824. කතමං තං රූපං අජ්ඣත්තිකං චක්ඛුධාතු?
චක්ඛායතනං. ඉදං තං රූපං අජ්ඣත්තිකං චක්ඛුධාතු.
825. කතමං තං රූපං අජ්ඣත්තිකං න චක්ඛුධාතු?
සොතායතනං -පෙ- කායායතනං. ඉදං තං රූපං අජ්ඣත්තිකං න චක්ඛුධාතු.
826. කතමං තං රූපං බාහිරං න සොතධාතු -පෙ- න ඝානධාතු -පෙ- න ජිව්හාධාතු -පෙ- න කායධාතු?
රූපායතනං -පෙ- කබලිංකාරො ආහාරො. ඉදං තං රූපං බාහිරං න කායධාතු.
827. කතමං තං රූපං අජ්ඣත්තිකං කායධාතු?
කායායතනං. ඉදං තං රූපං අජ්ඣත්තිකං කායධාතු.
828. කතමං තං රූපං අජ්ඣත්තිකං න කායධාතු?
චක්ඛායතනං -පෙ- ජිව්හායතනං. ඉදං තං රූපං අජ්ඣත්තිකං න කායධාතු.
829. කතමං තං රූපං අජ්ඣත්තිකං න රූපධාතු?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න රූපධාතු.
830. කතමං තං රූපං බාහිරං රූපධාතු?
රූපායතනං. ඉදං තං රූපං බාහිරං රූපධාතු.
831. කතමං තං රූපං බාහිරං න රූපධාතු?
සද්දායතනං -පෙ- කබලිංකාරො ආහාරො. ඉදං තං රූපං බාහිරං න රූපධාතු.
832. කතමං රූපං අජ්ඣත්තිකං න සද්දධාතු -පෙ- න ගන්ධධාතු -පෙ- න රසධාතු -පෙ- න ඵොට්ඨබ්බධාතු?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න ඵොට්ඨබ්බධාතු.
833. කතමං තං රූපං බාහිරං ඵොට්ඨබ්බධාතු?
ඵොට්ඨබ්බායතනං. ඉදං තං රූපං බාහිරං ඵොට්ඨබ්බධාතු.
834. කතමං තං රූපං බාහිරං න ඵොට්ඨබ්බධාතු?
රූපායතනං -පෙ- කබලිංකාරො ආහාරො. ඉදං තං රූපං බාහිරං න ඵොට්ඨබ්බධාතු.
ධාතුතිකා.
835. කතමං තං රූපං බාහිරං න චක්ඛුන්ද්රියං?
රූපායතනං -පෙ- කබලිංකාරො ආහාරො. ඉදං තං රූපං බාහිරං න චක්ඛුන්ද්රියං.
836. කතමං තං රූපං අජ්ඣත්තිකං චක්ඛුන්ද්රියං?
යං චක්ඛුං චතුන්නං මහාභූතානං උපාදාය පසාදො -පෙ- සුඤ්ඤො ගාමොපෙසො. ඉදං තං රූපං අජ්ඣත්තිකං චක්ඛුන්ද්රියං.
837. කතමං තං රූපං අජ්ඣත්තිකං න චක්ඛුන්ද්රියං?
සොතායතනං -පෙ- කායායතනං. ඉදං තං රූපං අජ්ඣත්තිකං න චක්ඛුන්ද්රියං.
838. කතමං තං රූපං බාහිරං න සොතින්ද්රියං -පෙ- න ඝානින්ද්රියං -පෙ- න ජිව්හින්ද්රියං -පෙ- න කායින්ද්රියං?
රූපායතනං -පෙ- කබලිංකාරො ආහාරො. ඉදං තං රූපං බාහිරං න කායින්ද්රියං.
839. කතමං තං රූපං අජ්ඣත්තිකං කායින්ද්රියං?
යො කායො චතුන්නං මහාභූතානං උපාදාය පසාදො -පෙ- සුඤ්ඤො ගාමොපෙසො. ඉදං තං රූපං අජ්ඣත්තිකං කායින්ද්රියං.
840. කතමං තං රූපං අජ්ඣත්තිකං න කායින්ද්රියං?
චක්ඛායතනං -පෙ- ජිව්හායතනං. ඉදං තං රූපං අජ්ඣත්තිකං න කායින්ද්රියං.
