ස. අනු: පඤ්චන්නං ඛන්ධානං උපාදාය පඤ්චන්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
192. ස. පු: චක්ඛායතනං උපාදාය, සොතායතනං උපාදාය පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: ද්වින්නං ආයතනානං උපාදාය ද්වින්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
ස. පු: චක්ඛායතනං උපාදාය -පෙ- සොතායතනං උපාදාය -පෙ- ධම්මායතනං උපාදාය පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: ද්වාදසන්නං ආයතනානං උපාදාය ද්වාදසන්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
193. ස. පු: චක්ඛුධාතුං උපාදාය, සොතධාතුං උපාදාය පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: ද්වින්නං ධාතූනං උපාදාය ද්වින්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
ස. පු: චක්ඛුධාතුං උපාදාය -පෙ- සොතධාතුං උපාදාය -පෙමනොවිඤ්ඤාණධාතුං උපාදාය පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: අට්ඨාරසන්නං ධාතූනං උපාදාය අට්ඨාරසන්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
194. ස. පු: චක්ඛුන්ද්රියං උපාදාය, සොතින්ද්රියං උපාදාය පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: ද්වින්නං ඉන්ද්රියානං උපාදාය ද්වින්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
ස. පු: චක්ඛුන්ද්රියං උපාදාය -පෙ- සොතින්ද්රියං උපාදාය -පෙ- අඤ්ඤාතාවින්ද්රියං උපාදාය පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: බාවීසතියා{2} ඉන්ද්රියානං උපාදාය බාවීසතියා{2} පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
195. ස. පු: එකවොකාරභවං උපාදාය එකස්ස පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: චතුවොකාරභවං උපාදාය චතුන්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
ස. පු: එකවොකාරභවං උපාදාය එකස්ස පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. අනු: පඤ්චවොකාරභවං උපාදාය පඤ්චන්නං පුග්ගලානං පඤ්ඤත්තී’ති.
ප. පටි: න හෙවං වත්තබ්බෙ -පෙ-
196. ස. පු: එකවොකාරභවෙ එකො’ච පුග්ගලො’ති.
ප. පටිඤ්ඤා: ආමන්තා.
ස. අනු: චතුවොකාරභවෙ චත්තාරො’ච පුග්ගලා’ති.
ප. පටි: න හෙවං වත්තබ්බෙ -පෙ-
ස. පු: එකවොකාරභවෙ එකො’ච පුග්ගලො’ති.
ප. පටිඤ්ඤා: ආමන්තා.
ප. අනු: පඤ්චවොකාරභවෙ පඤ්චෙ’ව පුග්ගලා’ති.
ප. පටි: න හෙවං වත්තබ්බෙ -පෙ-
197. ස. පු: යථා රුක්ඛං උපාදාය ඡායාය පඤ්ඤත්ති, එවමෙවං රූපං උපාදාය පුග්ගලස්ස පඤ්ඤත්තී’ති.
යථා රුක්ඛං උපාදාය ඡායාය පඤ්ඤත්ති, රුක්ඛො’පි අනිච්චො, ඡායා’පි අනිච්චා, එවමෙවං රූපං උපාදාය පුග්ගලස්ස පඤ්ඤත්ති, රූපම්පි අනිච්චං, පුග්ගලො’පි අනිච්චො’ති.
ප. පටි: න හෙවං වත්තබ්බෙ -පෙ-
ස. පු: යථා රුක්ඛං උපාදාය ඡායාය පඤ්ඤත්ති, අඤ්ඤො රුක්ඛො, අඤ්ඤා ඡායා, එවමෙවං රූපං උපාදාය පුග්ගලස්ස පඤ්ඤත්ති, අඤ්ඤං රූපං, අඤ්ඤො පුග්ගලො’ති.
ප. පටි: න හෙවං වත්තබ්බෙ -පෙ-
198. ස. පු: යථා ගාමං උපාදාය ගමිකස්ස පඤ්ඤත්ති, එවමෙවං රූපං උපාදාය පුග්ගලස්ස පඤ්ඤත්තී’ති.
යථා ගාමං උපාදාය ගමිකස්ස පඤ්ඤත්ති, අඤ්ඤො ගාමො, අඤ්ඤො ගමිකො, එවමෙවං රූපං උපාදාය පුග්ගලස්ස පඤ්ඤත්ති, අඤ්ඤං රූපං, අඤ්ඤො පුග්ගලො’ති.
