Pañcahi khandhehi ekādasahāyatanehi sattarasahi dhātūhi asaṅgahitaṁ.
(Ekamūlakaṁ.)
Dukkhasaccañca samudayasaccañca pañcahi khandhehi dvādasahāyatanehi aṭṭhārasahi dhātūhi saṅgahitā.
Katihi asaṅgahitā?
Na kehici khandhehi na kehici āyatanehi na kāhici dhātūhi asaṅgahitā.
Dukkhasaccañca maggasaccañca pañcahi khandhehi dvādasahāyatanehi aṭṭhārasahi dhātūhi saṅgahitā.
Katihi asaṅgahitā?
Na kehici khandhehi na kehici āyatanehi na kāhici dhātūhi asaṅgahitā.
Dukkhasaccañca nirodhasaccañca asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.
Katihi asaṅgahitā?
Na kehici khandhehi na kehici āyatanehi na kāhici dhātūhi asaṅgahitā.
(Dukamūlakaṁ.)
Dukkhasaccañca samudayasaccañca maggasaccañca pañcahi khandhehi dvādasahāyatanehi aṭṭhārasahi dhātūhi saṅgahitā.
Katihi asaṅgahitā?
Na kehici khandhehi na kehici āyatanehi na kāhici dhātūhi asaṅgahitā.
Dukkhasaccañca samudayasaccañca nirodhasaccañca asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.
Katihi asaṅgahitā?
Na kehici khandhehi na kehici āyatanehi na kāhici dhātūhi asaṅgahitā.
(Tikamūlakaṁ.)
Dukkhasaccañca samudayasaccañca maggasaccañca nirodhasaccañca asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.
Katihi asaṅgahitā?
Na kehici khandhehi na kehici āyatanehi na kāhici dhātūhi asaṅgahitā.
Cattāri saccāni katihi khandhehi katihāyatanehi katihi dhātūhi saṅgahitāni?
Cattāri saccāni asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitāni.
Katihi asaṅgahitāni?
Na kehici khandhehi na kehici āyatanehi na kāhici dhātūhi asaṅgahitāni.
(Catukkaṁ.)
2.1.5. Indriya
Cakkhundriyaṁ katihi khandhehi katihāyatanehi katihi dhātūhi saṅgahitaṁ?
Cakkhundriyaṁ ekena khandhena ekenāyatanena ekāya dhātuyā saṅgahitaṁ.
Katihi asaṅgahitaṁ?
Catūhi khandhehi ekādasahāyatanehi sattarasahi dhātūhi asaṅgahitaṁ.
Sotindriyaṁ … ghānindriyaṁ … jivhindriyaṁ … kāyindriyaṁ … itthindriyaṁ … purisindriyaṁ ekena khandhena ekenāyatanena ekāya dhātuyā saṅgahitaṁ.
Katihi asaṅgahitaṁ?
Catūhi khandhehi ekādasahāyatanehi sattarasahi dhātūhi asaṅgahitaṁ.
Manindriyaṁ ekena khandhena ekenāyatanena sattahi dhātūhi saṅgahitaṁ.
Katihi asaṅgahitaṁ?
Catūhi khandhehi ekādasahāyatanehi ekādasahi dhātūhi asaṅgahitaṁ.
Jīvitindriyaṁ dvīhi khandhehi ekenāyatanena ekāya dhātuyā saṅgahitaṁ.
Katihi asaṅgahitaṁ?
Tīhi khandhehi ekādasahāyatanehi sattarasahi dhātūhi asaṅgahitaṁ.
Sukhindriyaṁ … dukkhindriyaṁ … somanassindriyaṁ … domanassindriyaṁ … upekkhindriyaṁ … saddhindriyaṁ … vīriyindriyaṁ … satindriyaṁ … samādhindriyaṁ … paññindriyaṁ … anaññātaññassāmītindriyaṁ … aññindriyaṁ … aññātāvindriyaṁ ekena khandhena ekenāyatanena ekāya dhātuyā saṅgahitaṁ.
Katihi asaṅgahitaṁ?
Catūhi khandhehi ekādasahāyatanehi sattarasahi dhātūhi asaṅgahitaṁ.
(Ekamūlakaṁ.)
Cakkhundriyañca sotindriyañca ekena khandhena dvīhāyatanehi dvīhi dhātūhi saṅgahitā.
Katihi asaṅgahitā?
Catūhi khandhehi dasahāyatanehi soḷasahi dhātūhi asaṅgahitā.
Cakkhundriyañca ghānindriyañca … cakkhundriyañca jivhindriyañca … cakkhundriyañca kāyindriyañca … cakkhundriyañca itthindriyañca … cakkhundriyañca purisindriyañca ekena khandhena dvīhāyatanehi dvīhi dhātūhi saṅgahitā.
Katihi asaṅgahitā?
Catūhi khandhehi dasahāyatanehi soḷasahi dhātūhi asaṅgahitā.
Cakkhundriyañca manindriyañca dvīhi khandhehi dvīhāyatanehi aṭṭhahi dhātūhi saṅgahitā.
Katihi asaṅgahitā?
Tīhi khandhehi dasahāyatanehi dasahi dhātūhi asaṅgahitā.