841. කතමං තං රූපං අජ්ඣත්තිකං න ඉත්ථින්ද්රියං?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න ඉත්ථින්ද්රියං.
842. කතමං තං රූපං බාහිරං ඉත්ථින්ද්රියං?
යං ඉත්ථියා ඉත්ථිලිඞ්ගං ඉත්ථිනිමිත්තං ඉත්ථිකුත්තං ඉත්ථාකප්පො ඉත්ථත්තං ඉත්ථිභාවො, ඉදං තං රූපං බාහිරං ඉත්ථින්ද්රියං.
843. කතමං තං රූපං බාහිරං න ඉත්ථින්ද්රියං?
රූපායතනං -පෙ- කබලිංකාරො ආහාරො. ඉදං තං රූපං බාහිරං න ඉත්ථින්ද්රියං.
844. කතමං තං රූපං අජ්ඣත්තිකං න පුරිසින්ද්රියං?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න පුරිසින්ද්රියං.
845. කතමං තං රූපං බාහිරං පුරිසින්ද්රියං?
යං පුරිසස්ස පුරිසලිඞ්ගං පුරිසනිමිත්තං පුරිසකුත්තං පුරිසාකප්පො පුරිසත්තං පුරිසභාවො. ඉදං තං රූපං බාහිරං පුරිසින්ද්රියං.
846. කතමං තං රූපං බාහිරං න පුරිසින්ද්රියං.
රූපායතනං -පෙ- කබලිංකාරො ආහාරො. ඉදං තං රූපං බාහිරං න පුරිසින්ද්රියං.
847. කතමං තං රූපං අජ්ඣත්තිකං න ජීවිතින්ද්රියං?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න ජීවිතින්ද්රියං.
848. කතමං තං රූපං බාහිරං ජීවිතින්ද්රියං?
යො තෙසං රූපීනං ධම්මානං ආයු ඨිති යපනා යාපනා ඉරීයනා වත්තනා පාලනා ජීවිතං ජීවිතින්ද්රියං, ඉදං තං රූපං බාහිරං ජීවිතින්ද්රියං.
849. කතමං තං රූපං බාහිරං න ජීවිතින්ද්රියං?
රූපායතනං -පෙ- කබලිංකාරො ආහාරො. ඉදං තං රූපං බාහිරං න ජීවිතින්ද්රියං.
ඉන්ද්රියතිකා.
850. කතමං තං රූපං අජ්ඣත්තිකං න කායවිඤ්ඤත්ති?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න කායවිඤ්ඤත්ති.
851. කතමං තං රූපං බාහිරං කායවිඤ්ඤත්ති?
යා කුසලචිත්තස්ස වා අකුසලචිත්තස්ස වා අව්යාකතචිත්තස්ස වා අභික්කමන්තස්ස වා පටික්කමන්තස්ස වා ආලොකෙන්තස්ස වා විලොකෙන්තස්ස වා සම්මිඤ්ජෙන්තස්ස වා පසාරෙන්තස්ස වා කායස්ස ථම්භනා සන්ථම්භනා සන්ථම්භිතත්තං විඤ්ඤත්ති විඤ්ඤාපනා විඤ්ඤාපිතත්තං. ඉදං තං රූපං බාහිරං කායවිඤ්ඤත්ති.
852. කතමං තං රූපං බාහිරං න කායවිඤ්ඤත්ති?
රූපායතනං -පෙ- කබලිංකාරො ආහාරො. ඉදං තං රූපං බාහිරං න කායවිඤ්ඤත්ති.
853. කතමං තං රූපං අජ්ඣත්තිකං න වචීවිඤ්ඤත්ති?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න වචීවිඤ්ඤත්ති.
854. කතමං තං රූපං බාහිරං වචීවිඤ්ඤත්ති?
යා කුසලචිත්තස්ස වා අකුසලචිත්තස්ස වා අව්යාකතචිත්තස්ස වා වාචා ගිරා ව්යප්පථො උදීරණං ඝොසො ඝොසකම්මං වාචා වචීභෙදො, අයං වුච්චති වාචා. යා තාය වාචාය විඤ්ඤත්ති විඤ්ඤාපනා විඤ්ඤාපිතත්තං, ඉදං තං රූපං බාහිරං වචීවිඤ්ඤත්ති.
855. කතමං තං රූපං බාහිරං න වචීවිඤ්ඤත්ති?
රූපායතනං -පෙ- කබලිංකාරො ආහාරො. ඉදං තං රූපං බාහිරං න වචීවිඤ්ඤත්ති.
