1431. කතමෙ ධම්මා අතීතාරම්මණා:
විඤ්ඤාණඤ්චායතනං, නෙවසඤ්ඤානාසඤ්ඤායතනං, ඉමෙ ධම්මා අතීතාරම්මණා:
1432. නියතඅනාගතාරම්මණා නත්ථි.
1433. කතමෙ ධම්මා පච්චුප්පන්නාරම්මණා:
ද්වෙපඤ්චවිඤ්ඤාණානි, තිස්සො ච මනොධාතුයො, ඉමෙ ධම්මා පච්චුප්පන්නාරම්මණා.
කාමාවචරකුසලස්ස විපාකතො දස චිත්තුප්පාදා, අකුසලස්ස විපාකතො මනොවිඤ්ඤාණධාතු උපෙක්ඛාසහගතා, කිරියාහෙතුකමනොවිඤ්ඤාණධාතු සොමනස්සසහගතා, ඉමෙ ධම්මා සියා අතීතාරම්මණා සියා අනාගතාරම්මණා සියා පච්චුප්පන්නාරම්මණා.
කාමාවචරකුසලං, අකුසලං, කිරියතො නව චිත්තුප්පාදා, රූපාවචරං චතුත්ථං ඣානං කුසලතො ච කිරියතො ච, ඉමෙ ධම්මා සියා අතීතාරම්මණා සියා අනාගතාරම්මණා සියා පච්චුප්පන්නාරම්මණා; සියා න වත්තබ්බා අතීතාරම්මණාතිපි අනාගතාරම්මණාතිපි පච්චුප්පන්නාරම්මණාතිපි.
රූපාවචරතිකචතුක්කජ්ඣානා කුසලතො ච විපාකතො ච කිරියතො ච, චතුත්ථස්ස ඣානස්ස විපාකො, ආකාසානඤ්චායතනං ආකිඤ්චඤ්ඤායතනං, චත්තාරො මග්ගා අපරියාපන්නා, චත්තාරි ච සාමඤ්ඤඵලානි, ඉමෙ ධම්මා න වත්තබ්බා අතීතාරම්මණාතිපි අනාගතාරම්මණාතිපි පච්චුප්පන්නාරම්මණාතිපි. රූපං ච නිබ්බානං ච අනාරම්මණා.
1434. කතමෙ ධම්මා අජ්ඣත්තා:
අනින්ද්රියබද්ධරූපං ච නිබ්බානං ච ඨපෙත්වා සබ්බෙ ධම්මා සියා අජ්ඣත්තා, සියා බහිද්ධා, සියා අජ්ඣත්තබහිද්ධා, අනින්ද්රියබද්ධරූපං ච නිබ්බානං ච බහිද්ධා.
1435. කතමෙ ධම්මා අජ්ඣත්තාරම්මණා:
විඤ්ඤාණඤ්චායතනං නෙවසඤ්ඤානාසඤ්ඤායතනං, ඉමෙ ධම්මා අජ්ඣත්තාරම්මණා:
1436. කතමෙ ධම්මා බහිද්ධාරම්මණා:
රූපාවචර තිකචතුක්කජ්ඣානා කුසලතො ච විපාකතො ච කිරියතො ච, චතුත්ථස්ස ඣානස්ස විපාකො, ආකාසානඤ්චායතනං, චත්තාරො මග්ගා අපරියාපන්නා, චත්තාරි ච සාමඤ්ඤඵලානි. ඉමෙ ධම්මා බහිද්ධාරම්මණා.
රූපං ඨපෙත්වා සබ්බෙව කාමාවචරා කුසලාකුසලාව්යාකතා ධම්මා, රූපාවචරං, චතුත්ථං ඣානං කුසලතො ච කිරියතො ච, ඉමෙ ධම්මා සියා අජ්ඣත්තාරම්මණා සියා බහිද්ධාරම්මණා සියා අජ්ඣත්තබහිද්ධාරම්මණා.