Cakkhundriyañca jīvitindriyañca dvīhi khandhehi dvīhāyatanehi dvīhi dhātūhi saṅgahitā.
Katihi asaṅgahitā?
Tīhi khandhehi dasahāyatanehi soḷasahi dhātūhi asaṅgahitā.
Cakkhundriyañca sukhindriyañca … cakkhundriyañca dukkhindriyañca … cakkhundriyañca somanassindriyañca … cakkhundriyañca domanassindriyañca … cakkhundriyañca upekkhindriyañca … cakkhundriyañca saddhindriyañca … cakkhundriyañca vīriyindriyañca … cakkhundriyañca satindriyañca … cakkhundriyañca samādhindriyañca … cakkhundriyañca paññindriyañca … cakkhundriyañca anaññātaññassāmītindriyañca … cakkhundriyañca aññindriyañca … cakkhundriyañca aññātāvindriyañca dvīhi khandhehi dvīhāyatanehi dvīhi dhātūhi saṅgahitā.
Katihi asaṅgahitā?
Tīhi khandhehi dasahāyatanehi soḷasahi dhātūhi asaṅgahitā.
(Dukamūlakaṁ.)
Bāvīsatindriyāni katihi khandhehi katihāyatanehi katihi dhātūhi saṅgahitāni?
Bāvīsatindriyāni catūhi khandhehi sattahāyatanehi terasahi dhātūhi saṅgahitāni.
Katihi asaṅgahitāni?
Ekena khandhena pañcahāyatanehi pañcahi dhātūhi asaṅgahitāni.
2.1.6. Paṭiccasamuppādādi
Avijjā ekena khandhena ekenāyatanena ekāya dhātuyā saṅgahitā.
Katihi asaṅgahitā?
Catūhi khandhehi ekādasahāyatanehi sattarasahi dhātūhi asaṅgahitā.
Avijjāpaccayā saṅkhārā ekena khandhena ekenāyatanena ekāya dhātuyā saṅgahitā.
Katihi asaṅgahitā?
Catūhi khandhehi ekādasahāyatanehi sattarasahi dhātūhi asaṅgahitā.
Saṅkhārapaccayā viññāṇaṁ ekena khandhena ekenāyatanena sattahi dhātūhi saṅgahitaṁ.
Katihi asaṅgahitaṁ?
Catūhi khandhehi ekādasahāyatanehi ekādasahi dhātūhi asaṅgahitaṁ.
Viññāṇapaccayā nāmarūpaṁ catūhi khandhehi ekādasahāyatanehi ekādasahi dhātūhi saṅgahitaṁ.
Katihi asaṅgahitaṁ?
Ekena khandhena ekenāyatanena sattahi dhātūhi asaṅgahitaṁ.
Nāmarūpapaccayā saḷāyatanaṁ dvīhi khandhehi chahāyatanehi dvādasahi dhātūhi saṅgahitaṁ.
Katihi asaṅgahitaṁ?
Tīhi khandhehi chahāyatanehi chahi dhātūhi asaṅgahitaṁ.
Saḷāyatanapaccayā phasso … phassapaccayā vedanā … vedanāpaccayā taṇhā … taṇhāpaccayā upādānaṁ … kammabhavo ekena khandhena ekenāyatanena ekāya dhātuyā saṅgahito.
Katihi asaṅgahito?
Catūhi khandhehi ekādasahāyatanehi sattarasahi dhātūhi asaṅgahito.
Upapattibhavo … kāmabhavo … saññābhavo … pañcavokārabhavo pañcahi khandhehi ekādasahāyatanehi sattarasahi dhātūhi saṅgahito.
Katihi asaṅgahito?
Na kehici khandhehi ekenāyatanena ekāya dhātuyā asaṅgahito.
Rūpabhavo pañcahi khandhehi pañcahāyatanehi aṭṭhahi dhātūhi saṅgahito.
Katihi asaṅgahito?
Na kehici khandhehi sattahāyatanehi dasahi dhātūhi asaṅgahito.
Arūpabhavo … nevasaññānāsaññābhavo … catuvokārabhavo catūhi khandhehi dvīhāyatanehi dvīhi dhātūhi saṅgahito.
Katihi asaṅgahito?
Ekena khandhena dasahāyatanehi soḷasahi dhātūhi asaṅgahito.
Asaññābhavo … ekavokārabhavo ekena khandhena dvīhāyatanehi dvīhi dhātūhi saṅgahito.
Katihi asaṅgahito?
Catūhi khandhehi dasahāyatanehi soḷasahi dhātūhi asaṅgahito.
Jāti dvīhi khandhehi … jarā dvīhi khandhehi … maraṇaṁ dvīhi khandhehi ekenāyatanena ekāya dhātuyā saṅgahitaṁ.
Katihi asaṅgahitaṁ?
Tīhi khandhehi ekādasahāyatanehi sattarasahi dhātūhi asaṅgahitaṁ.
Soko … paridevo … dukkhaṁ … domanassaṁ … upāyāso … satipaṭṭhānaṁ … sammappadhānaṁ ekena khandhena ekenāyatanena ekāya dhātuyā saṅgahitaṁ.