Dhammasaṅgaṇī · Pali MS

Yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, pīti hoti, sukhaṁ hoti, cittassekaggatā hoti, saddhindriyaṁ hoti, vīriyindriyaṁ hoti, satindriyaṁ hoti, samādhindriyaṁ hoti, paññindriyaṁ hoti, manindriyaṁ hoti, somanassindriyaṁ hoti, jīvitindriyaṁ hoti, anaññātaññassāmītindriyaṁ hoti, sammādiṭṭhi hoti, sammāsaṅkappo hoti, sammāvācā hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti, saddhābalaṁ hoti, vīriyabalaṁ hoti, satibalaṁ hoti, samādhibalaṁ hoti, paññābalaṁ hoti, hiribalaṁ hoti, ottappabalaṁ hoti, alobho hoti, adoso hoti, amoho hoti, anabhijjhā hoti, abyāpādo hoti, sammādiṭṭhi hoti, hirī hoti, ottappaṁ hoti, kāyapassaddhi hoti, cittapassaddhi hoti, kāyalahutā hoti, cittalahutā hoti, kāyamudutā hoti, cittamudutā hoti, kāyakammaññatā hoti, cittakammaññatā hoti, kāyapāguññatā hoti, cittapāguññatā hoti, kāyujukatā hoti, cittujukatā hoti, sati hoti, sampajaññaṁ hoti, samatho hoti, vipassanā hoti, paggāho hoti, avikkhepo hoti;

ds2.1.5:1.3

ye vā pana tasmiṁ samaye aññepi atthi paṭiccasamuppannā arūpino dhammā—

ds2.1.5:1.4

ime dhammā kusalā.

ds2.1.5:2.1

Katamo tasmiṁ samaye phasso hoti?

ds2.1.5:2.2

Yo tasmiṁ samaye phasso phusanā samphusanā samphusitattaṁ—

ds2.1.5:2.3

ayaṁ tasmiṁ samaye phasso hoti.

ds2.1.5:3.1

Katamā tasmiṁ samaye vedanā hoti?

ds2.1.5:3.2

Yaṁ tasmiṁ samaye tajjāmanoviññāṇadhātusamphassajaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—

ds2.1.5:3.3

ayaṁ tasmiṁ samaye vedanā hoti.

ds2.1.5:4.1

Katamā tasmiṁ samaye saññā hoti?

ds2.1.5:4.2

Yā tasmiṁ samaye tajjāmanoviññāṇadhātusamphassajā saññā sañjānanā sañjānitattaṁ—

ds2.1.5:4.3

ayaṁ tasmiṁ samaye saññā hoti.

ds2.1.5:5.1

Katamā tasmiṁ samaye cetanā hoti?

ds2.1.5:5.2

Yā tasmiṁ samaye tajjāmanoviññāṇadhātusamphassajā cetanā sañcetanā cetayitattaṁ—

ds2.1.5:5.3

ayaṁ tasmiṁ samaye cetanā hoti.

ds2.1.5:6.1

Katamaṁ tasmiṁ samaye cittaṁ hoti?

ds2.1.5:6.2

Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

ds2.1.5:6.3

idaṁ tasmiṁ samaye cittaṁ hoti.

ds2.1.5:7.1

Katamo tasmiṁ samaye vitakko hoti?

ds2.1.5:7.2

Yo tasmiṁ samaye takko vitakko saṅkappo appanā byappanā cetaso abhiniropanā sammāsaṅkappo maggaṅgaṁ maggapariyāpannaṁ—

ds2.1.5:7.3

ayaṁ tasmiṁ samaye vitakko hoti.

ds2.1.5:8.1

Katamo tasmiṁ samaye vicāro hoti?

ds2.1.5:8.2

Yo tasmiṁ samaye cāro vicāro anuvicāro upavicāro cittassa anusandhānatā anupekkhanatā—

ds2.1.5:8.3

ayaṁ tasmiṁ samaye vicāro hoti.

ds2.1.5:9.1

Katamā tasmiṁ samaye pīti hoti?

ds2.1.5:9.2

Yā tasmiṁ samaye pīti pāmojjaṁ āmodanā pamodanā hāso pahāso vitti odagyaṁ attamanatā cittassa pītisambojjhaṅgo—

ds2.1.5:9.3

ayaṁ tasmiṁ samaye pīti hoti.

ds2.1.5:10.1

Katamaṁ tasmiṁ samaye sukhaṁ hoti?

ds2.1.5:10.2

Yaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—

ds2.1.5:10.3

idaṁ tasmiṁ samaye sukhaṁ hoti.

ds2.1.5:11.1

Katamā tasmiṁ samaye cittassekaggatā hoti?

ds2.1.5:11.2

Yā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—

ds2.1.5:11.3

ayaṁ tasmiṁ samaye cittassekaggatā hoti.

ds2.1.5:12.1

Katamaṁ tasmiṁ samaye saddhindriyaṁ hoti?

ds2.1.5:12.2

Yā tasmiṁ samaye saddhā saddahanā okappanā abhippasādo saddhā saddhindriyaṁ saddhābalaṁ—

ds2.1.5:12.3

idaṁ tasmiṁ samaye saddhindriyaṁ hoti.

ds2.1.5:13.1

Katamaṁ tasmiṁ samaye vīriyindriyaṁ hoti?

ds2.1.5:13.2

Yo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo vīriyasambojjhaṅgo maggaṅgaṁ maggapariyāpannaṁ—

ds2.1.5:13.3

idaṁ tasmiṁ samaye vīriyindriyaṁ hoti.