ආකිඤ්චඤ්ඤායතනං න වත්තබ්බං අජ්ඣත්තාරම්මණන්තිපි බහිද්ධාරම්මණන්තිපි අජ්ඣත්තබහිද්ධාරම්මණන්තිපි.
රූපං ච නිබ්බානං ච අනාරම්මණා.
1437. කතමෙ ධම්මා සනිදස්සනසප්පටිඝා:
රූපායතනං, ඉමෙ ධම්මා සනිදස්සනසප්පටිඝා.
1438. කතමෙ ධම්මා අනිදස්සනසප්පටිඝා:
චක්ඛායතනං -පෙ- ඵොට්ඨබ්බායතනං, ඉමෙ ධම්මා අනිදස්සනසස්පටිඝා.
1439. කතමෙ ධම්මා අනිදස්සනඅප්පටිඝා:
චතුසු භූමිසු කුසලං, අකුසලං, චතුසු භූමිසු විපාකො, තීසු භූමිසු කිරියාව්යාකතං, යං ච රූපං අනිදස්සනං අප්පටිඝං ධම්මායතනපරියාපන්නං, නිබ්බානං ච, ඉමෙ ධම්මා අනිදස්සනඅප්පටිඝා.
තිකං
1440. කතමෙ ධම්මා හෙතු:
තයො කුසලහෙතු, තයො අකුසලහෙතු, තයො අව්යාකතහෙතු.
අලොභො කුසලහෙතු අදොසො කුසලහෙතු චතුසු භූමිසු කුසලෙසු උප්පජ්ජන්ති, අමොහො කුසලහෙතු කාමාවචරකුසලතො චත්තාරො ඤාණවිප්පයුත්තෙ චිත්තුප්පාදෙ ඨපෙත්වා චතුසු භූමිසු කුසලෙසු උප්පජ්ජති.
ලොභො අට්ඨසු ලොභසහගතෙසු චිත්තුප්පාදෙසු උප්පජ්ජති, දොසො ද්වීසු දොමනස්සසහගතෙසු චිත්තුප්පාදෙසු උප්පජ්ජති, මොහො සබ්බාකුසලෙසු උප්පජ්ජති.
අලොභො විපාකහෙතු, අදොසො විපාකහෙතු, කාමාවචරස්ස විපාකතො අහෙතුකෙ චිත්තුප්පාදෙ ඨපෙත්වා චතුසු භූමිසු විපාකෙසු උප්පජ්ජන්ති.
අමොහො විපාකහෙතු කාමාවචරස්ස විපාකතො අහෙතුකෙ චිතුප්පාදෙ ඨපෙත්වා, චත්තාරො ඤාණවිප්පයුත්තෙ චිත්තුප්පාදෙ ඨපෙත්වා, චතුසු භූමිසු විපාකෙසු උප්පජ්ජති.
අලොභො කිරියහෙතු අදොසො කිරියහෙතු, කාමාවචරකිරියතො අහෙතුකෙ චිත්තුප්පාදෙ ඨපෙත්වා තීසු භූමිසු කිරියෙසු උප්පජ්ජන්ති,
අමොහො කිරියහෙතු කාමාවචරකිරියතො අහෙතුකෙ චිත්තුප්පාදෙ ඨපෙත්වා, චත්තාරො ඤාණවිප්පයුත්තෙ චිත්තුප්පාදෙ ඨපෙත්වා, තීසු භූමීසු කිරියෙසු උප්පජ්ජති, ඉමෙ ධම්මා හෙතු.
1441. කතමෙ ධම්මා න හෙතු:
ඨපෙත්වා හෙතු, චතුසු භූමිසු කුසලං අකුසලං චතුසු භූමිසු විපාකො තීසු භූමිසු කිරියාව්යාකතං, රූපං ච නිබ්බානං ච, ඉමෙ ධම්මා න හෙතු.