856. කතමං තං රූපං අජ්ඣත්තිකං න ආකාසධාතු?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න ආකාසධාතු.
857. කතමං තං රූපං බාහිරං ආකාසධාතු?
යො ආකාසො ආකාසගතං අඝං අඝගතං විවරො විවරගතං අසම්ඵුට්ඨං චතූහි මහාභූතෙහි. ඉදං තං රූපං බාහිරං ආකාසධාතු.
858. කතමං තං රූපං බාහිරං න ආකාසධාතු?
රූපායතනං -පෙ- කබලිංකාරො ආහාරො. ඉදං තං රූපං බාහිරං න ආකාසධාතු.
859. කතමං තං රූපං අජ්ඣත්තිකං න ආපොධාතු?
චක්ඛායතනං -පෙ- කායායතනං. ඉදං තං රූපං අජ්ඣත්තිකං න ආපොධාතු.
860. කතමං තං රූපං බාහිරං ආපොධාතු?
යං ආපො ආපොගතං සිනෙහො සිනෙහගතං බන්ධනත්තං රූපස්ස. ඉදං තං රූපං බාහිරං ආපොධාතු.
861. කතමං තං රූපං බාහිරං න ආපොධාතු?
රූපායතනං -පෙ- කබලිංකාරො ආහාරො. ඉදං තං රූපං බාහිරං න ආපොධාතු.
862. කතමං තං රූපං අජ්ඣත්තිකං රූපස්ස න ලහුතා?
චක්ඛායතනං -පෙ- කායායතනං. ඉදං තං රූපං අජ්ඣත්තිකං රූපස්ස න ලහුතා.
863. කතමං තං රූපං බාහිරං රූපස්ස ලහුතා?
යා රූපස්ස ලහුතා ලහුපරිණාමතා අදන්ධනතා අවිත්ථනතා, ඉදං තං රූපං බාහිරං රූපස්ස ලහුතා.
864. කතමං තං රූපං බාහිරං රූපස්ස න ලහුතා?
රූපායතනං -පෙ- කබලිංකාරො ආහාරො. ඉදං තං රූපං බාහිරං රූපස්ස න ලහුතා.
865. කතමං තං රූපං අජ්ඣත්තිකං රූපස්ස න මුදුතා?
චක්ඛායතනං -පෙ- කායායතනං. ඉදං තං රූපං අජ්ඣත්තිකං රූපස්ස න මුදුතා.
866. කතමං තං රූපං බාහිරං රූපස්ස මුදුතා?
යා රූපස්ස මුදුතා මද්දවතා අකක්ඛළතා අකඨිනතා, ඉදං තං රූපං බාහිරං රූපස්ස මුදුතා.
867. කතමං තං රූපං බාහිරං රූපස්ස න මුදුතා?
රූපායතනං -පෙ- කබලිංකාරො ආහාරො. ඉදං තං රූපං බාහිරං රූපස්ස න මුදුතා?
868. කතමං තං රූපං අජ්ඣත්තිකං රූපස්ස න කම්මඤ්ඤතා?
චක්ඛායතනං -පෙ- කායායතනං. ඉදං තං රූපං අජ්ඣත්තිකං රූපස්ස න කම්මඤ්ඤතා.
869. කතමං තං රූපං බාහිරං රූපස්ස කම්මඤ්ඤතා?
යා රූපස්ස කම්මඤ්ඤතා කම්මඤ්ඤත්තං කම්මඤ්ඤභාවො, ඉදං තං රූපං බාහිරං රූපස්ස කම්මඤ්ඤතා.
870. කතමං තං රූපං බාහිරං රූපස්ස න කම්මඤ්ඤතා?
රූපායතනං -පෙ- කබලිංකාරො ආහාරො. ඉදං තං රූපං බාහිරං රූපස්ස න කම්මඤ්ඤතා.
871. කතමං තං රූපං අජ්ඣත්තිකං රූපස්ස න උපචයො?
චක්ඛායතනං -පෙ- කායායතනං. ඉදං තං රූපං අජ්ඣත්තිකං රූපස්ස න උපචයො.
872. කතමං තං රූපං බාහිරං රූපස්ස උපචයො?
යො ආයතනානං ආචයො, සො රූපස්ස උපචයො. ඉදං තං රූපං බාහිරං රූපස්ස උපචයො.