතිකො අපරිමුත්තො අහොසි ජාතියා ජරාය මරණෙන සොකෙහි පරිදෙවෙහි දුක්ඛෙහි දොමනස්සෙහි උපායාසෙහි, අපරිමුත්තො දුක්ඛස්මා’ති වදාමි. තං කිස්ස හෙතු?
චතුන්නං ධම්මානං අනනුබොධා අප්පටිවෙධා. කතමෙසං චතුන්නං? අරියස්ස සීලස්ස අනනුබොධා අප්පටිවෙධා. අරියස්ස සමාධිස්ස අරියාය පඤ්ඤාය අරියාය විමුත්තියා අනනුබොධා අප්පටිවෙධා. තයිදං භික්ඛවෙ අරියං සීලං අනුබුද්ධං පටිවිද්ධං. අරියො සමාධි අනුබුද්ධො පටිවිද්ධො. අරියා පඤ්ඤා අනුබුද්ධා පටිවිද්ධා. අරියා විමුත්ති අනුබුද්ධා පටිවිද්ධා. උච්ඡින්නා භවතණ්හා ඛීණා භවනෙත්ති. නත්ථි දානි පුනබ්භවො”ති.
“සීලං සමාධි පඤ්ඤා ච විමුත්ති ච අනුත්තරා, අනුබද්ධා ඉමෙ ධම්මා ගොතමෙන යසස්සිනා.
ඉති බුද්ධො අභිඤ්ඤාය ධම්මමක්ඛාසි භික්ඛූනං, දුක්ඛස්සන්තකරො සත්ථා චක්ඛුමා පරිනිබ්බුතො”ති.{a}
අත්ථෙව සුත්තන්තො’ති.
ප. පටිඤ්ඤා: ආමන්තා.
ස. නිග: තෙන හි න වත්තබ්බං “ජහති පුථුජ්ජනො කාමරාගබ්යාපාදන්ති.”
ජහතිකථා නිට්ඨිතා
1. 6.
සබ්බමත්ථිකථා
1. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: සබ්බත්ථ සබ්බමත්ථී’ති.
ප. පටි: න හෙවං වත්තබ්බෙ -පෙ-
2. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: සබ්බදා සබ්බමත්ථී’ති.
ප. පටි: න හෙවං වත්තබ්බෙ -පෙ-
3. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: සබ්බෙන සබ්බං සබ්බමත්ථී’ති.
ප. පටි: න හෙවං වත්තබ්බෙ -පෙ-
4. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: සබ්බෙසු සබ්බමත්ථී’ති.
ප. පටි: න හෙවං වත්තබ්බෙ -පෙ-
5. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: අයොගන්ති කත්වා සබ්බමත්ථී’ති.
ප. පටි: න හෙවං වත්තබ්බෙ -පෙ-
6. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: යම්පි නත්ථි තම්පත්ථි’ති.
ප. පටි: න හෙවං වත්තබ්බෙ -පෙ-
7. ස. පු: සබ්බමත්ථී’ති.
ප. පටිඤ්ඤා: ආමන්තා.
ස. අනු: සබ්බමත්ථී’ති යා දිට්ඨි, සා දිට්ඨි මිච්ඡාදිට්ඨි’ති යා දිට්ඨි, සා දිට්ඨි සම්මාදිට්ඨි’ති හෙවමත්ථි’ති.
ප. පටි: න හෙවං වත්තබ්බෙ -පෙ-
වාදයුත්ති.
8. ස. පු: අතීතං අත්ථි’ති.
ප. පටිඤ්ඤා: ආමන්තා.
ස. අනු: නනු අතීතං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතන්ති.
ප. පටිඤ්ඤා: ආමන්තා.
අනු. ඨ: හඤ්චි අතීතං නිරුද්ධං විගතං විපරිණතං අත්ථඞ්ගතං අබ්භත්ථඞ්ගතං,
අනු: පා: නො ච වත රෙ වත්තබ්බෙ “අතීතං අත්ථි”ති.
9. ස. පු: අනාගතං අත්ථි’ති.
ප. පටිඤ්ඤා: ආමන්තා.
ස. අනු: නනු අනාගතං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතන්ති.
ප. පටිඤ්ඤා: ආමන්තා.
අනු. ඨ: හඤ්චි අනාගතං අජාතං අභූතං අසඤ්ජාතං අනිබ්බත්තං අනභිනිබ්බත්තං අපාතුභූතං.
අනු. පා: නො ච වත රෙ වත්තබ්බෙ “අනාගතං අත්ථි’ති.
10. ස. පු: පච්චුප්පන්නං අත්ථි, පච්චුප්පන්නං අනිරුද්ධං අවිගතං අවිපරිණතං න අත්ථඞ්ගතං න අබ්භත්ථඞ්ගතන්ති.
ප. පටිඤ්ඤා: ආමන්තා.
ස. අනු: අතීතං අත්ථි, අතීතං අනිරුද්ධං අවිගතං අවිපරිණතං න අත්ථඞ්ගතං න අබ්භත්ථඞ්ගතන්ති.
ප. පටි: න හෙවං වත්තබ්බෙ -පෙ-
11. ස. පු: පච්චුප්පන්නං අත්ථි, පච්චුප්පන්නං ජාතං භූතං සඤ්ජාතං නිබ්බත්තං අභිනිබ්බත්තං පාතුභූතන්ති.
ප. පටිඤ්ඤා: ආමන්තා.
ස. අනු: අනාගතං අත්ථි, අනාගතං ජාතං භූතං සඤ්ජාතං නිබ්බත්තං අභිනිබ්බත්තං පාතුභූතන්ති.