1442. කතමෙ ධම්මා සහෙතුකා:
විචිකිච්ඡාසහගතං උද්ධච්චසහගතං මොහං ඨපෙත්වා, අවසෙසං අකුසලං, චතුසු භූමිසු කුසලං, කාමාවචරස්ස විපාකතො අහෙතුකෙ චිත්තුප්පාදෙ ඨපෙත්වා චතුසු භූමිසු විපාකො, කාමාවචරකිරියතො අහෙතුකෙ චිත්තුප්පාදෙ ඨපෙත්වා තීසු භූමිසු කිරියාව්යාකතං, ඉමෙ ධම්මා සහෙතුකා.
1443. කතමෙ ධම්මා අහෙතුකා:
විචිකිච්ඡා සහගතො මොහො, උද්ධච්චසහගතො මොහො, ද්වෙ පඤ්ච විඤ්ඤාණානි, තිස්සො ච මනොධාතුයො, පඤ්ච ච අහෙතුකමනොවිඤ්ඤාණධාතුයො, රූපඤ්ච නිබ්බානඤ්ච, ඉමෙ ධම්මා අහෙතුකා.
1444. කතමෙ ධම්මා හෙතුසම්පයුත්තා:
විචිකිච්ඡාසහගතං උද්ධච්චසහගතං මොහං ඨපෙත්වා අවසෙසං අකුසලං, චතුසු භූමිසු කුසලං, කාමාවචරස්ස විපාකතො අහෙතුකෙ චිත්තුප්පාදෙ ඨපෙත්වා චතුසු භූමිසු විපාකො, කාමාවචරකිරියතො අහෙතුකෙ චිත්තුප්පාදෙ ඨපෙත්වා තීසු භූමිසු කිරියාව්යාකතං, ඉමෙ ධම්මා හෙතුසම්පයුත්තා.
1445. කතමෙ ධම්මා හෙතුවිප්පයුත්තා:
විචිකිච්ඡාසහගතො මොහො, උද්ධච්චසහගතො මොහො, ද්වෙ පඤ්චවිඤ්ඤාණානි, තිස්සො ච මනොධාතුයො, පඤ්ච ච අහෙතුක මනොවිඤ්ඤාණධාතුයො, රූපං ච නිබ්බානං ච, ඉමෙ ධම්මා හෙතුවිප්පයුත්තා.
1446. කතමෙ ධම්මා හෙතු චෙව සහෙතුකා ච:
යත්ථ ද්වෙ තයො හෙතු එකතො උප්පජ්ජන්ති, ඉමෙ ධම්මා හෙතු චෙව සහෙතුකා ච.
1447. කතමෙ ධම්මා සහෙතුකා චෙව න ච හෙතු:
චතුසු භූමිසු කුසලං, අකුසලං, කාමාවචරස්ස විපාකතො අහෙතුකෙ චිත්තුප්පාදෙ ඨපෙත්වා චතුසු භූමිසු විපාකො, කාමාවචරකිරියතො අහෙතුකෙ චිත්තුප්පාදෙ ඨපෙත්වා තීසු භූමිසු කිරියාව්යාකතං, එත්ථුප්පන්නෙ හෙතු ඨපෙත්වා, ඉමෙ ධම්මා සහෙතුකා චෙව න ච හෙතු.
අහෙතුකා ධම්මා න වත්තබ්බා හෙතු චෙව සහෙතුකාතිපි, සහෙතුකා චෙව න ච හෙතූතිපි.
1448. කතමෙ ධම්මා හෙතු චෙව හෙතුසම්පයුත්තා ච:
යත්ථ ද්වෙ තයො හෙතු එකතො උප්පජ්ජන්ති, ඉමෙ ධම්මා හෙතු චෙව හෙතු සම්පයුත්තා ච.
1449. කතමෙ ධම්මා හෙතුසම්පයුත්තා චෙව න ච හෙතු:
චතුසු භූමිසු කුසලං, අකුසලං, කාමාවචරස්ස විපාකතො අහෙතුකෙ චිත්තුප්පාදෙ ඨපෙත්වා චතුසු භූමිසු විපාකො, කාමාවචරකිරියතො අහෙතුකෙ චිත්තුප්පාදෙ ඨපෙත්වා තීසු භූමීසු කිරියාව්යාකතං, එත්ථුප්පන්නෙ හෙතු ඨපෙත්වා, ඉමෙ ධම්මා හෙතුසම්පයුත්තා චෙ ව න ච හෙතු.