ds2.1.5:14.1

Katamaṁ tasmiṁ samaye satindriyaṁ hoti?

ds2.1.5:14.2

Yā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati satisambojjhaṅgo maggaṅgaṁ maggapariyāpannaṁ—

ds2.1.5:14.3

idaṁ tasmiṁ samaye satindriyaṁ hoti.

ds2.1.5:15.1

Katamaṁ tasmiṁ samaye samādhindriyaṁ hoti?

ds2.1.5:15.2

Yā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—

ds2.1.5:15.3

idaṁ tasmiṁ samaye samādhindriyaṁ hoti.

ds2.1.5:16.1

Katamaṁ tasmiṁ samaye paññindriyaṁ hoti?

ds2.1.5:16.2

Yā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—

ds2.1.5:16.3

idaṁ tasmiṁ samaye paññindriyaṁ hoti.

ds2.1.5:17.1

Katamaṁ tasmiṁ samaye manindriyaṁ hoti?

ds2.1.5:17.2

Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

ds2.1.5:17.3

idaṁ tasmiṁ samaye manindriyaṁ hoti.

ds2.1.5:18.1

Katamaṁ tasmiṁ samaye somanassindriyaṁ hoti?

ds2.1.5:18.2

Yaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—

ds2.1.5:18.3

idaṁ tasmiṁ samaye somanassindriyaṁ hoti.

ds2.1.5:19.1

Katamaṁ tasmiṁ samaye jīvitindriyaṁ hoti?

ds2.1.5:19.2

Yo tesaṁ arūpīnaṁ dhammānaṁ āyu ṭhiti yapanā yāpanā iriyanā vattanā pālanā jīvitaṁ jīvitindriyaṁ—

ds2.1.5:19.3

idaṁ tasmiṁ samaye jīvitindriyaṁ hoti.

ds2.1.5:20.1

Katamaṁ tasmiṁ samaye anaññātaññassāmītindriyaṁ hoti?

ds2.1.5:20.2

Yā tesaṁ dhammānaṁ anaññātānaṁ adiṭṭhānaṁ appattānaṁ aviditānaṁ asacchikatānaṁ sacchikiriyāya paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—

ds2.1.5:20.3

idaṁ tasmiṁ samaye anaññātaññassāmītindriyaṁ hoti.

ds2.1.5:21.1

Katamā tasmiṁ samaye sammādiṭṭhi hoti?

ds2.1.5:21.2

Yā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—

ds2.1.5:21.3

ayaṁ tasmiṁ samaye sammādiṭṭhi hoti.

ds2.1.5:22.1

Katamo tasmiṁ samaye sammāsaṅkappo hoti?

ds2.1.5:22.2

Yo tasmiṁ samaye takko vitakko saṅkappo appanā byappanā cetaso abhiniropanā sammāsaṅkappo maggaṅgaṁ maggapariyāpannaṁ—

ds2.1.5:22.3

ayaṁ tasmiṁ samaye sammāsaṅkappo hoti.

ds2.1.5:23.1

Katamā tasmiṁ samaye sammāvācā hoti?

ds2.1.5:23.2

Yā tasmiṁ samaye catūhi vacīduccaritehi ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammāvācā maggaṅgaṁ maggapariyāpannaṁ—

ds2.1.5:23.3

ayaṁ tasmiṁ samaye sammāvācā hoti.

ds2.1.5:24.1

Katamo tasmiṁ samaye sammākammanto hoti?

ds2.1.5:24.2

Yā tasmiṁ samaye tīhi kāyaduccaritehi ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammākammanto maggaṅgaṁ maggapariyāpannaṁ—

ds2.1.5:24.3

ayaṁ tasmiṁ samaye sammākammanto hoti.

ds2.1.5:25.1

Katamo tasmiṁ samaye sammāājīvo hoti?

ds2.1.5:25.2

Yā tasmiṁ samaye micchāājīvā ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammāājīvo maggaṅgaṁ maggapariyāpannaṁ—

ds2.1.5:25.3

ayaṁ tasmiṁ samaye sammāājīvo hoti.

ds2.1.5:26.1

Katamo tasmiṁ samaye sammāvāyāmo hoti?

ds2.1.5:26.2

Yo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo vīriyasambojjhaṅgo maggaṅgaṁ maggapariyāpannaṁ—

ds2.1.5:26.3

ayaṁ tasmiṁ samaye sammāvāyāmo hoti.

ds2.1.5:27.1

Katamā tasmiṁ samaye sammāsati hoti?

ds2.1.5:27.2

Yā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati satisambojjhaṅgo maggaṅgaṁ maggapariyāpannaṁ—

ds2.1.5:27.3

ayaṁ tasmiṁ samaye sammāsati hoti.

ds2.1.5:28.1

Katamo tasmiṁ samaye sammāsamādhi hoti?

ds2.1.5:28.2

Yā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—

ds2.1.5:28.3

ayaṁ tasmiṁ samaye sammāsamādhi hoti.

ds2.1.5:29.1

Katamaṁ tasmiṁ samaye saddhābalaṁ hoti?

ds2.1.5:29.2

Yā tasmiṁ samaye saddhā saddahanā okappanā abhippasādo saddhā saddhindriyaṁ saddhābalaṁ—

ds2.1.5:29.3

idaṁ tasmiṁ samaye saddhābalaṁ hoti.