ප. පටි: න හෙවං වත්තබ්බෙ -පෙ-
199. ස. පු: යථා රට්ඨං උපාදාය රඤ්ඤො පඤ්ඤත්ති, එවමෙවං රූපං උපාදාය පුග්ගලස්ස පඤ්ඤත්තී’ති. යථා රට්ඨං උපාදාය රඤ්ඤො පඤ්ඤත්ති, අඤ්ඤං රට්ඨං, අඤ්ඤො රාජා, එවමෙවං රූපං උපාදාය පුග්ගලස්ස පඤ්ඤත්ති, අඤ්ඤං රූපං අඤ්ඤො පුග්ගලො’ති.
ප. පටි: න හෙවං වත්තබ්බෙ -පෙ-
200. ස. පු: යථා න නිගළො නෙගළිකො, යස්ස නිගළො සො නෙගළිකො, එවමෙවං න රූපං රූපවා, යස්ස රූපං සො රූපවා’ති.
යථා න නිගළො නෙගළිකො, යස්ස නිගළො සො නෙගළිකො, අඤ්ඤො නිගළො, අඤ්ඤො නෙගළිකො, එවමෙවං න රූපං රූපවා, යස්ස රූපා සො රූපවා, අඤ්ඤං රූපං, අඤ්ඤො රූපවා’ති.
ප. පටි: න හෙවං වත්තබ්බෙ -පෙ-
201. ස. පු: චිත්තෙ චිත්තෙ පුග්ගලස්ස පඤ්ඤත්තී’ති.
ප. පටිඤ්ඤා: ආමන්තා.
ස. වනු: චිත්තෙ චිත්තෙ පුග්ගලො ජායති ජීයති මීයති චවති උපපජ්ජතී’ති.
ප. පටි: න හෙවං වත්තබ්බෙ -පෙ-
ස. පු: දුතියෙ චිත්තෙ උප්පන්නෙ න වත්තබ්බො සො’ති වා අඤ්ඤො’ති වා’ති.
ප. පටිඤ්ඤා: ආමන්තා.
ස. අනු: දුතියෙ චිත්තෙ උප්පන්නෙ න වත්තබ්බං කුමාරකො’ති වා කුමාරිකා’ති වා’ති.
ප. පටිඤ්ඤා: වත්තබ්බං.
ස. නි: ආජානාහි නිග්ගහං.
අනු. ඨ: හඤ්චි දුතියෙ චිත්තෙ උප්පන්නෙ න වත්තබ්බං සො’ති වා අඤ්ඤො’ති වා,
අනු. පා: තෙන වත රෙ වත්තබ්බෙ දුතියෙ චිත්තෙ උප්පන්නෙ න වත්තබ්බං කුමාරකො’ති වා කුමාරිකා’ති වා’ති,
අනු. ආ: යං තත්ථ වදෙසි: වත්තබ්බෙ ඛො දුතියෙ චිත්තෙ උප්පන්නෙ න වත්තබ්බං සො’ති වා අඤ්ඤො’ති වා, දුතියෙ චිත්තෙ උප්පන්නෙ වත්තබ්බං කුමාරකො’ති වා කුමාරිකා’ති වා’ති මිච්ඡා.
පටි. ඨ: හඤ්චි වා පන දුතියෙ චිත්තෙ උප්පන්නෙ වත්තබ්බං කුමාරකො’ති වා කුමාරිකා’ති වා,
පටි. පා: තෙන වත රෙ වත්තබ්බෙ දුතියෙ චිත්තෙ උප්පන්නෙ වත්තබ්බං සො’ති වා අඤ්ඤො’ති වා.
පටි. ආ: යං තත්ථ වදෙසි: වත්තබ්බෙ ඛො දුතියෙ චිත්තෙ උප්පන්නෙ වත්තබ්බං සො’ති වා අඤ්ඤො’ති වා, දුතියෙ චිත්තෙ උප්පන්නෙ වත්තබ්බං කුමාරකො’ති වා කුමාරිකා’ති මිච්ඡා.
202. ස. පු: දුතියෙ චිත්තෙ උප්පන්නෙ න වත්තබ්බං සො’ති වා අඤ්ඤො’ති වා’ති.
ප. පටිඤ්ඤා: ආමන්තා.
ස. අනු: දුතියෙ චිත්තෙ උප්පන්නෙ න වත්තබ්බං ඉත්ථි’ති වා පුරිසො’ති වා ගහට්ඨො’ති වා පබ්බජිතො’ති වා දෙවො’ති වා මනුස්සො’ති වා’ති.