හෙතුවිප්පයුත්තා ධම්මා න වත්තබ්බා හෙතු චෙව හෙතු සම්පයුත්තාතිපි, හෙතුසම්පයුත්තා චෙව න ච හෙතූතිපි.
1450. කතමෙ ධම්මා න හෙතු සහෙතුකා:
චතුසු භූමිසු කුසලං, අකුසලං, කාමාවචරස්ස විපාකතො අහෙතුකෙ චිත්තුප්පාදෙ ඨපෙත්වා චතුසු භූමිසු විපාකො, කාමාවචරකිරියතො අහෙතුකෙ චිත්තුප්පාදෙ ඨපෙත්වා තීසු භූමිසු කිරියාව්යාකතං, එත්ථුප්පන්නෙ හෙතු ඨපෙත්වා, ඉමෙ ධම්මා න හෙතු සහෙතුකා.
1451. කතමෙ ධම්මා න හෙතු අහෙතුකා:
ද්වෙ පඤ්ච විඤ්ඤාණානි, තිස්සො ච මනොධාතුයො, පඤ්ච ච අහෙතුක මනොවිඤ්ඤාණධාතුයො, රූපං ච නිබ්බානං ච, ඉමෙ ධම්මා න හෙතු අහෙතුකා.
හෙතු ධම්මා න වත්තබ්බා න හෙතු සහෙතුකාතිපි, න හෙතු අහෙතුකාතිපි.
හෙතු ගොච්ඡකං.
1452. කතමෙ ධම්මා සප්පච්චයා:
චතුසු භූමිසු කුසලං, අකුසලං, චතුසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා සප්පච්චයා.
1453. කතමෙ ධම්මා අප්පච්චයා:
නිබ්බානං, ඉමෙ ධම්මා අප්පච්චයා:
1454. කතමෙ ධම්මා සඞ්ඛතා:
චතුසු භූමිසු කුසලං, අකුසලං, චතුසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා සඞ්ඛතා.
1455. කතමෙ ධම්මා අසඞ්ඛතා:
නිබ්බානං, ඉමෙ ධම්මා අසඞ්ඛතා.
1456. කතමෙ ධම්මා සනිදස්සනා:
රූපායතනං, ඉමෙ ධම්මා සනිදස්සනා.
1457. කතමෙ ධම්මා අනිදස්සනා:
චක්ඛායතනං -පෙ- ඵොට්ඨබ්බායතනං, චතුසු භූමීසු කුසලං, අකුසලං, චතුසු භූමිසු විපාකො, තීසු භූමිසු කිරියාව්යාකතං, යං ච රූපං අනිදස්සනං අප්පටිඝං ධම්මායතනපරියාපන්නං, නිබ්බානං ච, ඉමෙ ධම්මා අනිදස්සනා.
1458. කතමෙ ධම්මා සප්පටිඝා:
චක්ඛායතනං -පෙ- ඵොට්ඨබ්බායතනං, ඉමෙ ධම්මා සප්පටිඝා.
1459. කතමෙ ධම්මා අප්පටිඝා:
චතුසු භූමිසු කුසලං, අකුසලං, චතුසු භූමිසු විපාකො, තීසු භූමිසු කිරියාව්යාකතං, යං ච රූපං අනිදස්සනං අප්පටිඝං ධම්මායතනපරියාපන්නං, නිබ්බානං ච, ඉමෙ ධම්මා අප්පටිඝා.
1460. කතමෙ ධම්මා රූපිනො:
චත්තාරො ච මහාභූතා, චතුන්නං ච මහාභූතානං උපාදාය රූපං, ඉමෙ ධම්මා රූපිනො.