ප. පටිඤ්ඤා: වත්තබ්බං.
ස. නි: ආජානාහි නිග්ගහං.
අනු. ඨ: හඤ්චි දුතියෙ චිත්තෙ උප්පන්නෙ න වත්තබ්බංසො’ති වා අඤ්ඤො’ති වා,
අනු. පා: තෙන වත රෙ වත්තබ්බෙ දුතියෙ චිත්තෙ උප්පන්නෙ න වත්තබ්බං දෙවො’ති වා මනුස්සො’ති වා’ති.
අනු. ආ: යං තත්ථ වදෙසි: වත්තබ්බෙ ඛො දුතියෙ චිත්තෙ උප්පන්නෙ න වත්තබ්බං සො’ති වා අඤ්ඤො’ති වා, දුතියෙ චිත්තෙ උප්පන්නෙ වත්තබ්බං දෙවො’ති වා මනුස්සො’ති වා’ති මිච්ඡා.
පටි. ඨ: හඤ්චි වා පන දුතියෙ චිත්තෙ උප්පන්නෙ වත්තබ්බං දෙවො’ති වා මනුස්සො’ති වා,
පටි. පා: තෙන වත රෙ වත්තබ්බෙ දුතියෙ චිත්තෙ උප්පන්නෙ වත්තබ්බං සො’ති වා අඤ්ඤො’ති වා’ති.
පටි. ආ: යං තත්ථ වදෙසි: වත්තබ්බෙ ඛො දුතියෙ චිත්තෙ උප්පන්නෙ න වත්තබ්බං සො’ති වා අඤ්ඤො’ති වා, දුතියෙ චිත්තෙ උප්පන්නෙ වත්තබ්බං දෙවො’ති වා මනුස්සො’ති වා’ති මිච්ඡා -පෙ-
203. ප. පු: න වත්තබ්බං ‘පුග්ගලො උපලබ්භති සච්චිකට්ඨපරමත්ථෙනා’ති.
ස. පටිඤ්ඤා: ආමන්තා.
ප. පු: නනු යො පස්සති, යං පස්සති, යෙන පස්සති, සො පස්සති, තං පස්සති, තෙන පස්සතී’ති.
ස. පටිඤ්ඤා: ආමන්තා.
අනු. ඨ: හඤ්චි යො පස්සති යං පස්සති, යෙන පස්සති, සො පස්සති තං පස්සති තෙන පස්සති,
අනු. පා: තෙන වත රෙ වත්තබ්බෙ පුග්ගලො උපලබ්භති සච්චිකට්ඨපරමත්ථෙනා’ති.
204. ප. පු: න වත්තබ්බං ‘පුග්ගලො උපලබ්භති සච්චිකට්ඨපරමත්ථෙනා’ති.
ස. පටිඤ්ඤා: ආමන්තා.
ප. පු: නනු යො සුණාති -පෙ- යො ඝායති -පෙ- යො සායති -පෙ- යො ඵුසති -පෙ- යො විජානාති යං විජානාති යෙන විජානාති, සො විජානාති තං විජානාති තෙන විජානාතී’ති.
ස. පටිඤ්ඤා: ආමන්තා.
අනු. ඨ: හඤ්චි යො විජානාති යං විජානාති යෙන විජානාති, සො විජානාති තං විජානාති තෙන විජානාති.
අනු. පා: තෙන වත රෙ වත්තබ්බෙ පුග්ගලො උපලබ්භති සච්චිකට්ඨපරමත්ථෙනා’ති.
205. ස. පු: පුග්ගලො උපලබ්භති සච්චිකට්ඨපරමත්ථෙනා’ති.
ප. පටිඤ්ඤා: ආමන්තා.
ස. පු: නනු යො න පස්සති, යං න පස්සති, යෙන න පස්සති, සො න පස්සති, තං න පස්සති, තෙන න පස්සතී’ති.
ප. පටිඤ්ඤා: ආමන්තා.
අනු. ඨ: හඤ්චි යො න පස්සති යං න පස්සති යෙන න පස්සති, සො න පස්සති තං න පස්සති තෙන පස්සති,
අනු. පා: නො ච වත රෙ වත්තබ්බෙ පුග්ගලො උපලබ්භති සච්චිකට්ඨපරමත්ථෙනා’ති.
206. ස. පු: පුග්ගලො උපලබ්භති සච්චිකට්ඨපරමත්ථෙනා’ති.