1461. කතමෙ ධම්මා අරූපිනො:
චතුසු භූමිසු කුසලං, අකුසලං, චතුසු භූමිසු විපාකො, තීසු භූමිසු කිරියාව්යාකතං, නිබ්බානං ච, ඉමෙ ධම්මා අරූපිනො.
1462. කතමෙ ධම්මා ලොකියා:
තීසු භූමිසු කුසලං, අකුසලං, තීසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා ලොකියා.
1463. කතමෙ ධම්මා ලොකුත්තරා:
චත්තාරො මග්ගා අපරියාපන්නා, චත්තාරි ච සාමඤ්ඤඵලානි, නිබ්බානං ච, ඉමෙ ධම්මා ලොකුත්තරා.
සබ්බෙ ධම්මා කෙනචි විඤ්ඤෙය්යා, කෙනචි න විඤ්ඤෙය්යා.
චුල්ලන්තරදුකං
1464. කතමෙ ධම්මා ආසවා:
චත්තාරො ආසවා: කාමාසවො භවාසවො දිට්ඨාසවො අවිජ්ජාසවො. කාමාසවො අට්ඨසු ලොභසහගතෙසු චිත්තුප්පාදෙසු උප්පජ්ජති, භවාසවො චතුසු දිට්ඨිගතවිප්පයුත්තලොභසහගතෙසු චිත්තුප්පාදෙසු උප්පජ්ජති, දිට්ඨාසවො චතුසු දිට්ඨිගතසම්පයුත්තෙසු චිත්තුප්පාදෙසු උප්පජ්ජති, අවිජ්ජාසවො සබ්බාකුසලෙසු උප්පජ්ජති, ඉමෙ ධම්මා ආසවා.
1465. කතමෙ ධම්මා නො ආසවා:
ඨපෙත්වා ආසවෙ අවසෙසං අකුසලං, චතුසු භූමිසු කුසලං, චතුසු භූමිසු විපාකො, තීසු භූමිසු කිරියාව්යාකතං, රූපං ච, නිබ්බානං ච, ඉමෙ ධම්මා නො ආසවා.
1466. කතමෙ ධම්මා සාසවා:
තීසු භූමිසු කුසලං, අකුසලං, තීසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා සාසවා.
1467. කතමෙ ධම්මා අනාසවා:
චත්තාරො මග්ගා අපරියාපන්නා, චත්තාරි ච සාමඤ්ඤඵලානි, නිබ්බානං ච, ඉමෙ ධම්මා අනාසවා.
1468. කතමෙ ධම්මා ආසවසම්පයුත්තා:
ද්වෙ දොමනස්සසහගතචිත්තුප්පාදා, එත්ථුප්පන්නං මොහං ඨපෙත්වා, විචිකිච්ඡා සහගතෙ උද්ධච්චසහගතෙ මොහෙ ඨපෙත්වා අවසෙසං අකුසලං, ඉමෙ ධම්මා ආසවසම්පයුත්තා.
1469. කතමෙ ධම්මා ආසවවිප්පයුත්තා:
ද්වීසු දොමනස්සසහගතෙසු චිත්තුප්පාදෙසු උප්පන්නො මොහො, විචිකිච්ඡාසහගතො මොහො, උද්ධච්චසහගතො මොහො, චතුසු භූමිසු කුසලං, චතුසු භූමිසු විපාකො, තීසු භූමිසු කිරියාව්යාකතං, රූපං ච නිබ්බානං ච, ඉමෙ ධම්මා ආසවවිප්පයුත්තා.
1470. කතමෙ ධම්මා ආසවා චෙව සාසවා ච:
තෙව ආසවා ආසවා චෙව සාසවා ච.
1471. කතමෙ ධම්මා සාසවා චෙව නො ච ආසවා:
ඨපෙත්වා ආසවෙ අවසෙසං අකුසලං, තීසු භූමිසු කුසලං, තීසු භූමිසු විපාකො, තීසු භූමිසු කිරියාව්යාකතං, සබ්බං ච රූපං, ඉමෙ ධම්මා සාසවා චෙව නො ච ආසවා.